Read yoruba Ìwé Ẹkún Jeremaya 1 Bible Online

Ìwé Ẹkún Jeremaya 1 - yoruba bible

Ìwé Ẹkún Jeremaya 1

¹Ẹ wò ó bí ìlú tí ó kún fún eniyan tẹ́lẹ̀ ti di ahoro, tí ó wá dàbí opó! Ìlú tí ó tóbi láàrin àwọn orílẹ̀-èdè tẹ́lẹ̀! Tí ó sì dàbí ọmọ ọba obinrin láàrin àwọn ìlú yòókù. Ó ti wá di ẹni àmúsìn.

²Ó ń sọkún tẹ̀dùntẹ̀dùn lóru, omijé ń dà lójú rẹ̀, kò sì sí ẹni tí yóo tù ú ninu, láàrin àwọn alajọṣepọ rẹ̀. Gbogbo àwọn ọ̀rẹ́ rẹ̀ ti dà á, wọ́n dìtẹ̀ mọ́ ọn, wọ́n sì di ọ̀tá rẹ̀.

³Juda ti lọ sí ìgbèkùn, wọ́n sì ń fi tipátipá mú un sìn. Nisinsinyii, ó ń gbé ààrin àwọn orílẹ̀-èdè mìíràn, kò sì ní ibi ìsinmi. Ọwọ́ àwọn tí wọn ń lépa rẹ̀ ti tẹ̀ ẹ́, ninu ìdààmú rẹ̀.

⁴Àwọn ọ̀nà tó lọ sí Sioni ń ṣe ìdárò, nítorí kò sí ẹni tí ó ń gba ibẹ̀ lọ síbi àwọn àjọ̀dún tí a yà sọ́tọ̀ mọ́. Àwọn ẹnubodè rẹ̀ ti di ahoro, àwọn alufaa rẹ̀ sì ń kẹ́dùn. Wọ́n ń pọ́n àwọn ọmọbinrin rẹ̀ lójú, òun pàápàá sì ń joró lọpọlọpọ.

⁵Àwọn ọ̀tá ilẹ̀ Juda ti borí rẹ̀, wọ́n ti wá di ọ̀gá rẹ̀, nítorí pé, OLUWA ń jẹ ẹ́ níyà fún ọpọlọpọ ẹ̀ṣẹ̀ rẹ̀, àwọn ọ̀tá ti ti àwọn ọmọ rẹ̀ ṣáájú, wọ́n ti kó wọn nígbèkùn lọ.

⁶Gbogbo ògo Jerusalẹmu ti fò lọ kúrò lára rẹ̀, àwọn olórí rẹ̀ dàbí àgbọ̀nrín tí kò rí koríko tútù jẹ; agbára kò sí fún wọn mọ́, wọ́n ń sálọ níwájú àwọn tí ń lé wọn.

⁷Ní ọjọ́ ìpọ́njú ati ìbànújẹ́, Jerusalẹmu ranti àwọn nǹkan iyebíye tí ó ní ní ìgbà àtijọ́. Nígbà tí àwọn eniyan rẹ̀ bọ́ sọ́wọ́ ọ̀tá, tí kò sì sí ẹni tí yóo ràn wọ́n lọ́wọ́. Àwọn ọ̀tá bẹ̀rẹ̀ sí yọ̀ ọ́, wọ́n sì ń fi ṣẹ̀sín nítorí ìṣubú rẹ̀.

⁸Jerusalẹmu ti dẹ́ṣẹ̀ burúkú, nítorí náà ó ti di eléèérí. Àwọn tí wọn ń bu ọlá fún un tẹ́lẹ̀ ti ń kẹ́gàn rẹ̀, nítorí pé wọ́n ti rí ìhòòhò rẹ̀. Òun pàápàá ń kérora, ó sì fi ojú pamọ́.

⁹Ìwà èérí rẹ̀ hàn níbi ìṣẹ́tí aṣọ rẹ̀, kò sì bìkítà fún ìparun tí ń bọ̀. Nítorí náà ni ìṣubú rẹ̀ fi pọ̀, tí kò sì fi ní olùtùnú. Ó ké pe OLUWA pé kí ó ṣíjú wo ìnira òun, nítorí pé ọ̀tá ti borí rẹ̀.

¹⁰Ọ̀tá ti tọwọ́ bọ ilé ìṣúra rẹ̀, wọ́n sì ti kó gbogbo nǹkan iyebíye inú rẹ̀ lọ; ó ń wo àwọn orílẹ̀-èdè mìíràn, tí wọn ń wọ ibi mímọ́ rẹ̀. Àwọn tí ó pàṣẹ pé wọn kò gbọdọ̀ dé àwùjọ àwọn eniyan rẹ̀.

