Read yoruba Ìwé ti Aisaya 47 Bible Online

Ìwé ti Aisaya 47 - yoruba bible

Ìwé ti Aisaya 47

¹Sọ̀kalẹ̀ kí o jókòó ninu eruku, ìwọ Babiloni. Jókòó ní ilẹ̀ẹ́lẹ̀, láìsí ìtẹ́-ọba, ìwọ ọmọbinrin Kalidea. A kò ní pè ọ́ ní ẹlẹgẹ́ ati aláfẹ́ mọ́.

²Gbé ọlọ kí o máa lọ ọkà, ṣí aṣọ ìbòjú rẹ kúrò, ká aṣọ rẹ sókè, kí o ṣí ẹsẹ̀ rẹ sílẹ̀, kí o sì la odò kọjá.

³A óo tú ọ sí ìhòòhò, a óo sì rí ìtìjú rẹ. N óo gbẹ̀san, n kò sì ní dá ẹnìkan kan sí.

⁴Olùràpadà wa, tí ń jẹ́ OLUWA àwọn ọmọ ogun, ni Ẹni Mímọ́ Israẹli.

⁵OLUWA wí nípa Kalidea pé: “Jókòó kí o dákẹ́ jẹ́ẹ́, kí o sì wọ inú òkùnkùn lọ, ìwọ ọmọbinrin Kalidea. Nítorí a kò ní pè ọ́ ní ayaba àwọn orílẹ̀-èdè mọ́.

⁶Inú bí mi sí àwọn eniyan mi, mo sì sọ nǹkan ìní mi di ohun ìríra. Mo fi wọ́n lé ọ lọ́wọ́, o kò ṣàánú wọn. O di àjàgà wúwo rẹ mọ́ àwọn arúgbó lọ́rùn.

⁷O sọ pé ìwọ ni o óo máa jẹ́ ayaba títí lae, nítorí náà o kò kó àwọn nǹkan wọnyi lékàn, o kò sì ranti ìgbẹ̀yìn wọn.

⁸“Nítorí náà, gbọ́ nisinsinyii, ìwọ tí o fẹ́ràn afẹ́ ayé, tí o jókòó láìléwu, tí ò ń sọ lọ́kàn rẹ pé, ‘Èmi nìkan ni mo wà, kò sí ẹlòmíràn lẹ́yìn mi. N kò ní di opó, bẹ́ẹ̀ ni n kò ní ṣòfò ọmọ.’

⁹Ọ̀fọ̀ mejeeji ni yóo ṣe ọ́ lójijì, lọ́jọ́ kan náà: o óo ṣòfò ọmọ, o óo sì di opó, ibi yìí yóo dé bá ọ lẹ́kùn-únrẹ́rẹ́. Ò báà lóṣó, kí o lájẹ̀ẹ́, kí àfọ̀ṣẹ rẹ sì múná jù bẹ́ẹ̀ lọ.

¹⁰“Ọkàn rẹ balẹ̀ ninu iṣẹ́ ibi rẹ, o ní ẹnìkan kò rí ọ. Ọgbọ́n ati ìmọ̀ rẹ mú ọ ṣìnà, ò ń sọ ní ọkàn rẹ pé, ‘Èmi nìkan ní mo wà. Kò sí ẹlòmíràn lẹ́yìn mi.’

¹¹Ṣugbọn ibi yóo dé bá ọ, tí o kò ní lè dáwọ́ rẹ̀ dúró; àjálù yóo dé bá ọ, tí o kò ní lè ṣe ètùtù rẹ̀; ìparun yóo dé bá ọ lójijì, tí o kò ní mọ nǹkankan nípa rẹ̀.

¹²Múra sí àfọ̀ṣẹ rẹ, sì múra si oṣó ṣíṣẹ́ jọ, tí o ti dáwọ́ lé láti kékeré, bóyá o óo tilẹ̀ yege, tabi bóyá o sì lè dẹ́rùba eniyan.

¹³Ọpọlọpọ ìmọ̀ràn tí wọn fún ọ ti sú ọ; jẹ́ kí wọn dìde nílẹ̀ kí wọ́n gbà ọ́ wàyí, àwọn tí ó ń wojú ọ̀run, ati àwọn awòràwọ̀; tí wọn ń sọ àsọtẹ́lẹ̀ ohun tí yóo ṣẹlẹ̀ sí ọ, nígbà tí oṣù bá ti lé.

¹⁴“Wò ó! Wọ́n dàbí àgékù koríko, iná ni yóo jó wọn ráúráú, wọn kò sì ní lè gba ara wọn kalẹ̀, ninu ọ̀wọ́ iná. Eléyìí kì í ṣe iná tí eniyan ń yá, kì í ṣe iná tí eniyan lè jókòó níwájú rẹ̀.

¹⁵Bẹ́ẹ̀ ni àwọn tí ẹ jọ ń ṣiṣẹ́ pọ̀ rí sí ọ, àwọn tí ẹ ti jọ ń ṣòwò pọ̀ láti ìgbà èwe rẹ. Olukuluku wọn ti ṣìnà lọ, kò sí ẹni tí yóo gbà ọ́ sílẹ̀.”