Read yoruba Ìwé Ẹkún Jeremaya 5 Bible Online

Ìwé Ẹkún Jeremaya 5 - yoruba bible

Ìwé Ẹkún Jeremaya 5

¹OLUWA, ranti ohun tí ó ṣẹlẹ̀ sí wa, Ṣe akiyesi ẹ̀sín wa.

²Àwọn ilẹ̀ àjogúnbá ẹni ẹlẹ́ni, ilé wa sì ti di ti àwọn àjèjì.

³A ti di aláìníbaba, ọmọ òrukàn àwọn ìyá wa kò yàtọ̀ sí opó.

⁴Owó ni a fi ń ra omi tí à ń mu, rírà ni a sì ń ra igi tí a fi ń dáná.

⁵Àwọn tí wọn ń lépa wa ti bá wa, ó ti rẹ̀ wá, a kò sì ní ìsinmi.

⁶A ti fa ara wa kalẹ̀ fún àwọn ará Ijipti ati àwọn ará Asiria nítorí oúnjẹ tí a óo jẹ.

⁷Àwọn baba wa ni wọ́n dẹ́ṣẹ̀, àwọn sì ti kú, ṣugbọn àwa ni à ń jìyà ẹ̀ṣẹ̀ wọn.

⁸Àwọn ẹrú ní ń jọba lé wa lórí, kò sì sí ẹni tí yóo gbà wá lọ́wọ́ wọn.

⁹Ẹ̀mí wa ni à ń fi wéwu, kí á tó rí oúnjẹ, nítorí ogun tí ó wà ninu aṣálẹ̀.

¹⁰Awọ ara wa gbóná bí iná ààrò, nítorí ìyàn tí ó mú lọpọlọpọ.

¹¹Tipátipá ni wọ́n fi ń bá àwọn obinrin lòpọ̀ ní Sioni, ati àwọn ọmọbinrin tí wọn kò tíì mọ ọkunrin ní Juda.

¹²Wọ́n fi okùn so ọwọ́ àwọn olórí rọ̀, wọn kò sì bọ̀wọ̀ fún àwọn àgbààgbà.

¹³Wọ́n fi ipá mú àwọn ọdọmọkunrin pé kí wọn máa lọ ọlọ, àwọn ọmọde ru igi títí àárẹ̀ mú wọn!

¹⁴Àwọn àgbààgbà ti sá kúrò ní ẹnubodè; àwọn ọdọmọkunrin sì ti dákẹ́ orin kíkọ.

¹⁵Inú wa kò dùn mọ́; ijó wa ti yipada, ó ti di ọ̀fọ̀.

¹⁶Adé ti ṣíbọ́ lórí wa! A gbé! Nítorí pé a ti dẹ́ṣẹ̀,

¹⁷nítorí náà, ọkàn wa ti rẹ̀wẹ̀sì; ojú wa sì ti di bàìbàì.

¹⁸Nítorí òkè Sioni tí ó di ahoro; tí àwọn ọ̀fàfà sì ń ké lórí rẹ̀.

¹⁹Ṣugbọn ìwọ OLUWA ni ó jọba títí ayé, ìtẹ́ rẹ sì wà láti ìrandíran.

²⁰Kí ló dé tí o fi gbàgbé wa patapata? Tí o sì kọ̀ wá sílẹ̀ fún ìgbà pípẹ́?

²¹Mú wa pada sọ́dọ̀ ara rẹ, OLUWA, kí á lè pada sí ipò wa. Mú àwọn ọjọ́ àtijọ́ wa pada.

²²Ṣé o ti kọ̀ wá sílẹ̀ patapata ni? Àbí o sì tún ń bínú sí wa, inú rẹ kò tíì rọ̀?