Read zande Bambata Pai 1 Bible Online

Bambata Pai 1 - zande bible

Bambata Pai 1

¹Ho rago aenge ni Mbori afu ngbangbaturũ na kpotosende.

²Kpotosende ki du ni ku he ni kina kungba ha, kina bitimo ki du auru dudungura rago dunduko; ga Mbori Toro ki niyanga ayanga ri aime.

³Mbori ki ya, “Imarago dú adu”; imarago ki du.

⁴Mbori ki bi imarago ya si ni wene he; Mbori ki kpara imarago ti bitimo.

⁵Mbori ki yambu rimo imarago nga Uru, ko ki yambu rimo bitimo nga Yuru. Nyemu ki du na wiso, si ki ngia bambata uru.

⁶Mbori ki ya, “Ari dú adu bebere aime, ka kparaka ime ti ime.”

⁷Mbori ki fu ari ki kparaka gu ime nadu tii ari ti gu ime nadu ku ri ari. Si ki du wo.

⁸Mbori ki yambu rimo ari nga Ngbangbaturũ. Nyemu ki du na wiso, si ki ngia ue uru.

⁹Mbori ki ya, “Gu ime du tii ngbangbaturũ si dúngura tihe ku rogo ba sa, ugu rago kúru.” Si ki du wo.

¹⁰Mbori ki yambu rimo ugu rago nga Kpotosende, ko ki yambu rimo gu dunguradungura ime nga Baime. Mbori ki bi he ya si ni wene he.

¹¹Mbori ki ya, “Kpotosende dunduko bátika kurukuru ahe, nga agu rũkurũku ahe namaa tungaha, na agu angua nazuka zuzuhe du na tungaha rogo ho ngba arikaha.” Si ki du wo.

¹²Kpotosende ki batika kurukuru ahe nga agu rũkurũku ahe namaa tungaha ngba arikaha, na agu angua nazuka zuzuhe du na tungaha rogo ho, ngba arikaha. Mbori ki bi he ya si du ni wene he.

¹³Nyemu ki du na wiso, si ki ngia biata uru.

¹⁴Mbori ki ya, “Imaahe dú rogo gu ariyo nga ga ngbangbaturũ ka kparaka uru ti yuru; si dú tipa yuguyugupai a na tipa regbo ahe na tipa arame na tipa agarã,

¹⁵si dú tipa imaahe a rogo gu ariyo nga ga ngbangbaturũ ka hasa rago ku auru kpotosende.” Si ki du wo.

¹⁶Mbori ki fu gu bakere imaahe du ue, gu bakere he ka zoga uru, na gu umba imahe ka zoga yuru; ko ki fu akerekuru a.

¹⁷Mbori ki moi ra rogo gu ariyo nga ga ngbangbaturũ ami nihasi rago ku auru kpotosende,

¹⁸ki zogo uru na yuru a, ko akparaka imarago ti bitimo. Mbori ki bi he ya si ni wene he.

¹⁹Nyemu ki du na wiso, si ki ngia biama uru.

²⁰Mbori ki ya, “Ime bátika agu agbiro kpaima nawo awo du na unga ni dungu ra, azire ki guku auru kpotosende rogo gu ariyo nga ga ngbangbaturũ.”

²¹Mbori ki fu gu kikindigi anya ime, na agu agbiro dunduko du na unga nawo awo nga agu ra ime nabatika ra ni badungu ra, ngba arikara, na agu azire dunduko du na apupora ngba arikara a. Mbori ki bi he si ni wene he.

²²Mbori ki fu maku fu ra, ki ya, “Oni zúga ki nge ange ki hiki gu ime du rogo abaime yo, azire ningé ange ku auru kpotosende a.”

²³Nyemu ki du na wiso, si ki ngia bisue uru.

²⁴Mbori ki ya, “Kpotosende bátika unga anya ngba arikara: nga zogozogo anya na agu ra nagbe tira sande na anya nvuo nga ga kpotosende ra ngba arikara.” Si ki du wo.

²⁵Mbori ki fu agu anya nga ga kpotosende ra ngba arikara, na agu anya nga zogozogo ra ngba arikara, na agu agbiro dunduko nagbe tira sande ngba arikara. Mbori ki bi he ya si ni wene he.

²⁶Mbori ki ya, “Ani fú boro ni kpiarani, wa kina rani; i zógo atĩo baime, na azire ari, na agu anya nga zogozogo ra, na kpotosende dunduko na agu agbiro dunduko nagbe tira sande.”

²⁷Mbori ki fu boro ni kpiako, kpia Mbori Mbori afu ko ni; kumba na de ko afu yo.

²⁸Mbori ki fu maku fu yo, Mbori ki ya fu yo, “Oni zúga azuga, ki nge ange, ki hisi kpotosende berewe ki zogo ho; ki nikindo auru agu atĩo du baime yo na auru azire ari na gu unga anya dunduko nawo awo auru kpotosende.”

²⁹Mbori ki ya, “Oni ngére, mi fu ngbatunga rũkurũku ahe dunduko fu roni namaa tungaha du auru kpotosende dũ, na agu angua dunduko nazuka zuzuhe nga gu du na tunga rogo ho; si adú fu roni ni riahe.

³⁰Mi fu ngbatunga kpe kurukuru ahe dunduko ni riahe fu agu anya du auru kpotosende dũ, na fu agu azire ari yo dũ, na fu agu agbiro dũ nagbe tira sande nga agu ra du na unga dunduko.” Si ki du wo.

³¹Mbori ki bi agu ahe dunduko ko amangi he, oni ngére, si ki du ni wene he gbe. Nyemu ki du na wiso, si ki ngia sita uru.