Read zande Bambata Pai 12 Bible Online

Bambata Pai 12 - zande bible

Bambata Pai 12

¹Were, Yekova ki ya fu Abarama, “Mo gúari rogo ga ringara dagba agumero na rogo ga bamo kporo, ka ndu ku rogo gu ringara mi ka yugo ho foro.

²Mi ki sa ro ni bakere rikaaboro, mi ki fu maku foro, ki kiisi rimoro ni bakere he, mo dú ni bafumaku.

³Mi ki fu maku fu agu yo nikafu maku foro, na gu ni nikatiwa ro, mi atíwa ni. Mbiko ro i ka fu maku ti ni fu angbatunga aboro zegino dunduko.”

⁴Si du Abarama aguari ti ni, a wa Yekova agumba ha fu ko; i ki ndu na Roto. Garã Abarama adu 75 ho ko aguari ni Arana yo.

⁵Abarama ki di Sarai nangia diako, na Roto nangia wiri tameko, na gayo ũkumuko dunduko nga gu i anadungura ha, na agu aboro i adu na yo Arana yo; i ki guari ka ndu ku ringara Kanana yo. I ki da ku rogo ringara Kanana.

⁶Abarama ki tangara ringara ki da ku Sekeme yo, ki da ti gu gero du More yo. Ti gu rago re aKanano anaraka rogo gu ringara re kindi.

⁷Yekova ki ta yugo tiko fu Abarama, niya, “Mi afú gi ringara re fu ngbatungaro.” Yo ko adua bamotumo ni fu Yekova, nga gu ko nayugu tiko fu ko.

⁸Ko ki guari yo ki ndu ki da ti gu bagangara du pati Betere ku uroyo, ki dua gako bamburoko yo, Betere ki du ku dioyo, Ai ki du ku uroyo; yo ko adua bamotumo ni fu Yekova, ko ki kpari ti rimo Yekova.

⁹Abarama ki nindu kindi ku Negebe yo.

¹⁰Gberãngbi ki du rogo gu ringara re. Si du Abarama andu ti ni ku Ezipeta yo ka sunga yo mbataono, bambiko gberãngbi amoi pai amaa rogo gu ringara re.

¹¹Were ho ko ambedi ni ku Ezipeta yo, ko ki ya fu Sarai nangia diako, “Mo ngére, mi ini he ya wene de nga mo tigamo ni rengo, ngba ngbanyaro angba bangirise gbe;

¹²si ki ta du wa gere, ho aboro Ezipeta ka bi ro ni, i ayá, ‘Diako du re’; i aimo re ki mbu ro ni ungaro.

¹³Si du mo ka ya ti ni wẽ dawire nga mo, pai ki ngba fere mbiko ro, mi ki bati mbiko ga pai.”

¹⁴Ho Abarama aye ni ku Ezipeta yo aboro Ezipeta ki bi gu de re ya ri adu ni bawene ri ki susi.

¹⁵Ga Faro abaakumba ki bi ri ki tambua ri fu Faro. I ki di ri ku Faro yo.

¹⁶Ko angba na Abarama mbiko ri; ko abi akandoro, na abaabagara, na abaadongi, na amoyambu nga akumba na ade a, anaadongi, na akameri a.

¹⁷Yekova ki mbusi Faro na bakere gberãngbi na gako aborokporo tipa Sarai, nangia dia Abarama.

¹⁸Faro ki yambu Abarama, ki ya, “Gini pai nga gi mo amangi he fere re? Tipagine mo aya nga ti ni fere diaro du ya?

¹⁹Tipagine mo aya ti ni, ‘Dawire nga ri,’ mi adi ri ti ni ni diare? Si du, diaro du re, mo dí ri, ki ga.”

²⁰Faro ki rugu aboro tipa ko; i gási ko ku gene yo ko ga, na diako na agu ahe dunduko nadu be ko.