Read zande Bambata Pai 16 Bible Online

Bambata Pai 16 - zande bible

Bambata Pai 16

¹Ono Sarai dia Abarama, ri abatika nga gude fu ko te. Kanga adu be ri nangia boro Ezipeta rimori angia Agara.

²Sarai ki ya fu Abarama, “Were, mo ngére, Yekova aka na pa batika be re; mo ndú fuo gi kanga; si ngia mi abi gude mbiko ri.” Abarama ki gi sangba Sarai.

³Were ho garã Abarama adu ni bawe rogo gu ringara nga Kanana, Sarai nangia dia Abarama ki di Agara nangia boro Ezipeta, nangia gari kanga ki fu ri fu Abarama nangia kumbari ni diako.

⁴Ko ki ini Agara ni de, ri ki du na mobara. Ho ri aini he ni ya ri na mobara, pa nairari ki paya apaya bangiriri.

⁵Sarai ki ya fu Abarama, “Gu pai mangi ri fere dú ku ri ro! Mi afu gi kanga foro, ho ri aini he ni ya ri na mobara mi ki paya apaya bangiriri. Yekova sápu ngbanga dagba rani na mo!”

⁶Abarama ki ya fu Sarai, “Mo ngére, ga kanga kina be ro; mo mángi gu pai fu ri ngba bangiro.” Sarai ki mangi ri amanga gbe, ri ki oro be ri.

⁷Ga Yekova maraika ki bi ri pati gugaabi ngbakungba yo, nga gu gugaabi du ngba gene Sura yo.

⁸Ko ki ya fu ri, “Agara, ga Sarai kanga, mo naye wari, wari mo andú ku ho ni?” Ri ki ya, “Mi naora be nairare nga Sarai.”

⁹Ga Yekova maraika ki ya fu ri, “Mo káraga tiro koyo du nairaro ni, ki nigi sangbari.”

¹⁰Ga Yekova maraika ki ya fu ri berewe, “Mi angéesa ngbatungaro kpaima ka si adú nga wa ka i gedi yo mbiko nge yo ya.”

¹¹Ga Yekova maraika ki ya fu ri. “Mo ngére, mo na gude, mo abátika kumbagude; mo ki yambu rimoko nga Yisamaere; bambiko Yekova gi pa ga rungo.

¹²Ko adú wa ngbiimo, ono ko atúmba beko kuti aboro dunduko aboro ki tumba beyo kuti ko a. Ko asúnga mbembedi na awirinako dunduko.”

¹³Ri ki yambu rimo Yekova nga gu ko nafura na ri, “Mo nga Mbori nabi apai”; bambiko ri aya, “Bi mi Mbori kina erẽ nga gu ko nabi re?”

¹⁴Were gu guga re i ayambu rimoho nga Bera-rai-roi; si dagba Kadesa na Berede.

¹⁵Agara ki batika kumbagude fu Abarama; Abarama ki yambu rimo wiriko nga gu ko Agara abatika ko nga Yisamaere.

¹⁶Garã Abarama adu 86 ho Agara abatika Yisamaere ni fu Abarama.