Read zande Bambata Pai 19 Bible Online

Bambata Pai 19 - zande bible

Bambata Pai 19

¹Agu amaraika naadu ue re i ki da ku Sodomo yo nyemu; Roto ki sungu ngbadimo Sodomo yo. Roto ki bi yo, ki guari ka ndu ka gbia yo. Ko ki tumusa ni kpakpuko ku sende,

²ko ki ya, “Were abairare, oni ngére, mi zúngadi roni, oni kpára ku gaoni moyambu no, ki sungu no ni gi yuru re, ki zundu nduroni. Ngbatutu wiso oni ki guari ka ga.” I ki ya, “Wa sa te; ani nikaongoda yuru sasasa kina ngba bagene yo.”

³Ko ki nidari yo kindi; si du i ki danga na ko, ko ki rimi ku dimo kpuko yo. Ko ki mbakadi wene riahe tipa yo, ko ki zo kpokuta naadu nga na agbooro ti ni ya, i ki ri he.

⁴Ono mbata i nikandu ka pi, akumba bakporo dunduko nangia aboro Sodomo, ki ye rogo arago bakporo yo du, ki ke bambu kirikiri, aparanga na gbinza yo a.

⁵I ki yambu Roto ki ya fu ko, “Wari du agu akumba ni niye ku kpuro yo ni gi yuru re? Mo kúsi yo ku zegi no fu rani, ya ani mángi pa borose na yo.”

⁶Roto ki kuru fuo yo ku zegi yo, ki kisi kpuguru gii ko yo,

⁷ko ki ya fu yo, “Mi zúngadi roni, awirinami, ka oni mángi nga gbegberẽ wo ya.

⁸Oni bí awere, mi na awire nga ngasu ade ue; mi yé na yo ku zegi no fu roni, oni ki mangi fu yo a wa rengbe he bangironi; ono ka oni mángi nga pai ti agi akumba re ya, mbiko wa ye yo ka sunga rogo gi kporo.”

⁹Ono i ki ya, “Mo gúari ku sa yo!” I ki ya, “Gi kumba re niye ka sunga no, ko nikangia basapungbanga! Awere ani nikamanga gbegberẽ foro ki susi yo.” I ki tutura gu kumba nangia Roto ni zuu, i ki mbedi na kua kpuguru.

¹⁰Ono akumba ataĩ beyo ki di Roto fuo yo ku dimo yo, ki kisi kpuguru berewe.

¹¹I ki fu vurari fu agu akumba nadu zegi yo pa ngbadimo, wa i adu dunduko, rukutu yo na kikindigi yo, were i ambu ambu na pa bi ngbadimo.

¹²Agi akumba ki ya fu Roto re, “Kura gamo aboro erẽ berewe? Akumba ku awiro, na awiro nga akumba, na awiro nga ade, na agu aboro dunduko nga gamo yo rogo bakporo? Mo kúsi yo rogo gi ba re;

¹³bambiko ani nikagbarasa gi rago re, bambiko tawawa kuti aboro gi bakporo re moi pai amaa ku bara bangiri Yekova, Yekovakikedi rani ani gbárasi he.”

¹⁴Roto ki kuru ku zegi yo ki gumba pai fu agu yo pazua awiriko, ki ya, “Oni mó ku ari ki guari rogo gi rago re; bambiko Yekova nikagbarasa gi bakporo re.” Ono si adu bangiriyo wa ko nananga yo ananga.

¹⁵Ho rago agira ni, amaraika ki ta zina he fu Roto, niya, “Mo gúari, ki rogo agu awiro ue nga ade du erẽ na diaro, mo ka kpi rogo gu gbigbitapai nga ga gi bakporo re.”

¹⁶Ono ko aima aima; si du akumba ki zi ko ti beko, ko na diako na awiriko ue nga ade, wa Yekova aini pai fu ko gbe. I ki kusi ko ki mbu ko gii bakporo yo ku zegi yo.

