Read yoruba Ìwé Ẹkún Jeremaya 3 Bible Online

Ìwé Ẹkún Jeremaya 3 - yoruba bible

Ìwé Ẹkún Jeremaya 3

¹Èmi ni mo mọ bí eniyan tií rí ìpọ́njú, tí mo mọ bí Ọlọrun tií fi ibinu na eniyan ní pàṣán.

²Ó lé mi wọ inú òkùnkùn biribiri.

³Dájúdájú, ó ti dojú kọ mí, ó sì bá mi jà léraléra tọ̀sán-tòru.

⁴Ó ti jẹ́ kí n rù kan egungun, ó sì ti fọ́ egungun mi.

⁵Ó dótì mí, ó fi ìbànújẹ́ ati ìṣẹ́ yí mi káàkiri.

⁶Ó fi mí sinu òkùnkùn bí òkú tí ó ti kú láti ọjọ́ pípẹ́.

⁷Ó mọ odi yí mi ká, ó sì fi ẹ̀wọ̀n wúwo dè mí, kí n má baà lè sálọ.

⁸Bí ó tilẹ̀ jẹ́ pé mo ké pè é fún ìrànlọ́wọ́, sibẹsibẹ kò gbọ́ adura mi.

⁹Ó to òkúta gbígbẹ́ dí ọ̀nà mi, ó mú kí ọ̀nà mí wọ́.

¹⁰Ó ba dè mí bí ẹranko ìjàkùmọ̀, ó lúgọ bíi kinniun,

¹¹Ó wọ́ mi kúrò lójú ọ̀nà mi, ó fà mí ya pẹ́rẹpẹ̀rẹ, ó sì ti sọ mí di alailẹnikan.

¹²Ó kẹ́ ọfà, ó fa ọrun rẹ̀, ó sì fi mí ṣe ohun ìtafàsí.

¹³Ó mú gbogbo ọfà tí ó wà ninu apó rẹ̀ ó ta wọ́n mọ́ mi lọ́kàn.

¹⁴Mo wá di ẹni yẹ̀yẹ́ lọ́dọ̀ gbogbo eniyan, ẹni tí wọ́n fi ń kọrin tọ̀sán-tòru.

¹⁵Ó mú kí ọkàn mi kún fún ìbànújẹ́, ó fún mi ní iwọ mu ní àmuyó.

¹⁶Ó fẹnu mi gbolẹ̀, títí yangí fi ká mi léyín; ó gún mi mọ́lẹ̀ ninu eruku

¹⁷Ọkàn mi kò ní alaafia, mo ti gbàgbé ohun tí ń jẹ́ ayọ̀.

¹⁸Nítorí náà, mo wí pé, “Ògo mi ti tán, ati gbogbo ohun tí mò ń retí lọ́dọ̀ OLUWA.”

¹⁹Ranti ìyà ati ìbànújẹ́ mi, ati ìrora ọkàn mi!

²⁰Mò ń ranti nígbà gbogbo, ọkàn mi sì ń rẹ̀wẹ̀sì.

²¹Ṣugbọn mo tún ń ranti nǹkankan, mo sì ní ìrètí.

²²Nítorí pé Ìfẹ́ OLUWA tí kì í yẹ̀ kò nípẹ̀kun, àánú rẹ̀ kò sì lópin;

²³ọ̀tun ni wọ́n láràárọ̀, òtítọ́ rẹ̀ pọ̀.

²⁴Ọkàn mi wí pé, “OLUWA ni ìpín mi, nítorí náà lọ́dọ̀ rẹ̀ ni ìrètí mi wà.”

²⁵OLUWA a máa ṣe oore fún àwọn tí wọn dúró dè é, tí wọn sì ń wá ojurere rẹ̀.

²⁶Ó dára kí eniyan dúró jẹ́ẹ́, de ìgbàlà OLUWA.

²⁷Ó dára kí eniyan foríti àjàgà ìtọ́sọ́nà ní ìgbà èwe.

²⁸Kí ó fi ọwọ́ lẹ́rán, kí ó dákẹ́, kí ó sì máa wòye, nítorí Ọlọrun ni ó gbé àjàgà náà kọ́ ọ lọ́rùn.

²⁹Kí ó rẹ ara rẹ̀ sílẹ̀ tọ̀wọ̀tọ̀wọ̀, bóyá ìrètí lè tún wà fún un.

³⁰Kí ó kọ etí rẹ̀ sí ẹni tí ó fẹ́ gbá a létí, kí wọ́n sì fi àbùkù kàn án.

³¹Nítorí OLUWA kò ní ta wá nù títí lae.

³²Bí ó tilẹ̀ mú kí ìbànújẹ́ dé bá wa, yóo ṣàánú wa, yóo tù wá ninu, gẹ́gẹ́ bí ọpọlọpọ ìfẹ́ rẹ̀ tí kì í yẹ̀.

³³Nítorí pé kì í kàn déédé ni eniyan lára tabi kí ó mú ìbànújẹ́ dé bá eniyan láìní ìdí.

