Read zande Bambata Pai 21 Bible Online

Bambata Pai 21 - zande bible

Bambata Pai 21

¹Yekova ki ye koyo du Sara ni a wa ko agumba ha, Yekova ki mangi fu Sara a wa ko akido pa ha.

²Sara ki du na mobara, ki batika kumbagude fu Abarayama ho ko adu ni ni gbinza ko, ti kina gu rago nga gu Mbori agumba pa ha fu ko.

³Abarayama ki yambu rimo gu wiriko nga gu ko Sara abatika ko fu ko, nga Yisaka.

⁴Ho rame Yisaka adu ni muambi, Abarayama ki yere wiriko nangia Yisaka wa Mbori arugu ko na ni.

⁵Were agarã Abarayama adu 100 ho i abatika wiriko ni nangia Yisaka.

⁶Were Sara ki ya, “Mbori ba mongo ti re; agu aboro dunduko ka agia ha, ani amáma amama na yo.”

⁷Ri ki ya, “Da ka agumba ha fu Abarayama ki ya, Sara aága agude? Ono ti rago gbinza ko mi batika wiriko nga kumbagude.”

⁸Gude ki sono, ki mbu ha mai; Abarayama ki mangi bakere pumbo ni gu rago Yisaka ambu ha mai.

⁹Sara ki bi wiri Agara nangia boro Ezipeta, nga gu ko ri abatika ko fu Abarayama, ko nisangi pai.

¹⁰Si du ri aya ti ni fu Abarayama, “Mo dó gi kanga re ku sa yo na wiriri; bambiko wiri gi kanga re adia nga kumbo na wire nga Yisaka te.”

¹¹Gu pai re ki gberẽ ti Abarayama gbe tipa wiriko.

¹²Mbori ki ki ya fu Abarayama. “Ka gu pai rúngosi nga ro tipa wiro na ga kanga re ya. Gu pai Sara ka gumba ha foro dunduko, mo ídi he ki mangi kina ha, bambiko kina rogo Yisaka yo i ka yamba ngbatungaro ni.

¹³Mi asá wiri kanga ni rikaaboro a, bambiko ko nga wiro a.”

¹⁴Abarayama ki zingi ngbatutu wiso, ki di riahe na mangu ime, ki fu he fu Agara, ki moi he pagõri, na wiriri ki do ri. Ri ki guari, ki ningbuo angbuo rogo gu ngbakungba nga Bera-saba.

¹⁵Ho ime anyasi ni mangu yo, ri ki pigi wiriri di nzereme yegbende ngua.

¹⁶Ri ki ndu, ki sungu tuturũ pati ko toni, dagba yo ki du wa ka i ru ho ka ba siida si ki da yo; bambiko ri aya, “Ka mi bí nga wire na kpio ya.” Ri ki sungu tuturũ pati ko toni. Gude ki nita wawa ki nikpari ni aume.

¹⁷Mbori ki gi kpe gude; ga Mbori maraika ngbangbaturũ yo ki yambu Agara ki ya fu ri, “Agara gini pai namanga ro? Ka mo gúnde nga ya; bambiko Mbori ima gia kpe gude ho du ko ni.

¹⁸Mo gúari ki aka gude ku bero, bambiko mi asá ko ni bakere rikaaboro.”

¹⁹Mbori ki za bangiriri, ri ki bi gugaabi. Ri ki ndu, ki hisi mangu na ime, ki fu he fu gude ko mbiri he.

²⁰Mbori ki du na gu gude re, ko ki sono; ki niraki kina ngbakungba yo, ki du ni ba baaguanza.

²¹Ko ki niraki rogo gu ngbakungba nga Parana. Nako ki di de fu ko ringara Ezipeta yo.

²²Si ki ta du wa gere, aAbimereke na Fikora gako barutirivura ki gumba pai fu Abarayama, ki ya, “Mbori na mo rogo agu apai dunduko mo amanga ha.

²³Awere tie, mo zúnga he fere erẽ ni rimo Mbori, ya mo abírika nga re watadu awire na atitarea te, ono wa mi amangi foro wenengaĩ, kina wo mo ka manga fere na fu gu ringara ho mo asungu ni.”

²⁴Abarayama ki ya, “Mi azúnga he azunga foro.”

²⁵Ono Abarayama ki za Abimereke tipa gu guga ga Abimereke amoyambu adi he ni zuu.

²⁶Ono Abimereke ki ya, “Mi aina nga gu ni namangi gi pai te re; mo ape nga paha fere a te, ka mi agia nga paha ki da ku areme a ya.”

²⁷Abarayama ki di akandoro na abaabagara ki fu ra fu Abimereke, i ue ki mangi zungahe dagba yo.

²⁸Abarayama ki kparaka wiri anaakandoro saba ku bani.

²⁹Abimereke ki ya fu Abarayama, “Gini pai kparaka mo gi wiri anaakandoro saba ku bani ti ni re?”

³⁰Ko ki ya, “Mo rogo agi awiri anaakandoro saba re ni dezirepai ya mi nage gi guga re.”

³¹Si du ko ayambu rimo gu ba ti ni re nga Bere-saba; bambiko yo i ue azunga he ni dagba yo.

³²Were i ki mangi gayo zungahe dagba yo Bera-saba yo. AAbimereke ki guari na Fikora gako barutirivura, i ki karaga tiyo ku rogo ga aFereseto ringara.

³³Abarayama ki rũ ngua nga abanza Bera-saba yo, ki kpari ti rimo Yekova nga nyenye Mbori.

³⁴Abarayama ki niraki rogo gu ringara nga ga aFereseto tipa dungu rago.