Read zande Bambata Pai 14 Bible Online

Bambata Pai 14 - zande bible

Bambata Pai 14

¹Ni gu rago Amurafera adu ni bakindo Sinara, Arioka ki du ni bakindo Erasara, Kedoruraomera ki ngia bakindo Erama, Tidara ki ngia bakindo aGoi,

²agi abakindo re i ki so vura kuti Bera nangia bakindo Sodomo, gbiakuti Birasa nangia bakindo Amora, na Sinaba nangia bakindo Adema, na Semebere nangia bakindo Zeboima, na bakindo Bera (si nga Soara).

³Agi yo dunduko re adungura tiyo ku rogo Ngboongboorago Sidimi (si nga Baime Tikpo).

⁴I ara fu Kedoruraomera garã ki du 12, ti 13 garã i ki sa mungu kuti ko.

⁵Ti gu garã nangia 14 ha, Kedoruraomera ki ye na agu abakindo nadu na ko, ki di be aRefo Aseterota-karu-naima yo, na be Azuza Ama yo, na be aEme Save-kiriyatayima yo,

⁶na be aOri rogo gayo Bagangara nga Seira ki da ku Ereparana yo, du bangbanda ngbakungba yo;

⁷i ki yega ku Ene-misapata yo (si nga Kadesa) ki di be gu ringara dunduko nga ga aAmareko, na be aAmoro nanaraka Asasona-tamara yo.

⁸Bakindo Sodomo ki guari, na bakindo Amora, na bakindo Adema, na bakindo Zeboima, na bakindo Bera (si nga Soara) i ki tangara tiyo sa vura kuti agu yo ku rogo Ngboongboorago Sidimi,

⁹nga Kedoruraomera bakindo Erama, na Tidara bakindo aGoi, na Amurafera bakindo Sinara, na Arioka bakindo Erasara, nga abakindo biama kuti abakindo bisue.

¹⁰Were dungu adue dada adu rogo Ngboongboorago Sidimi. Abakindo Sodomo na Amora ki oro, ki tiwi ku rogo ho, akura yo ki oro ku bagangara yo.

¹¹Avurayo ki gbu ahe dunduko nangia ga aSodomo na ga aAmoro, na gayo ariahe dunduko, ki ga na ni;

¹²i ki zi Roto, nangia wiri tame Abarama, nanaraka Sodomo yo, na gako ahe, ki ga.

¹³Gu ni sa nabati ki ye ka gumba ha fu Abarama, nangia Ebere, wa ko araka pati agu agero nangia ga Mamare nangia boro Amora, wirina Esokore na Anera; agi yo re amangi mokido dagba yo na Abarama.

¹⁴Ho Abarama agi he ni ya i zi wirinako, ko ki ngbe ku mbata yo fu gako aborovura, nga agu yo i avungu yo kpuko yo, i adu wa aboro 318, i ki do fuo yo ki da ku Dana yo.

¹⁵Ko ki kparaka gako aboro yuru kuti yo, ko na avuruko, i ki mangi yo ki dandi yo ki da Oba yo, nga gu du pavuru Damaseke ku nodiyo.

¹⁶Ko ki yega na ahe dunduko, ki yega na wirinako nangia Roto a, na gako ahe, na ade na aboro a.

¹⁷Fuo yega ko pati imo Kedoruraomera na agu abakindo naadu na ko, bakindo Sodomo ki kuru ka gbia ko, rogo Ngboongboorago Save, (si nga ga Bakindo Ngboongboorago).

¹⁸Marekesedeke nangia bakindo Sarema ki ye na riahe na imekakue; ko adu ni boromotumo fu Mbori nga Bahe ki susi.

¹⁹Ko ki ta fu maku fu Abarama niya, “Maku dú fu Abarama be Mbori nga Bahe ki susi, nga baira ngbangbaturũ na kpotosende;

²⁰tambuahe dú fu Mbori nga Bahe ki susi, nga gu ko nafu avuraro dunduko ku be ro!” Abarama ki fu sa dagba bawe fu ko rogo ahe dunduko.

²¹Bakindo Sodomo ki ya fu Abarama “Mo fú aboro fere, mo ki rogo ahe ni gamo.”

²²Abarama ki ya fu bakindo Sodomo, “Mi azunga he nitumba bere koyo du Yekova ni nga Mbori nga Bahe ki susi, nga baira ngbangbaturũ na kpotosende,

²³ya mi adía nga watadu toni wiri gire na giri rakata te, mi adía nga gu he nga gamo wa sa te, mo ka ya, ‘Mi nakumukosi Abarama’,

²⁴kina gu aparanga ari he, na gu bete gbugbuahe nga ga agu aboro ani andu na yo; nga Anera na Esekore na Mamare, i rógo gu bete gbugbuahe ni gayo.”