³⁴OLUWA kò faramọ́ pé kí á máa ni àwọn ẹlẹ́wọ̀n lára lórí ilẹ̀ ayé,

³⁵kí á máa já ẹ̀tọ́ olódodo gbà lọ́wọ́ rẹ̀ níwájú Ọ̀gá Ògo,

³⁶tabi kí á du eniyan ní ìdájọ́ òdodo.

³⁷Ta ló pàṣẹ nǹkankan rí tí ó sì rí bẹ́ẹ̀, láìjẹ́ pé OLUWA ló fi ọwọ́ sí i?

³⁸Àbí kì í ṣe láti ẹnu Ọ̀gá Ògo ni rere ati burúkú ti ń jáde?

³⁹Kí ló dé tí ẹ̀dá alààyè kan yóo fi máa ráhùn nígbà tí ó bá ń jìyà ẹ̀ṣẹ̀ rẹ̀?

⁴⁰Ẹ jẹ́ kí á yẹ ara wa wò, kí á tún ọ̀nà wa ṣe, kí á sì yipada sí ọ̀dọ̀ OLUWA.

⁴¹Ẹ jẹ́ kí á gbé ojú wa sókè, kí á ra ọwọ́ ẹ̀bẹ̀ sí Ọlọrun ọ̀run:

⁴²“A ti ṣẹ̀, a sì ti ṣoríkunkun, ìwọ OLUWA kò sì tíì dáríjì wá.

⁴³“O gbé ibinu wọ̀ bí ẹ̀wù, ò ń lépa wa, o sì ń pa wá láì ṣàánú wa.

⁴⁴O ti fi ìkùukùu bo ara rẹ, tóbẹ́ẹ̀ tí adura kankan kò lè kọjá sọ́dọ̀ rẹ.

⁴⁵O ti sọ wá di ààtàn ati ohun ẹ̀gbin láàrin àwọn eniyan.

⁴⁶“Gbogbo àwọn ọ̀tá wa ń wẹnu sí wa lára.

⁴⁷Ẹ̀rù ati ìṣubú, ìsọdahoro ati ìparun ti dé bá wa.

⁴⁸Omijé ń dà pòròpòrò lójú mi, nítorí ìparun àwọn eniyan mi.

⁴⁹“Omijé yóo máa dà pòròpòrò lójú mi láì dáwọ́ dúró, ati láìsinmi.

⁵⁰Títí OLUWA yóo fi bojú wo ilẹ̀ láti ọ̀run wá, tí yóo sì rí wa.

⁵¹Ìbànújẹ́ bá mi, nígbà tí mo rí ibi tí ó ṣẹlẹ̀ sí àwọn ọmọbinrin ìlú mi.

⁵²“Àwọn tí ń bá mi ṣọ̀tá láìnídìí ń dọdẹ mi bí ìgbà tí eniyan ń dọdẹ ẹyẹ.

⁵³Wọ́n jù mí sinu ihò láàyè, wọ́n bẹ̀rẹ̀ sí sọ òkúta lù mí mọ́lẹ̀.

⁵⁴Omi bò mí mọ́lẹ̀, mo ní, ‘Mo ti gbé.’

⁵⁵“Mo ké pe orúkọ rẹ, OLUWA, láti inú kòtò jíjìn.

⁵⁶O gbọ́ ẹ̀bẹ̀ tí mò ń bẹ̀ pé, ‘Má ṣe di etí rẹ sí igbe tí mò ń ké fún ìrànlọ́wọ́.’

⁵⁷O súnmọ́ ọ̀dọ̀ mi nígbà tí mo pè ọ́, o dá mi lóhùn pé, ‘Má bẹ̀rù.’

⁵⁸“OLUWA, o ti gba ìjà mi jà, o ti ra ẹ̀mí mi pada.

⁵⁹O ti rí nǹkan burúkú tí wọ́n ṣe sí mi, OLUWA, dá mi láre.

⁶⁰O ti rí gbogbo ìgbẹ̀san wọn, ati gbogbo ète wọn lórí mi.

⁶¹“O ti gbọ́ bí wọn tí ń pẹ̀gàn mi, OLUWA, ati gbogbo ète wọn lórí mi.

⁶²Gbogbo ọ̀rọ̀ ati èrò àwọn ọ̀tá mi sí mi: ibi ni lojoojumọ.

⁶³Kíyèsí i, wọn ìbáà jókòó, wọn ìbáà dìde dúró, èmi ni wọ́n máa fi ń kọrin.

⁶⁴“O óo san ẹ̀san fún wọn, OLUWA, gẹ́gẹ́ bí iṣẹ́ ọwọ́ wọn.

⁶⁵Jẹ́ kí ojú inú wọn fọ́, kí ègún rẹ sì wà lórí wọn.

⁶⁶Fi ibinu lépa wọn, OLUWA, sì pa wọ́n run láyé yìí.”