Read yoruba Ìwé Ẹkún Jeremaya 2 Bible Online

Ìwé Ẹkún Jeremaya 2 - yoruba bible

Ìwé Ẹkún Jeremaya 2

¹Ẹ wò bí OLUWA ti fi ibinu fi ìkùukùu bo Sioni mọ́lẹ̀. Ó ti wọ́ ògo Israẹli lu láti òkè ọ̀run sórí ilẹ̀ ayé; kò tilẹ̀ ranti àpótí ìtìsẹ̀ rẹ̀ ní ọjọ́ ibinu rẹ̀.

²OLUWA ti pa gbogbo ibùgbé Jakọbu run láìsí àánú. Ó ti fi ibinu wó ibi ààbò Juda lulẹ̀. Ó ti rẹ ìjọba ati àwọn aláṣẹ rẹ̀ sílẹ̀, ó fi àbùkù kàn wọ́n.

³Ó ti fi ibinu gbígbóná rẹ̀, pa àwọn alágbára Israẹli; ó kọ̀, kò ràn wọ́n lọ́wọ́, nígbà tí àwọn ọ̀tá dojú kọ wọ́n. Ó jó àwọn ọmọ Jakọbu bí iná, ó sì pa gbogbo ohun tí wọn ní run.

⁴Ó kẹ́ ọfà rẹ̀ bí ọ̀tá, ó múra bí aninilára. Gbogbo ògo wa ló parun lójú wa, ó sì tú ibinu rẹ̀ jáde bí iná, ninu àgọ́ Sioni.

⁵OLUWA ṣe bí ọ̀tá, ó ti pa Israẹli run. Ó ti pa gbogbo ààfin rẹ̀ run, ó sọ àwọn ibi ààbò rẹ̀ di àlàpà ó sì sọ ọ̀fọ̀ ati ẹkún Juda di pupọ.

⁶Ó wó àgọ́ rẹ̀ lulẹ̀, bí ìgbà tí eniyan wó ahéré oko. Ó pa gbogbo ibi tí wọ́n ti ń ṣe àwọn àjọ̀dún tí a yà sọ́tọ̀ run. OLUWA ti fi òpin sí àwọn àjọ̀dún tí a yà sọ́tọ̀, ati ọjọ́ ìsinmi ní Sioni. Ó sì ti fi ibinu gbígbóná rẹ̀, kọ ọba ati alufaa sílẹ̀.

⁷OLUWA kò bìkítà fún pẹpẹ rẹ̀ mọ́, ó sì ti kọ ibi mímọ́ rẹ̀ sílẹ̀. Ó ti fi odi ààfin rẹ̀ lé àwọn ọ̀tá lọ́wọ́; wọ́n pariwo ńlá ninu ilé OLUWA gẹ́gẹ́ bíi ti ọjọ́ àjọ̀dún tí a yà sọ́tọ̀.

⁸OLUWA ti pinnu láti wó odi Sioni lulẹ̀. Ó fi okùn ìwọ̀n wọ̀n ọ́n, kò sì rowọ́ láti parun. Ó jẹ́ kí ilé ìṣọ́ ati odi ìlú wó lulẹ̀ pẹlu ìbànújẹ́, wọ́n sì di àlàpà papọ̀.

⁹Àwọn ẹnubodè rẹ̀ ti rì, wọ́n ti wọlẹ̀; ó ti ṣẹ́ àwọn ọ̀pá ìdábùú ìlẹ̀kùn bodè; ọba rẹ̀ ati àwọn olórí rẹ̀ wà láàrin àwọn orílẹ̀-èdè mìíràn; òfin kò sí mọ́, àwọn wolii rẹ̀ kò sì ríran láti ọ̀dọ̀ OLUWA mọ́.

¹⁰Àwọn àgbààgbà Sioni jókòó lórí ilẹ̀, wọ́n dákẹ́ rọ́rọ́, wọ́n ku eruku sórí, wọ́n sì wọ aṣọ ọ̀fọ̀. Àwọn ọmọbinrin Jerusalẹmu doríkodò.

¹¹Ẹkún sísun ti sọ ojú mi di bàìbàì, ìdààmú bá ọkàn mi; ìbànújẹ́ sì mú kí ó rẹ̀wẹ̀sì nítorí ìparun àwọn eniyan mi, nítorí pé àwọn ọmọ wẹ́wẹ́ ati àwọn ọmọ ọwọ́ ń dákú lójú pópó láàrin ìlú.

