Read yoruba Ìwé ti Aisaya 51 Bible Online

Ìwé ti Aisaya 51 - yoruba bible

Ìwé ti Aisaya 51

¹“Ẹ gbọ́ ẹ̀yin tí ẹ̀ ń sáré ìdáǹdè, ẹ̀yin tí ẹ̀ ń wá OLUWA, ẹ wo àpáta tí a mú lára rẹ̀, tí a fi gbẹ yín, ati kòtò ibi tí a ti wà yín jáde.

²Ẹ wo Abrahamu baba yín, ati Sara tí ó bi yín. Òun nìkan ni nígbà tí mo pè é, tí mo súre fún un, tí mo sì sọ ọ́ di ọpọlọpọ eniyan.

³“OLUWA yóo tu Sioni ninu, yóo tu gbogbo àwọn tí ó ṣòfò ninu rẹ̀ ninu; yóo sì sọ aṣálẹ̀ rẹ̀ dàbí Edẹni, ọgbà OLUWA. Ayọ̀ ati ìdùnnú ni yóo máa wà ninu rẹ̀, pẹlu orin ọpẹ́ ati orin ayọ̀.

⁴“Ẹ fetí sí mi, ẹ̀yin eniyan mi, ẹ tẹ́tí sí mi, ẹ̀yin orílẹ̀-èdè, òfin kan yóo ti ọ̀dọ̀ mi jáde, ìdájọ́ òdodo mi yóo jẹ́ ìmọ́lẹ̀ fún àwọn eniyan.

⁵Ìdáǹdè mi súnmọ́ tòsí, ìgbàlà mi sì ti ń yọ bọ̀. Èmi ni n óo máa ṣe àkóso àwọn eniyan, àwọn erékùṣù yóo gbẹ́kẹ̀lé mi, ìrànlọ́wọ́ mi ni wọn yóo sì máa retí.

⁶Ẹ gbójú sókè, ẹ wo ojú ọ̀run, kí ẹ sì wo ayé ní ìsàlẹ̀. Ọ̀run yóo parẹ́ bí èéfín, ayé yóo gbó bí aṣọ, àwọn tí ń gbé inú rẹ̀ yóo sì kú bíi kòkòrò; ṣugbọn títí lae ni ìgbàlà mi, ìdáǹdè mi kò sì ní lópin.

⁷“Ẹ̀yin tí ẹ mọ òdodo, ẹ gbọ́ ohùn mi, ẹ̀yin tí ẹ fi tọkàntọkàn gba òfin mi, ẹ má bẹ̀rù ẹ̀gàn àwọn eniyan; ẹ má sì jẹ́ kí yẹ̀yẹ́ wọn já a yín láyà.

⁸Ikán yóo jẹ wọ́n bí aṣọ, kòkòrò yóo jẹ wọ́n bí òwú; ṣugbọn ìdáǹdè mi yóo wà títí lae, ìgbàlà mi yóo sì wà láti ìran dé ìran.”

⁹Jí, jí! Dìde, OLUWA, jí pẹlu agbára; jí bí ìgbà àtijọ́, bí o ti ṣe sí ìran wa látijọ́. Ṣebí ìwọ ni o gé Rahabu wẹ́lẹwẹ̀lẹ, tí o fi idà gún diragoni?

¹⁰Àbí ìwọ kọ́ ni o mú kí omi òkun gbẹ, omi inú ọ̀gbun ńlá; tí o sọ ilẹ̀ òkun di ọ̀nà, kí àwọn tí o rà pada lè kọjá?

¹¹Àwọn tí OLUWA rà pada yóo pada wá, pẹlu orin ni wọn óo pada wá sí Sioni. Adé ayọ̀ ni wọn óo dé sórí, wọn óo láyọ̀, inú wọn yóo dùn; ìbànújẹ́ ati ẹ̀dùn wọn yóo sì fò lọ.