¹⁷Ho i akusi yo ni ku zegi yo, i ki ya, “Mo óro ka bata ni ungaro; ka mo ngére nga ku sa no ya, ka mo nyé nga rogo kpasakpasa rago a ya; mo óro ku ri bagangara yo, mo ka kpi akpi.”

¹⁸Roto ki ya fu yo, “Ako, abairare, ka si dú nga wo ya;

¹⁹were, oni ngére, wa bi vururoni undahe be roni na wa kiisi oni gaoni inapai fere ni batasa ungare; ka mi óro nga ku ri bagangara yo te, gbegberẽ pai ka dusia re, mi ki kpi.

²⁰Were, oni ngére, gi bakporo du re si mbedi tipa oto koyo, si du ni toni he. Ako oni ídi he fere mi óro koyo ― ungare ki bati! ― a nga toni he nga ha te?”

²¹I ki ya fu ko, “Mo ngére, ani idi gi pai re foro a, ya ani agbárasa nga gu bakporo gumba mo paha te.

²²Mo ípisi tiro ka ora koyo; bambiko ani arengba nga na manga pai mbata fu da mo koyo te.” Si du i aya ti ni ti gu bakporo re, Soara.

²³Uru aima kura ki dakpa mbata Roto nikada ku Soara yo.

²⁴Yekova ki kedi baruti na we si na ku ri Sodomo na Amora, si aye yo du Yekova ni ngbangbaturũ yo.

²⁵Ko ki gbarasi agu abaakporo re, na kpasakpasa rago dunduko, na agu aboro dunduko naaraka rogo agu abaakporo re, na agu ahe naakura ti sende.

²⁶Ono dia Roto angere ku sa yo wa ri adu ku gii ko yo, ri ki sa tiri ni mbia tikpo.

²⁷Abarayama ki ndu ngbatutu wiso ku ho ko aru ni bara bangiri Yekova;

²⁸ko ki ngere ku Sodomo yo na ku Amora yo, na koyo du ringara kpasakpasa rago ni dunduko, ko ki bi ngimi ringara si nigundu agunda ku ari wa kina ngimi gbigiwi.

²⁹Si ki ta du wa gere, ho Mbori agbarasi agu abaakporo ni re naadu rogo kpasakpasa rago, Mbori ki tingidi pa Abarayama, ki kusi Roto rogo gu gbarasarago re, ho ko agbarasi agu abaakporo ni re Roto anaraka rogo ho.

³⁰Were Roto ki kuru Soara yo, ki niraki abaagangara yo na awiriko ue nangia ade fuo ko, mbiko ko agunde agunde be raka Soara yo; ko na awiriko ue nangia ade i ki niraki rogo simbia.

³¹Unvuru ki ya fu tameri, “Barani nga gbinza boro, a nga kumba ho nikadu ni kumba fu rani auru kpotosende a wa aboro namanga zegino dunduko te.

³²Mo yé, ani sósodi barani ko mbiri imekakue, ani ki dasi na ko, ya ngbatunga barani du adu ho kindi.”

³³Ti kina gu yuru re i ki sosodi bayo ko mbiri imekakue. Unvuru ki rimi fuo ko, ki dasi na bari; ka ko aina nga ho ri api ni na ho ri aguari ni ya.

³⁴Si ki ta du wa gere fuo girarago, unvuru ki ya fu tameri, “Mo ngére, areme yuru mi nira na buba; ani sósodi ko ko mbiri imekakue ni gi yuru areme re a. Mo ki rimi fuo ko ki dasi na ko, ya ngbatunga barani du adu ho kindi.”

³⁵Ti gu yuru re berewe i ki sosodi ko ko mbiri imekakue; tame ki guari, ki dasi na ko; ka ko aina nga ho ri api ni na ho ri aguari ni ya.

³⁶Were awiri Roto ue ki du na mobara mbiko bayo.

³⁷Unvuru ki batika kumbagude ki yambu rimoko nga Moaba; ko nga tita aMoabo ki da ku awere.

³⁸Tame ki batika kumbagude a, ki yambu rimoko nga Bene-ami; ko nga tita awiri aAmono ki da ku awere.