¹²Bí wọ́n ti ń dákú láàrin ìlú, bí ẹni tí a ṣá lọ́gbẹ́, tí wọ́n sì ń kú lọ lẹ́yìn ìyá wọn, wọ́n ń sọkún sí àwọn ìyá wọn pé: “Ebi ń pa wá, òùngbẹ sì ń gbẹ wá.”

¹³Kí ni mo lè sọ nípa rẹ, kí sì ni ǹ bá fi ọ́ wé, Jerusalẹmu? Kí ni mo lè fi wé ọ, kí n lè tù ọ́ ninu, ìwọ Sioni? Nítorí bí omi òkun ni ìparun rẹ gbòòrò; ta ló lè mú ọ pada bọ̀ sípò?

¹⁴Ìran èké ati ti ẹ̀tàn ni àwọn wolii rẹ ń rí sí ọ; wọn kò fi ẹ̀ṣẹ̀ rẹ hàn ọ́, kí wọ́n lè dá ire rẹ pada, ṣugbọn wọ́n ń ríran èké ati ìran ẹ̀tàn sí ọ.

¹⁵Gbogbo àwọn tí ń rékọjá lọ ń pàtẹ́wọ́ lé ọ lórí, wọ́n ń pòṣé, wọ́n sì ń mi orí wọn sí ọ, Jerusalẹmu. Wọ́n ń sọ pé: “Ṣé ìlú yìí ni à ń pè ní ìlú tí ó lẹ́wà jùlọ, tí ó jẹ́ ayọ̀ gbogbo ayé?”

¹⁶Gbogbo àwọn ọ̀tá rẹ ń fi ọ́ ṣẹ̀sín, wọ́n ń pòṣé, wọ́n ń fi ọ́ ṣe ẹlẹ́yà. Wọ́n ń wí pé: “A ti pa á run! Ọjọ́ tí a tí ń retí nìyí; ọwọ́ wa ti tẹ Jerusalẹmu wàyí! A ti rí ohun tí à ń wá!”

¹⁷OLUWA ti ṣe bí ó ti pinnu, ó ti mú ìlérí rẹ̀ ṣẹ, bí ó ti sọ ní ìgbà àtijọ́. Ó ti wó ọ lulẹ̀ láìṣàánú rẹ; ó ti jẹ́ kí ọ̀tá yọ̀ ọ́, ó ti fún àwọn ọ̀tá rẹ ni agbára kún agbára.

¹⁸Ẹ kígbe sí OLUWA, ẹ̀yin ará Sioni! Ẹ jẹ́ kí omi máa dà lójú yín pòròpòrò tọ̀sán-tòru; ẹ má sinmi, ẹ má sì jẹ́ kí oorun kùn yín.

¹⁹Ẹ dìde, ẹ kígbe lálẹ́, ní àkókò tí àwọn aṣọ́de ń bẹ̀rẹ̀ iṣẹ́! Ẹ tú ẹ̀dùn ọkàn yín jáde bí omi níwájú OLUWA! Ẹ gbé ọwọ́ ẹ̀bẹ̀ sókè sí i, nítorí ẹ̀mí àwọn ọmọ yín tí ebi ń pa kú lọ ní gbogbo ìkóríta.

²⁰Wò ó! OLUWA, ṣe akiyesi ohun tí ń ṣẹlẹ̀! Wo àwọn tí ò ń ṣe irú èyí sí! Ṣé ó yẹ kí àwọn obinrin máa jẹ ọmọ wọn? Ọmọ ọwọ́ tí wọn ń tọ́jú! Ṣé ó yẹ kí á pa alufaa ati wolii, ní ibi mímọ́ OLUWA?

²¹Àtàwọn ọ̀dọ́, àtàwọn arúgbó wọ́n kú kalẹ̀ lọ lójú pópó, àtàwọn ọdọmọbinrin, àtàwọn ọdọmọkunrin mi, gbogbo wọn ni idà ti pa. Ní ọjọ́ ibinu rẹ ni o pa wọ́n, o pa wọ́n ní ìpakúpa láìṣàánú wọn.

²²O pe àwọn ọ̀tá mi jọ sí mi bí ẹni peniyan síbi àjọ̀dún; kò sì sí ẹni tí ó yè ní ọjọ́ ibinu rẹ, OLUWA. Ọ̀tá mi pa àwọn ọmọ mi run, àwọn tí mo tọ́, tí mo sì fẹ́ràn.