Read yoruba Ìwé ti Jeremaya 47 Bible Online

Ìwé ti Jeremaya 47 - yoruba bible

Ìwé ti Jeremaya 47

¹OLUWA bá Jeremaya wolii sọ̀rọ̀ nípa Filistini kí Farao tó ṣẹgun Gasa,

²Ó ní, “Wò ó, omi kan ń ru bọ̀ láti ìhà àríwá, yóo di àgbàrá tí ó lágbára; yóo ya bo ilẹ̀ yìí ati gbogbo ohun tí ó wà lórí rẹ̀, yóo ya bo ìlú yìí pẹlu, ati àwọn tí wọn ń gbé inú rẹ̀. Àwọn eniyan yóo kígbe: gbogbo àwọn ará ìlú yóo sọkún tẹ̀dùntẹ̀dùn.

³Nígbà tí pátákò ẹsẹ̀ ẹṣin bá ń dún, tí àwọn kẹ̀kẹ́ ogun rẹ̀ bá ń sáré, tí ẹsẹ̀ àwọn kẹ̀kẹ́ ogun sì ń pariwo, Àwọn baba kò ní lè wo àwọn ọmọ wọn lẹ́yìn pé kí àwọn fà wọ́n, nítorí pé ọwọ́ wọn yóo rọ;

⁴nítorí ọjọ́ tí ń bọ̀, tí yóo jẹ́ ọjọ́ ìparun gbogbo àwọn ará Filistia, ọjọ́ tí a óo run gbogbo àwọn olùrànlọ́wọ́ tí ó kù fún Tire ati Sidoni. Nítorí pé OLUWA yóo pa àwọn ará Filistia run, àwọn tí wọ́n kù ní etí òkun ní Kafitori.

⁵Ìbànújẹ́ ti dé bá Gasa, Aṣikeloni ti parun. Ẹ̀yin tí ẹ kù lára àwọn ọmọ Anakimu, ẹ óo ti fi ìbànújẹ́ ṣá ara yín lọ́gbẹ́ pẹ́ tó?

⁶Ẹ̀yin ń bèèrè pé, ‘Ìwọ idà OLUWA, yóo ti pẹ́ tó kí o tó sinmi? Pada sinu àkọ̀ rẹ, máa sinmi kí o sì dúró jẹ́ẹ́.’

⁷Ṣugbọn idà OLUWA ṣe lè dákẹ́ jẹ́ẹ́, nígbà tí Oluwa fún un ní iṣẹ́ láti ṣe? OLUWA ti pàṣẹ fún un láti kọlu Aṣikeloni, ati àwọn ìlú etí òkun.”