¹¹Gbogbo àwọn eniyan rẹ̀ ń kérora bí wọ́n ti ń wá oúnjẹ; wọ́n ń fi ìṣúra wọn ṣe pàṣípààrọ̀ fún oúnjẹ kí wọ́n baà lè lágbára. Jerusalẹmu ń sunkún pé, “Bojúwò mí, OLUWA, nítorí pé mo di ẹni ẹ̀gàn.”

¹²Ó ní, “Ṣé ọ̀rọ̀ yìí kò kàn yín ni, gbogbo ẹ̀yin tí ẹ̀ ń kọjá lọ? Ẹ̀yin náà ẹ wò ó, kí ẹ ṣe akiyesi rẹ̀, bóyá ìbànújẹ́ kan wà tí ó dàbí èyí tí ó dé bá mi yìí; tí OLUWA mú kí ó dé bá mi, ní ọjọ́ ibinu gbígbóná rẹ̀.

¹³“Ó rán iná láti òkè ọ̀run wá; ó dá a sí egungun mi; ó dẹ àwọ̀n sílẹ̀ fún mi; ó sì dá mi pada. Mo dàbí odi, mo sì fi ìgbà gbogbo dákú.

¹⁴“Ó di ẹ̀ṣẹ̀ mi bí àjàgà, ó gbé e kọ́ mi lọ́rùn, ó sì sọ mí di aláìlágbára. OLUWA ti fi mí lé àwọn tí n kò lè dojú kọ lọ́wọ́.

¹⁵“OLUWA ti fi ẹsẹ̀ tẹ àwọn akọni mi mọ́lẹ̀; ó pe ọpọlọpọ eniyan jọ sí mi, ó ní kí wọ́n pa àwọn ọdọmọkunrin mi; OLUWA ti tẹ àwọn ọmọ Juda ní àtẹ̀rẹ́, bí ẹni tẹ èso àjàrà fún ọtí waini.

¹⁶“Nítorí àwọn ìṣẹ̀lẹ̀ wọnyi ni mo ṣe sọkún; tí omijé ń dà lójú mi; olùtùnú jìnnà sí mi, kò sí ẹni tí ó lè dá mi lọ́kàn le. Àwọn ọmọ mi ti di aláìní, nítorí pé àwọn ọ̀tá ti borí wa.

¹⁷“Sioni na ọwọ́ rẹ̀ fún ìrànwọ́, Ṣugbọn kò sí ẹni tí ó ràn án lọ́wọ́, OLUWA ti pàṣẹ pé, kí àwọn aládùúgbò Jakọbu di ọ̀tá rẹ̀; Jerusalẹmu sì ti di eléèérí láàrin wọn.

¹⁸“Ohun tí ó tọ́ ni OLUWA ṣe, nítorí mo ti ṣe àìgbọràn sí ọ̀rọ̀ rẹ̀; ṣugbọn, ẹ gbọ́, ẹ̀yin eniyan, ẹ kíyèsí ìjìyà mi; wọ́n ti kó àwọn ọdọmọbinrin ati ọdọmọkunrin mi lọ sí ìgbèkùn.

¹⁹“Mo ké pe àwọn alajọṣepọ mi, ṣugbọn títàn ni wọ́n tàn mí; àwọn alufaa ati àwọn àgbààgbà mi ṣègbé láàrin ìlú, níbi tí wọn ti ń wá oúnjẹ kiri, tí wọn óo jẹ, kí wọn lè lágbára

²⁰“Bojúwò mí, OLUWA, nítorí mo wà ninu ìpọ́njú, ọkàn mi ti dàrú, inú mi bàjẹ́, nítorí pé mo ti hùwà ọ̀tẹ̀ lọpọlọpọ. Níta gbangba, ogun ń pa mí lọ́mọ; bákan náà ni ikú ń bẹ ninu ilé.

²¹“Gbọ́ bí mo ti ń kérora, kò sí ẹnìkan tí yóo tù mí ninu. Gbogbo àwọn ọ̀tá mi ti gbọ́ nípa ìyọnu mi; inú wọn sì dùn, pé ìwọ ni o kó ìyọnu bá mi. Jẹ́ kí ọjọ́ tí o dá tètè pé, kí àwọn náà lè dàbí mo ti dà.

²²“Ranti gbogbo ìwà ibi wọn, kí o sì jẹ wọ́n níyà; bí o ti jẹ mí níyà, nítorí gbogbo ẹ̀ṣẹ̀ mi. Ìrora mi pọ̀ ọkàn mi sì rẹ̀wẹ̀sì.”