Read yoruba Ìwé ti Aisaya 33 Bible Online

Ìwé ti Aisaya 33 - yoruba bible

Ìwé ti Aisaya 33

¹O gbé! Ìwọ tí ń panirun, tí ẹnìkan kò parun, ìwọ tí ò ń hùwà ọ̀dàlẹ̀ nígbà tí ẹnìkan kò dà ọ́. Ìgbà tí o bá dáwọ́ ìpanirun dúró, nígbà náà ni a óo pa ìwọ gan-an run; nígbà tí o bá fi ìwà ọ̀dàlẹ̀ sílẹ̀, nígbà náà ni a óo dà ọ́.

²Ṣàánú wa OLUWA, ìwọ ni a dúró tí à ń wò. Máa ràn wá lọ́wọ́ lojoojumọ, sì máa jẹ́ olùgbàlà wa nígbà ìṣòro.

³Àwọn orílẹ̀-èdè sá nígbà tí wọ́n gbọ́ ariwo tí ó dàbí ti ààrá, wọ́n fọ́n ká nígbà tí o gbéra nílẹ̀.

⁴A kó ìkógun jọ bí ìgbà tí tata bo oko, àwọn eniyan dà bo ìṣúra, bí ìgbà tí eṣú bo oko.

⁵A gbé OLUWA ga! Nítorí pé ibi gíga ni ó ń gbé; yóo mú kí ìdájọ́ òtítọ́ ati òdodo kún Sioni.

⁶Yóo mú kí ìdúróṣinṣin wà ní gbogbo àkókò rẹ̀. Yóo fún ọ ní ọpọlọpọ ìgbàlà, ati ọgbọ́n, ati ìmọ̀, ìbẹ̀rù OLUWA ni ìṣúra rẹ̀.

⁷Ẹ wò ó, àwọn alágbára ń kígbe lóde, àwọn òjíṣẹ́ alaafia ń sọkún tẹ̀dùntẹ̀dùn.

⁸Òpópó ọ̀nà ṣófo, àwọn èrò kò rìn mọ́; wọ́n ń ba majẹmu jẹ́, wọn kò bìkítà fún ẹlẹ́rìí mọ́; wọ́n kò sì ka eniyan sí.

⁹Ilẹ̀ ṣófo ó sì gbẹ, ìtìjú bá òkè Lẹbanoni, gbogbo ewéko orí rẹ̀ sì rẹ̀ dànù. Ṣaroni dàbí aṣálẹ̀, igi igbó Baṣani ati ti òkè Kamẹli sì wọ́wé.

¹⁰OLUWA ní: “Ó yá tí n óo dìde, ó yá mi wàyí, n óo gbéra nílẹ̀. Àsìkò tó tí a óo gbé mi ga.

¹¹Èrò yín dàbí fùlùfúlù, gbogbo ìṣe yín dàbí pòpórò ọkà. Èémí mi yóo jó yín run bí iná.

¹²Àwọn orílẹ̀-èdè yóo dàbí ìgbà tí a sun wọ́n, tí wọ́n di eérú, àní bí igi ẹ̀gún tí a gé lulẹ̀, tí a sì dáná sun.

¹³Ẹ̀yin tí ẹ wà lókè réré, ẹ gbọ́ ohun tí mo ṣe; ẹ̀yin tí ẹ wà nítòsí, ẹ kíyèsí agbára mi.”

¹⁴Ẹ̀rù ń ba àwọn ẹlẹ́ṣẹ̀ tí ó wà ní Sioni; ìjayà mú àwọn ẹni tí kò mọ Ọlọrun. Ta ni ninu wa ló lè gbé inú iná ajónirun? Ta ni ninu wa ló lè gbé inú iná àjóòkú?

¹⁵Ẹni tí ọ̀nà rẹ̀ bá tọ́, tí ó sì ń sọ ọ̀rọ̀ òtítọ́, ẹni tí ó kórìíra èrè àjẹjù, tí ó kọ̀, tí kò gba àbẹ̀tẹ́lẹ̀, tí ó di etí sí ọ̀rọ̀ àwọn tí ń gbèrò ati paniyan, tí ó sì di ojú rẹ̀ kí ó má baà rí nǹkan ibi.

¹⁶Ibi ààbò ni yóo máa gbé, àpáta ńlá ni yóo jẹ́ ibi ààbò rẹ̀. Yóo máa rí oúnjẹ jẹ déédé, yóo sì máa rí omi mu lásìkò, lásìkò.

¹⁷Ojú yín yóo rí ọba ninu ọlá ńlá rẹ̀; ẹ óo fojú yín rí ilẹ̀ tí ó lọ salalu.

¹⁸Ẹ óo máa ronú ìnira tí ẹ ti ní pé: “Níbo ni akọ̀wé wà? Níbo ni ẹni tí ń gba owó orí wà? Níbo sì ni ẹni tí ń ka ilé ìṣọ́ wà?”

¹⁹Ẹ kò ní rí àwọn aláfojúdi náà mọ́, àwọn tí wọn ń fọ èdè tí kò ní ìtumọ̀ si yín, tí wọn ń kólòlò ní èdè tí ẹ kò gbọ́.

²⁰Ẹ wo Sioni, ìlú tí a yà sọ́tọ̀ fún àjọ̀dún. Ẹ óo fi ojú rí Jerusalẹmu, ibùgbé alaafia, tí àgọ́ rẹ̀ kò ní ṣídìí, tí èèkàn tí a fi kàn án mọ́lẹ̀ kò ní hú laelae, bẹ́ẹ̀ ni okùn tí a fi so ó mọ́lẹ̀ kò ní já.

²¹Ṣugbọn níbẹ̀ ni OLUWA, ninu ògo rẹ̀, yóo jẹ́ odò ńlá ati odò tí ń ṣàn fún wa; níbi tí ọkọ̀ ọlọ́pọ́n kò lè dé, ọkọ̀ ojú omi kò sì ní lè kọjá níbẹ̀.

²²Nítorí pé OLUWA ni onídàájọ́ wa, òun ni alákòóso wa; OLUWA ni ọba wa, òun ni yóo gbà wá là.

²³Okùn òpó-ọkọ̀ rẹ̀ ti tú, kò lè mú òpó-ọkọ̀ náà dáradára ní ipò rẹ̀ mọ́; kò sì lè gbé ìgbòkun dúró. A óo pín ọpọlọpọ ìkógun nígbà náà, kódà, àwọn arọ pàápàá yóo pín ninu rẹ̀.

²⁴Kò sí ará ìlú kan tí yóo sọ pé, “Ara mi kò yá.” A óo dárí ẹ̀ṣẹ̀ àwọn tí ń gbé ibẹ̀ jì wọ́n.