Read zande Bambata Pai 20 Bible Online

Bambata Pai 20 - zande bible

Bambata Pai 20

¹Abarayama ki guari yo ki ndu ku rogo gu ringara nga Negebe, ko ki niraki dagba Kadesa na Sura; ki sungu Gerara yo.

²Abarayama ki ya ti diako nangia Sara, “Dawire nga ri,” Abimereke nangia bakindo Gerara ki kedi sunge ki di Sara.

³Ono Mbori aye koyo du Abimereke ni rogo musumo yuru, ki ya fu ko, “Mo ngére, mo wa kina kpikpi boro bambiko gu de di mo ri, mbiko dia kumba du nga ri.”

⁴Were Abimereke ambeda nga na ri te; si du ko ki ya, “Gbia, mo aimo gu rikaaboro nga aboro wenesa?

⁵A nga kina ko naya fere ni tiko, ‘Dawire du nga ri,’ te? Kina ri ki ya ni tiri a, ‘Kawire nga ko.’ Mangi mi gere na ruru ngbadure wa boro wenesa.”

⁶Mbori ki ya fu ko rogo musumo, “Rengo, mi bi he ya mo mangi gere na ruru ngbaduro, si du mi ki banda ro a ti manga ingapai kuti re. Si du mi aida nga ha ti ni foro mo mbedi na ri ya.

⁷Si du mo káraga dia gu kumba re fu ko; mbiko nebi nga ko, ko ki kpari kpe tipa ro, mo ki nye ni ungaro. Ono ka mo akáraga nga ri fu ko ya, mo akpí akpi, oni, na gamo aborokporo dunduko a.”

⁸Abimereke ki guari ngbatutu wiso, ki yambu gako amoyambu dunduko, ki gumba pa agi apai re dunduko fu yo; i ki nigunde agunde.

⁹Abimereke ki yambu Abarayama, ki ya fu ko, “Gini pai mangi mo fu rani were? Gini gbegberẽ pai mangi mi kuti ro, moi mo bakere ingapai ti ni ku ri re na ku ri gi ngbi a? Mo mangi agu apai kuti re nga gu ka i amanga nga ha ya.”

¹⁰Abimereke ki ya fu Abarayama, “Gini pai mo aberẽ he, wa mo amangi gi pai re?”

¹¹Abarayama ki ya, “Bambiko mi aberẽ he tigimi ya, Gunde ti Mbori rogo gi rago re wa sa te, i aímo re tipa diare.

¹²Ono dawire nga ri ni rengo, nga wiri vuru buba, ono wiri vuru nina te; mi ki di ri ni diare.

¹³Si ki ta du wa gere, ho Mbori amerẽsi re ni ti ga buba kporo, mi aya fu ri, ‘Gere nga gu ga weneringise mo ka ayúgo fere; rogo agu arago dunduko ani ka ada rogo ho, mo niyá ti re, Kawire nga ko.’ ”

¹⁴Abimereke ki rogo akandoro na abaabagara, na akanga nangia akumba na akanga nga ade, ki fu yo fu Abarayama, ki karaga diako fu ko nangia Sara a.

¹⁵Abimereke ki ya, “Mo ngére, gi ringara dunduko du barangba ro; mo niráki ho ngba ti ro.”

¹⁶Ko ki ya fu Sara, “Mo ngére, mi fu marã feda 1,000 fu kawiro; si du wa ũkisa bangirise fu agu yo dunduko du na mo; si di pai ri ro ku bangiri aboro dunduko.”

¹⁷Abarayama ki kpari fu Mbori; Mbori ki husi Abimereke, na diako, na gako akanga nangia ade, i ki batika agude.

¹⁸Bambiko Yekova aima kisa rukumbu agu yo akisa dunduko nadu rogo ga Abimereke kporo tipa Sara dia Abarayama.