Read zande Bambata Pai 23 Bible Online

Bambata Pai 23 - zande bible

Bambata Pai 23

¹Were, garã Sara adu 127; gere nangia agarã Sara.

²Sara ki kpi Kiriyata-aruba yo (si sa na Eburone) ringara Kanana yo. Abarayama ki rima ku dimo yo, ki nikpari ni aume ki nita ngbaduko tipa Sara.

³Abarayama ki guari pati kangbari, ki gumba pai fu aEto, ki ya,

⁴“Kungba boro nga mi ninaraka dagba roni; oni fu bakpisida aboro fere dagba roni ni gimi, ya mi kpísidi gi kangba ti bangire ku sa yo.”

⁵AEto ki karaga pai fu Abarayama, ki ya,

⁶“Ako bairarani, mo gí sangbarani, mo nga bakere bazogo dagba rani. Mo kpísidi ga kangba rogo gu gaani bakpisida aboro sa ngba susi; a nga gu ni sa dagba rani nikaka na gani bakpisida aboro be ro, watadu za ro tipa kpisida ga kangba rogo ho te.”

⁷Abarayama ki guari ki tumusa fu aboro gu ringara re, nangia aEto.

⁸Ko ki fura na yo ki ya, “Ka oni idi he fere mi kpisidi gi kangba ti bangire ku sa yo, oni gí sangba re, ki zúngadi Efurona nga wiri Soara tipa re,

⁹ya ko fú gu gako simbia fere nga Makepera, nga gu du mburu gako ati yo. Ko fú he fere tipa genoho nzunzu ku bangironi ni gi bakpisida aboro.”

¹⁰Were Efurona asungu dagba aEto; Efurona boro Eto ki karaga pai fu Abarayama ku bangiri aEto, nga agu yo dunduko nanarima ti ngbadimo gako bakporo, ki ya,

¹¹“Oõ, bairare, mo gí sangbare; gu ati re mi fu he foro na gu simbia du rogo ho a; mi fu he foro; mi fu he foro ku bangiri awiri ngbatungare; mo kpísidi ga kangba rogo ho.”

¹²Abarayama ki tumusa ku sande bara bangiri aboro gu ringara re.

¹³Ko ki ta gumba pai fu Efurona ku bangiri aboro gu ringara re, “Mi nakpara foro, ka mo idi he, mo gí sangbare; mi afú geno gu ati fu roni re; mo di he be re, mi ki kpisidi gi kangba rogo ho.”

¹⁴Efurona ki karaga pai fu Abarayama, ki ya,

¹⁵“Bairare, mo gí sangbare; gu bete rago du genoho nga asekere feda 400, gini nga ha dagba rani na mo? Si du mo kpísidi ga kangba tie.”

¹⁶Abarayama ki gi gu pai re ngba Efurona; Abarayama ki ringbisi baroã feda fu Efurona mbembedi na akiro bisue nga asekere feda 400 kuti sino babagiahe ti gu rago re, nga gu Efurona aringbisi he ku bangiri aEto.

¹⁷Si du ga Efurona ati nadu Makepera yo, ku uroyo pati Mamare, ati gbiakuti gu simbia nadu rogo ho na agu angua dunduko nadu rogo ati, nga gu nadu rogo ho dundu ko, si ki du

¹⁸ni boro ga Abarayama ahe ku bangiri aEto nga agu yo nanarima ti ngbadimo ga Ete bakporo.

¹⁹Fuo gere Abarayama ki kpisidi Sara nangia diako rogo gu simbia nadu rogo gu ati nangia Makepera ku uroyo pati Mamare (si sa na Eburone), ringara Kanana yo.

²⁰Were ati na gu simbia nadu rogo ho aEto abagi he nzunzu fu Abarayama si du ni gako tipa bakpisida aboro.