Read yoruba Ìwé ti Sakaraya 10 Bible Online

Ìwé ti Sakaraya 10 - yoruba bible

Ìwé ti Sakaraya 10

¹Ẹ bèèrè òjò lọ́wọ́ OLUWA ní àkókò rẹ̀, àní lọ́wọ́ OLUWA tí ó dá ìṣúdẹ̀dẹ̀ òjò; Òun ló ń fún eniyan ní ọ̀wààrà òjò, tí àwọn ohun ọ̀gbìn fi ń tutù yọ̀yọ̀.

²Ìsọkúsọ ni àwọn ère ń sọ, àwọn aríran ń ríran èké; àwọn tí ń lá àlá ń rọ́ àlá irọ́, wọ́n sì ń tu àwọn eniyan ninu lórí òfo. Nítorí náà ni àwọn eniyan fi ń rìn káàkiri bí aguntan tí kò ní olùṣọ́.

³OLUWA ní, “Inú mi ru sí àwọn olùṣọ́-aguntan, n óo sì fìyà jẹ àwọn alákòóso. Nítorí èmi OLUWA àwọn ọmọ ogun ń tọ́jú agbo mi, àní àwọn eniyan Juda, wọn yóo sì dàbí ẹṣin alágbára lójú ogun.

⁴Ninu wọn ni a óo ti rí òkúta igun ilé, tí a lè pè ní olórí, aṣaaju, ati aláṣẹ, láti ṣe àkóso àwọn eniyan mi.

⁵Gbogbo wọn óo jẹ́ akikanju lójú ogun, wọn óo tẹ àwọn ọ̀tá wọn mọ́lẹ̀ ní ìgboro; wọn óo jagun, nítorí OLUWA wà pẹlu wọn, wọn óo sì dá àyà já àwọn tí wọn ń gun ẹṣin.

⁶“N óo sọ ilé Juda di alágbára, n óo sì gba ilé Josẹfu là. N óo mú wọn pada, nítorí àánú wọn ń ṣe mí, wọn yóo dàbí ẹni pé n kò kọ̀ wọ́n sílẹ̀ rí; nítorí èmi ni OLUWA Ọlọrun wọn, n óo sì gbọ́ ohùn ẹ̀bẹ̀ wọn.

⁷Nígbà tó bá yá, ilé Efuraimu yóo dàbí jagunjagun alágbára, inú wọn yóo sì dùn bí inú ẹni tí ó mu ọtí waini. Nígbà tí àwọn ọmọ wọn bá rí i, inú wọn yóo dùn, ọkàn wọn yóo sì yin OLUWA.

⁸“N óo ṣẹ́wọ́ sí wọn, n óo sì kó wọn jọ sinu ilé. Mo ti rà wọ́n pada, nítorí náà wọn yóo tún pọ̀ bíi ti àtẹ̀yìnwá.

⁹Bí ó tilẹ̀ jẹ́ pé mo ti fọ́n wọn ká sí ààrin àwọn orílẹ̀-èdè, sibẹsibẹ, wọn yóo ranti mi lọ́nà jíjìn tí wọ́n wà. Àwọn ati àwọn ọmọ wọn yóo wà láàyè, wọn yóo sì pada wá sí ilẹ̀ wọn.

¹⁰N óo kó wọn pada sí ilẹ̀ wọn láti ilẹ̀ Ijipti wá, n óo kó wọn jọ láti ilẹ̀ Asiria; n óo sì kó wọn wá sí ilẹ̀ Gileadi ati ilẹ̀ Lẹbanoni, wọn óo kún ilẹ̀ náà tóbẹ́ẹ̀ tí kò fi ní sí ààyè mọ́.

¹¹Wọn óo la òkun Ijipti kọjá, ìgbì rẹ̀ yóo sì dákẹ́ jẹ́ẹ́. Odò Naili yóo gbẹ kanlẹ̀, a óo rẹ ìgbéraga ilẹ̀ Asiria sílẹ̀, agbára óo sì kúrò lọ́wọ́ àwọn ará Ijipti.

¹²N óo sọ wọ́n di alágbára ninu èmi OLUWA, wọn yóo sì máa ṣògo ninu orúkọ mi.”