Read zande Bambata Pai 17 Bible Online

Bambata Pai 17 - zande bible

Bambata Pai 17

¹Ho garã Abarama adu ni 99 Yekova ki yugu tiko fu Abarama, ki ya fu ko, “Mi nga Mbori du na tandu apai du; mo niráki ku bangire, ki du teketeke.

²Mi amáa gi mozunga dagba rani na mo, mi ki ngeesi ro kpaima.”

³Abarama ki tumusa ni kpakpuko ku sende; Mbori ki ta fura na ko, niya,

⁴“Mo ngére, gi zungahe du na mo, mo adú ni ba fu rimbasa arikaaboro.

⁵I ayámba nga rimoro nga Abarama berewe te, ono i ayámba rimoro nga Abarayama; bambiko mi asá ro ni ba fu rimbasa arikaaboro.

⁶Mi azúgasi ro kpaima; mi akúsa arikaaboro rogo ro yo, abakindo ki kuru rogo ro yo.

⁷Mi anyákasa gi mozunga dagba rani na mo na dagba angbatungaro fuo ro ni nyenye mozunga dagba arika angbatungayo kindi, ya mi adú ni Mbori foro na fu angbatungaro fuo ro a.

⁸Gu ringara mo anata rogo mi afú he foro, na fu angbatungaro fuo ro, nga agu aringara nga Kanana dunduko. Si adú ni gayo ũkumbo nye anye kindi; mi ki du ni gayo Mbori.”

⁹Mbori ki ya fu Abarayama, “Wa du he tipa ro tigamo, mo aká kuti gi zungahe, oni na angbatungaro fuo ro a wa du arika angbatungayo kindi.

¹⁰Gere nga gi zunga he, nga gu oni ka ka kuti ni, dagba rani na oni na angbatungaro fuo ro: Agu akumba dunduko du dagba roni i ayéra yo.

¹¹I ayéra pito ti roni, si ki du ni ngbaanga mozunga du dagba rani na oni.

¹²Gu fogo gude dagba roni ra muambi, i ki yere ni; akumba dunduko dagba arika angbatungaroni kindi, gu ni i ka nibatika ni ku kpuroni, watadu oni angbe ni ni marã be auro adú nga dagba angbatungaroni ya.

¹³Gu ni i abátika ni ku kpuroni na gu ni oni angbé ni ni gaoni marã, i ka ayera yo. Gi mozunga ki du ti kpotoroni ni nyenye mozunga.

¹⁴Gu kumba nga zangayeratise nga gu ni i ayera nga pito ti ni ya, i akúsa ni akusa dagba gani aboro yo; bambiko ni basa pa gi mozunga.”

¹⁵Mbori ki ya fu Abarayama, “Wa du he tipa Sarai nga diaro, ka mo yámbu nga rimori nga Sarai ya, ono Sara nikangia rimori.

¹⁶Mi afú maku fu ri, ki fu kumbagude foro rogo ri yo ku ri he. Mi afú maku fu ri, ri ki du ni na fu arikaaboro; abakindo angbatunga aboro akúra rogo ri yo.”

¹⁷Abarayama ki tumusa ni kpakpuko ku sende ki mamu, ki ya ku kpotoko yo, “Ka agara kumba du 100, ni batika? Na Sara, wa du garãri 90, ri abátika gude?”

¹⁸Abarayama ki ya fu Mbori, “Ako! ka Yisamaere dú adu ni ungako ku bangiro!”

¹⁹Mbori ki ya, “Oõ, Sara nga diaro kina ri nikabatika kumbagude foro, mo ki yambu rimoko nga Yisaka. Mi anyákasa gi zungahe dagba rani na ko, si ki du ni nyenye mozunga fu angbatungako fuo ko.

²⁰Ono tipa Yisamaere, mi gi ga kpe. Mo ngére, mi afú maku fu ko; Mi azúgasi ko, ki ngeesi ko kpaima Ko abátika abazogo 12, mi ki sa ko ni bakere rikaaboro.

²¹Ono gi zungahe mi anyákasa pa ha na Yisaka, nga gu ko Sara nikabatika ko ni gi rago re ti gu garã nikaye.”

²²Ho ko ambu fura ni na ko, Mbori ki guari pati Abarayama.

²³Abarayama ki di wiriko nangia Yisamaere na agu yo dunduko i abatika yo rogo gako kporo na agu yo dunduko ko angbeke yo na gako marã, nga akumba dunduko dagba agu aboro nga ga ga Abarayama aborokporo, ko ki yere pito ti yo ni kina gu uru re wa Mbori agumba ha fu ko.

²⁴Garã Abarayama adu 99 ho i ayere pito ni ti ko.

²⁵Garã Yisamaere adu 13 ho i ayere pito ni ti ko.

²⁶Abarayama na Yisamaere nangia wiriko, i ayere yo ti kina gu uru sa re.

²⁷Akumba rogo gako kporo dunduko, nangia agu yo i abatika yo rogo gu kporo re, na agu yo ko angbeke yo ni marã be auro, i ayere yo wa sa na ko.