Read yoruba Ìwé ti Obadaya 1 Bible Online

Ìwé ti Obadaya 1 - yoruba bible

Ìwé ti Obadaya 1

¹Ìran tí Ọbadaya rí nìyí, OLUWA Ọlọrun sọ nípa Edomu pé: A ti gbọ́ ìròyìn láti ọ̀dọ̀ OLUWA, ó sì ti rán iranṣẹ rẹ̀ sí àwọn orílẹ̀-èdè pé: “Ẹ múra, ẹ jẹ́ kí á lọ bá Edomu jagun!”

²Ó sọ fún Edomu pé, “Wò ó, n óo sọ ọ́ di yẹpẹrẹ láàrin àwọn orílẹ̀-èdè yòókù; gbogbo ayé pátá ni yóo máa fi ọ́ ṣẹ̀sín.

³Ìgbéraga rẹ ti tàn ọ́ jẹ, ìwọ tí ò ń gbé inú pàlàpálá òkúta, tí ibùgbé rẹ wà lórí òkè gíga, tí o sì ń wí ninu ọkàn rẹ pé, ‘Ta ni ó lè fà mí lulẹ̀?’

⁴Bí o tilẹ̀ fò lọ sókè bí ẹyẹ idì, tí ó tẹ́ ìtẹ́ rẹ̀ sí ààrin àwọn ìràwọ̀, láti òkè náà ni n óo ti fà ọ́ lulẹ̀. Èmi OLUWA ni mo sọ bẹ́ẹ̀.

⁵“Bí àwọn olè bá wá bá ọ lóru, tí àwọn ọlọ́ṣà bá wá ká ọ mọ́lé lọ́gànjọ́, ṣé wọn kò ní hàn ọ́ léèmọ̀? Ṣebí ohun tí wọ́n bá fẹ́ ninu ẹrù rẹ ni wọn óo kó? Bí àwọn tí wọn ń kórè àjàrà bá wá sọ́dọ̀ rẹ, ṣebí wọn a máa fi díẹ̀ sílẹ̀?

⁶Ogun ti kó Esau, gbogbo ìṣúra rẹ̀ ni wọ́n ti kó tán!

⁷Gbogbo àwọn tí wọ́n bá ọ dá majẹmu ti tàn ọ́ jẹ, wọ́n sì ti lé ọ títí dé ààlà ilẹ̀ rẹ; àwọn tí ẹ jọ ń gbé ní alaafia tẹ́lẹ̀ ti di ọ̀tá rẹ; àwọn ọ̀rẹ́ tí o gbẹ́kẹ̀lé ti dẹ tàkúté sílẹ̀ dè ọ́, o kò sì mọ̀.

⁸“Ní ọjọ́ náà, ni n óo pa àwọn ọlọ́gbọ́n run ní Edomu, òye wọn yóo sì di òfo ní òkè Esau.

⁹Ìwọ ìlú Temani, ìbẹ̀rùbojo yóo dé bá àwọn akọni rẹ, gbogbo àwọn ọkunrin tí wọ́n wà ní òkè Esau ni a óo sì fi idà pa.

¹⁰“Nítorí ìwà ìkà tí ẹ hù sí àwọn ọmọ Israẹli, arakunrin yín, ojú yóo tì yín a óo sì pa yín run títí lae.

¹¹Ní ọjọ́ tí àwọn ọ̀tá ń kó ọrọ̀ wọn lọ, tí àwọn àjèjì wọ inú ìlú wọn, tí àwọn ọ̀tá sì ń ṣẹ́ gègé lórí Jerusalẹmu, ẹ dúró, ẹ̀ ń wò wọ́n; ẹ sì dàbí ọ̀kan ninu wọn.

¹²O kì bá tí fi arakunrin rẹ ṣẹ̀sín ní ọjọ́ ìpọ́njú rẹ̀; o kì bá tí jẹ́ kí inú rẹ dùn, ní ọjọ́ ìparun àwọn eniyan Juda; o kì bá tí fọ́nnu ní ọjọ́ ìbànújẹ́ wọn.

¹³O kì bá tí wọ ìlú àwọn eniyan mi ní ọjọ́ ìpọ́njú wọn; o kì bá tí fi wọ́n ṣẹ̀sín ní ọjọ́ àjálù wọn; o kì bá tí kó wọn lẹ́rù ní ọjọ́ ìpọ́njú wọn.

¹⁴O kì bá tí dúró sí oríta, kí o máa mú àwọn tí wọn ń gbìyànjú láti sá àsálà; o kì bá tí fà wọ́n lé àwọn ọ̀tá wọn lọ́wọ́ ní ọjọ́ ìpọ́njú wọn.

¹⁵“Ọjọ́ ìdájọ́ OLUWA fẹ́rẹ̀ dé sórí àwọn orílẹ̀-èdè; a óo san án fún ọ, gẹ́gẹ́ bí iṣẹ́ ọwọ́ rẹ. Ohun tí o bá ṣe, yóo pada sí orí ara rẹ.

¹⁶Ẹ̀yin eniyan mi, bí ẹ ti jìyà ní òkè mímọ́ mi, bẹ́ẹ̀ ni gbogbo àwọn orílẹ̀-èdè náà yóo jìyà; wọn óo jìyà yóo tẹ́ wọn lọ́rùn, wọn yóo sì wà gẹ́gẹ́ bí ẹni pé wọn kò sí rí.

¹⁷“Ṣugbọn ní òkè Sioni ni àwọn tí wọ́n bá sá àsálà yóo máa gbé, yóo sì jẹ́ òkè mímọ́; àwọn ọmọ Jakọbu yóo gba ohun ìní wọn pada.

¹⁸Ilé Jakọbu yóo dàbí iná, ilé Josẹfu yóo dàbí ọ̀wọ́ iná, ilé Esau yóo sì dàbí àgékù koríko. Wọn yóo jó ilé Esau; àwọn ìran Esau yóo jó àjórun láìku ẹnìkan; nítorí pé OLUWA ló sọ bẹ́ẹ̀.

¹⁹Àwọn tí wọn ń gbé Nẹgẹbu yóo gba òkè Edomu, àwọn tí wọ́n wà ní ẹsẹ̀ Ṣefela yóo gba ilẹ̀ àwọn ará Filistia; wọn yóo gba gbogbo agbègbè Efuraimu ati ilẹ̀ Samaria, àwọn ará Bẹnjamini yóo sì gba ilẹ̀ Gileadi.

²⁰Àwọn ọmọ Israẹli tí wọ́n wà ní oko ẹrú ní ilẹ̀ Hala wọ́n óo gba ilẹ̀ Fonike títí dé Sarefati; àwọn eniyan Jerusalẹmu tí wọ́n wà ní oko ẹrú ní ilẹ̀ Sefaradi yóo gba àwọn ìlú tí ó wà ní Nẹgẹbu.

²¹Àwọn olùgbàlà yóo lọ láti Sioni, wọn yóo jọba lórí òkè Edomu; ìjọba náà yóo sì jẹ́ ti OLUWA.”