¹²“Èmi fúnra mi ni mò ń tù ọ́ ninu, ta ni ọ́, tí o fi ń bẹ̀rù eniyan tí yóo kú? Ìwọ ń bẹ̀rù ọmọ eniyan tí a dá, bíi koríko.

¹³O gbàgbé OLUWA ẹlẹ́dàá rẹ, tí ó ta ojú ọ̀run bí aṣọ, tí ó fi ìpìlẹ̀ ayé sọlẹ̀. O wá ń fi gbogbo ọjọ́ ayé bẹ̀rù ibinu àwọn aninilára, nítorí wọ́n múra tán láti pa ọ́ run? Ibinu àwọn aninilára kò ní dé ọ̀dọ̀ rẹ mọ́.

¹⁴Láìpẹ́, a óo tú àwọn tí a tẹ̀ lórí ba sílẹ̀. Wọn kò ní kú, wọn kò ní wọ inú isà òkú, wọn kò sì ní wá oúnjẹ tì.

¹⁵“Nítorí èmi ni OLUWA, Ọlọrun rẹ, ẹni tí ó rú òkun sókè, tí ìgbì rẹ̀ fi ń pariwo; OLUWA àwọn ọmọ ogun ni orúkọ mi.

¹⁶Mo ti fi ọ̀rọ̀ mi sí ọ lẹ́nu, mo ti pa ọ́ mọ́ lábẹ́ òjìji ọwọ́ mi. Èmi ni mo fi ojú ọ̀run sí ipò rẹ̀, tí mo fi àwọn ìpìlẹ̀ ayé sọlẹ̀, tí mo sì sọ fún ìlú Sioni pé, ‘Ẹ̀yin ni eniyan mi.’ ”

¹⁷Jí, jí! Dìde, ìwọ Jerusalẹmu. Ìwọ tí o ti rí ẹ̀kúnrẹ́rẹ́ ibinu OLUWA, ìwọ tí OLUWA ti fi ibinu jẹ níyà, tí ojú rẹ wá ń pòòyì.

¹⁸Kò sí ẹni tí yóo tọ́ ọ sọ́nà, ninu gbogbo àwọn ọmọ tí o ti bí, kò sí ẹni tí yóo fà ọ́ lọ́wọ́, ninu gbogbo ọmọ tí o tọ́ dàgbà.

¹⁹Àjálù meji ló dé bá ọ, ta ni yóo tù ọ́ ninu: Ìsọdahoro ati ìparun, ìyàn ati ogun, ta ni yóo tù ọ́ ninu?

²⁰Àárẹ̀ mú àwọn ọmọ rẹ, wọ́n sùn káàkiri ní gbogbo òpópó, bí ìgalà tí ó bọ́ sinu àwọ̀n. Ibinu OLUWA rọ̀jò lé wọn lórí, àní ìbáwí Ọlọrun rẹ.

²¹Nítorí náà, ẹ̀yin tí à ń fi ìyà jẹ, ẹ gbọ́ èyí; ẹ̀yin tí ẹ ti yó láì tíì mu ọtí,

²²Oluwa rẹ, àní OLUWA Ọlọrun rẹ, tí ń bẹ̀bẹ̀ fún ẹ̀ṣẹ̀ àwọn eniyan rẹ̀ ní, “Wò ó! Mo ti gba ife àmutagbọ̀n-ọ́n-gbọ̀n-ọ́n lọ́wọ́ rẹ, O kò ní rí ibinu mi mọ́.

²³Àwọn tí ń dá ọ lóró ni yóo rí ibinu mi, àwọn tí ó wí fún ọ pé, ‘Bẹ̀rẹ̀ mọ́lẹ̀ kí á gba orí rẹ kọjá;’ tí wọ́n sọ ẹ̀yìn rẹ di ilẹ̀ẹ́lẹ̀, tí wọ́n sọ ọ́ di ojú ọ̀nà wọn, tí wọn óo máa gbà kọjá.”