Read zande Bambata Pai 18 Bible Online

Bambata Pai 18 - zande bible

Bambata Pai 18

¹Yekova ki yugu tiko fu Abarayama pati agu agero nga ga Mamare, wa ko asungu ngbadimo bamburoko yo ho uru afaa ni.

²Ko ki tuka bangiriko ki ya ngere, were aboro biata ki rundu pati ko. Ho ko abi yo ni, ko ki guari pa ngbadimo bamburoko yo ki oro Ka gbia yo, ko ki tumusa ku sende,

³ki ya, “Mi nazungadi roni, abairare, si ngia ngba mi angba bangironi, ka oni gúari nga pati gaoni moyambu ya.

⁴I tú ime toni, oni zundu nduroni na ni, ki ongodi tii ngua yo,

⁵mi nandu ka dia bete riahe, oni ki ngarã be he, fuo gure oni ki susi ― wa ye oni kono du gaoni moyambu ni.” I ki ya, “Mo mángi he a wa gumba mo ho.”

⁶Abarayama ki rimi ni ipo ku bamburoko yo fuo Sara, ki ya fu ri, “Mo mbákadi fufurũ ngungo wa aritere 37 ni ipo, ki fio ho, ki zo kpokuta.”

⁷Abarayama ki oro fuo rimbasa abagara, ki yega na wene fogo wiri bagara, ki fu ru fu moyambu. Ni ki mbakadi ru ni ngarã.

⁸Ko ki di nzeme momunya, na momunya, na gu wiri bagara nga gu ru ko ambakadi ru, ki moi he bara bangiriyo; ko ki ru pati yo tigako tii ngua yo, i ki niri he.

⁹I ki ya fu ko; “Wari du Sara ni nga diaro?” Ko ki ya, “Oni ngére, ri du bambu roko yo.”

¹⁰Gu ko sa ki ya, “Ho kita ka da ni, mi akáraga tire ni rengo kono du mo ni, were diaro nga Sara ri abátika kumbagude.” Sara ki gi he ngbadimo bamburoko yo nadu ku gii ko yo.

¹¹Were Abarayama na Sara agbinza gbe, dungu agarã asaki yo gbe; kaza ade aima go ti Sara.

¹²Sara ki mamu ku kpotori yo, ki ya, “Awere wa du mi ni gbinza re wa du kumbami ni gbinza ko a, ka rago ngba ti re?”

¹³Yekova ki ya fu Abarayama, “Tipagine Sara nimamu ti ni, ki ya, ‘Mi abátika gude ni rengo, wa du mi ni gbinza boro?’

¹⁴Ka pai gasi Yekova? Ti kina gu rago du ni ringbisiringbisi he, mi akáraga tire kono du mo ni ho kita ka da ni. Sara ki batika kumbagude.”

¹⁵Sara ki ti kangu ki ya, “Mi amama nga te”; bambiko ri agunde agunde. Ko ki ya, “Oõ, ono mo nimamu.”

¹⁶Akumba ki guari yo, ki ngere ku Sodomo yo; Abarayama ki mongo nindu na yo nigasi yo ngba gene.

¹⁷Yekova ki ya, “Ka mi óko gu pai ti Abarayama nga gu mi amánga?

¹⁸wa Abarayama nikadu ni bakere rikaaboro ni nyanyaki he ni rengo, na arikaaboro zegino dunduko i adía maku kina rogo ko yo.

¹⁹Oõ, bambiko mi sia ko, ya ko nikaruga awiriko na gako aborokporo a fuo ko i niká kuti gu sino nga ga Yekova, ka manga rurupai ki nisapu angbanga nzunzu; ya Yekova rengbe na manga gu pai tu Abarayama ko akido pa ha fu ko.”

²⁰Yekova ki ya, “Wa du tawawa mbiko Sodomo na Amora ni bakere he gbe, na wa du gayo ingapai ni gbegberẽ he a gbe,

²¹mi azórã awere ki bi he, si ngia i namanga pai rengbe na gu tawawa nga gu naye kono du mi ni; si ngia wo te, mi aína ha aina.”

²²Agu akumba ki karaga tiyo re yo, ki ndu ku Sodomo yo; ono Abarayama aru bara bangiri Yekova kindi.

²³Abarayama ki mbedi, ki ya, “Mo amongo gbárasi ruru aboro na gbegberẽ aboro a?

²⁴Ka agu yo du rogo gu bakporo re 50 ni ruru yo, mo agbárasa yo ka mo ahé nga gu ba re mbiko gu ruru aboro 50 re du rogo ho ya?

²⁵Si túrú aturã ti ro ka manga wo, nga mongo gbarasi ruru aboro na gbegberẽ aboro, ya ruru aboro ka du wa gbegberẽ aboro! Túru gu pai re aturã ti ro! Ka Basapungbanga zegino dunduko mángi nga gu pai ru aru te?”

²⁶Yekova ki ya, “Ka mi bí ruru aboro 50 adomo yo, mi ahe gu bakporo re dunduko ibiko yo.”

²⁷Abarayama ki karaga ha ki i, “Ako, mo ngére mi nyakasi pa tire ka ira na Gbia wa du mi nga kina nvutu na uke.

²⁸Na ka i kpá bisue ti agu yo du ni aru yo 50, mo agbárasa gu bakporo re ibiko kpa yo bisue?” Ko ki ya, “Ka mi í yo yo 45, mi agbárasa nga ha te.”

²⁹Ko ki karaga ha fu ko berewe ki ya, “Na wa ka bí yo yo 40?” Ko ki ya, “Tipa agu yo ka du yo 40 re mi amánga nga ha te.”

³⁰Ko ki ya, “Ako Gbia, ka mo zíngi nga ya, mi gumba pai foro. Na wa ka i bí yo yo 30?” Ko ki ya, “Ka mi bí yo yo 30, mi amánga nga ha te.”

³¹Ko ki ya, “Mo ngére, mi nyakasi pa tire ka fura na Gbia. Na wa ka bí yo yo 20.” Ko ki ya, “Tipa agu yo ka du 20 re mi agbárasa nga ha te.”

³²Ko ki ya, “Ako Gbia, ka mo zíngi nga ya, mi gúmba pai foro berewe bara sa. Na wa ka i bí yo yo bawe.” Ko ki ya, “Tipa agu yo ka du yo bawe re mi agbárasa nga ha te.”

³³Ho Yekova ambu fura ni na Abarayama; ko ki ga. Abarayama ki karaga tiko ku kporo yo.