Read zande Bambata Pai 11 Bible Online

Bambata Pai 11 - zande bible

Bambata Pai 11

¹Were pa aboro adu mbata kina sa rogo zegino dunduko na fugoyo a sa.

²Si ki ta du wa gere, wa i anaye uroyo, i abi kpasakpasa sende rogo gu ringara nga Sinara i ki zi ba kporo yo.

³I ki ya dagba yo, “Ani gúari ka meka biriki, ki zokodi he wenengaĩ.” Biriki adu be yo ku ba mbia, dada ki du be yo ku ba pere.

⁴I ki ya, “Ani gúari ka dua bakporo tipa rani, na gu gbanga bambu rihe ka da kina ku ngbangbaturũ yo, rimorani ki du ni taasitaasi he, i ka gbandaka rani yasika auru kpotosende dunduko.”

⁵Yekova ki zorõ ka bi gu bakporo re na gu gbanga bambu, nga gu awiri aboro adua ha.

⁶Yekova ki ya, “Oni ngere, i nga rika aboro kina sa, fugoyo du a sa; gere nga gu pai tona yo ka manga ha; were, agu apai i abérã pa manga ha a nga he ho sa nikarengba na za yo ti manga ha te.

⁷Ani guari ka zorã, ki unzugura fugoyo, ya ka i rúgu nga tiyo na fugo akura yo ya.”

⁸Si du Yekova agbandaka yo ti ni yasika ku auru kpotosende zegino dunduko, rogo gu ba i adu rogo ho. I ki mbu pa dua gu bakporo re.

⁹Si du i ayambu rimoho ti ni nga Babera, bambiko yo Yekova aunzugura gu fugo ni nga ga aboro zegino dunduko. Yekova ki gbandaka yo yo ku auru kpotosende dunduko.

¹⁰Agi yo re nangia angbatunga Seme. Seme araki tipa agarã 100, ko ki batika Arufakasada, ti gu garã nangia ue garã fuo ime akangbi.

¹¹Seme ki raki fuo batika ko Arufakasada, agarã ki du 500, ki nibatika akumbagude na adegude.

¹²Arufakasada ki raki tipa agarã 35 ko ki batika Sera;

¹³Arufakasada ki raki fuo batika ko Sera, agarã ki du 403, ki nibatika akumbagude na adegude.

¹⁴Sera ki raki tipa agarã 30 ko ki batika Ebere;

¹⁵Sera ki raki fuo batika ko Ebere agarã ki du 403, ki nibatika akumbagude na adegude.

¹⁶Ebere ki raki tipa agarã 34, ko ki batika Perege;

¹⁷Ebere ki raki fuo batika ko Perege agarã ki du 430, ki nibatika akumbagude na adegude.

¹⁸Perege araki tipa agarã 30, ko ki batika Ru;

¹⁹Perege ki raki fuo batika ko Ru agarã ki du 209, ki nibatika akumbagude na adegude.

²⁰Ru araki tipa agarã 32, ko ki batika Seruga;

²¹Ru araki fuo batika ko Seruga agarã ki du 207, ki nibatika akumbagude na adegude.

²²Seruga araki tipa agarã 30, ko ki batika Naora;

²³Seruga araki fuo batika ko Naora agarã ki du 200, ki nibatika akumbagude na adegude.

²⁴Naora araki tipa agarã 29, ko ki batika Tera;

²⁵Naora araki fuo batika ko Tera agarã ki du 119, ki nibatika akumbagude na adegude.

²⁶Tera araki tipa agarã 70, ko ki batika Abarama, Naora, na Arana.

²⁷Were agi yo re nangia angbatunga Tera; Tera abatika aAbarama, Naora, na Arana; Arana ki batika Roto.

²⁸Arana akpi ku bangiri bako nangia Tera rogo gu ringara i abatika ko rogo, nga Ura nga ga aKasado.

²⁹AAbarama na Naora ki rogo ade; rimo dia Abarama nangia Sarai, rimo dia Naora ki ngia Mireka, nangia wiri Arana, ko nangia ba Mireka na Yiseke.

³⁰Ono Sarai adu ni irazangada; ri abatika nga te.

³¹Tera ki di Abarama nangia wiriko, na Roto wiri Arana nangia titako, na Sarai nangia dia wiriko, nga Abarama. I ki kuru wa sa Ura yo rogo ga aKasado ringara, ka ndu ku ringara Kanana yo. I ki da kina Arana yo, ki nisungu yo.

³²Garã Tera adu dunduko nga 205. Tera ki kpi Arana yo.