Read zande Bambata Pai 24 Bible Online

Bambata Pai 24 - zande bible

Bambata Pai 24

¹Were Abarayama adu ni gbinza ko, dungu agarã asaki ko gbe; Yekova anafu maku fu Abarayama rogo apai dunduko.

²Abarayama ki ya fu gu vuruko, nangia baira gako kporo, ki nibanda gako ahe dunduko, “Mi zúngadi ro mo moi bero ku tii ndure yo,

³mi ki rugu ro mo zúnga he ti rimo Yekova, nga gu Mbori nga ga ngbangbaturũ ko nga ga kpotosende ko a, ya mo adía nga de dagba awiri aboro Kanana nga agu yo sungu mi dagba yo, fu wire wa sa te.

⁴Ono mo andú kina ku rogo gi ringara yo, ku dagba agumere, ki di de fu wire nga Yisaka.”

⁵Vuruko ki ya fu ko, “Na wa ka de aída nga ka pe fuo re ku rogo gi ringara re ya; mi andú na kina wiro berewe ku rogo gu ringara mo aye rogo ho?”

⁶Abarayama ki ya fu ko, “Mo gí he ka mo ndú nga na wire berewe koyo te.

⁷Yekova nga gu Mbori nga ga ngbangbaturũ ko, nga gu ko nadi re rogo ga buba kporo, rogo gu ringara i abatika re rogo ho, ko agumba pai fere ki zunga he fere, ki ya, ‘Mi afú gi ringara re fu angbatungaro.’ Ko akéda gako maraika ku mbata yo foro, mo ki di de kina yo fu wire.

⁸Ka de aída nga ka pe fuo ro ya, mo ki bati be ga zungahe fere; ono ka mo ndú nga na wire koyo berewe te.”

⁹Vuruko ki moi beko ku tii ndu Abarayama yo nangia bairako, ki zunga he fu ko tipa gi pai re.

¹⁰Vuru Abarayama ki rogodi akameri bawe dagba agu ra nadu be bairako, ki guari na ngbatunga ahe dunduko be ko nadu be bairako du ni wene he ki susi. Ko ki guari, ki ndu ku Mesopatomia yo, ku rogo gu bakporo yo nangia ga Naora.

¹¹Ko ki rugu akameri, ami kuku pati guga pangba bakporo zegi yo nyemu, ti gu rago ade naandu ka tuda ime.

¹²Ko ki ya, “Ako Yekova, nga gu Mbori nga ga bairare ko nga Abarayama, mi nazungadi ro mo ini pai fu bairare nga Abarayama, ki idi mamu mángi re areme.

¹³Mo ngére, mi naru pati guga, awiri aboro bakporo nga ade naye ka tuda ime.

¹⁴Mo ídi he ya gu paranga de mi ka ya fu ri, ‘Mi nazungadi ro, mo zogo ga kambu mi mbíri nga ime,’ ri ki karaga ha ki ya, ‘Mo mbíri he, mi afú ime fu gamo akameri a’ ― mo ídi he ya ri du ni gu ri sia mo ri fu vururo nga Yisaka. Mi ki ini he wo ya mo ini pai fu bairare.”

¹⁵Mbata ko nikadigisa fugo, oni ngére, Rebeka ki kuru na gari kambu pagõri, nga gu ri Betuere abatika ri, nangia wiri Mireka, Mireka angia dia Naora, Naora angia wiriba Abarayama.

¹⁶Gi paranga de re ri adu adu mbuyumbuyu, ni ngasu de, ka kumba aina nga ri ni de mbata ya. Ri ki zorõ ku pati guga, ki hisi gari kambu, ki kuru yo.

¹⁷Moyambu ki oro ka ngbisa ri, ki ya, “Mi nakpara foro, mo fú ime fere toni rogo ga kambu mi mbíri he.”

¹⁸Ri ki ya, “Bairare mo mbíri he”; ri ki zogo gari kambu ni ipo ku beri, ki fu he fu ko ko mbiri he.

¹⁹Ho ri afu ime ni fu ko, ko ki mbiri he, ri ki ya, “Mi atú he fu gamo akameri a, daho ami ka mbira ha ni ki mbiki.”

²⁰Ri ki oro zaza ki uka ime rogo gari kambu ku bakurungbu yo, ri ki oro berewe ku pati guga yo ka tu he, ri ki tudi he tipa gako akameri dunduko.

²¹Kumba ki dua bangiriko ti ri, ki ongo kii ka ruga tiko na ni si ngia Yekova fu mamu tipa gako nduge, watadu wo te.

²²Ho akameri anyasi mbira ime ni, kumba ki di tongo dahabu du baroãha wa bebere sekere, na abenge dahabu ue du baroãha wa asekere bawe, tipa ku beri yo,

²³ki ya, “Mi nazungadi ro, mo gúmba nga ha fere, wiri da nga mo? Ba ho rengbe tipa rani rogo ga bamo bambu ka ani ra rogo ho?”

²⁴Ri ki ya fu ko, “Wiri Betuere nga mi, ko nga wiri Mireka, ri abatika ko fu Naora.”

²⁵Ku ri gere, ri ki ya fu ko, “Kazimoru kina ho be rani, na riahe rengbe na bambu tipa ra rogo ho a.”

²⁶Kumba ki zogo riko ki irisi Yekova.

²⁷Ko ki ya, “Sambuahe dú fu Yekova, nga ga Abarayama Mbori nga bairare, naaka nga na gako inapai na gako yososopai be bairare ya. Na mi tigimi, Yekova angbe fere ku mbata yo ngba gene ku awirina bairare yo.”

²⁸Gi paranga de ki oro re ki gumba agi apai re fu ga nari aborokporo.

²⁹Kawiri Rebeka adu ho rimoko angia Rabana; Rabana ki oro koyo du gu kumba ni re, ku pati guga yo.

³⁰Ho ko abi tongo ni na abenge ti abe dawiriko, ki gi agu apai dawiriko agumba nga Rebeka, niya, “Wo poi gi kumba fere re”, ko ki ndu fuo gu kumba re; oni ngére, ko ki ru mbembedi pati akameri pati guga.

³¹Ko ki ya, “Mo yé nga kono, ga Yekova boro maku. Tipagine ru mo ti ni zegi yo? Bambiko mi ima mbakada bambu, na ba tipa akameri a.”

³²Si du gu kumba re ki rimi ku dimo yo; Rabana ki zadi gire ti akameri, ki fu kazimoru na riahe fu ko tipa akameri, na ime fu ko ko zundu nduko na ni na ndu agu aboro nadu fuo ko a.

³³I ki moi riahe ku bara bangiriko ko ri he; ono ko ki ya, “Mi arí nga he mbata te da kina ho mi ka gumba ndu gi pai ni.” Ko ki ya, “Mo gúmba nga ha.”

³⁴Ko ki ya, “Mi nga ga Abarayama moyambu.

³⁵Yekova afu maku fu bairare bakere gbe, ko du awere ni bakere boro; ko afu rimbasa akandoro fu ko na rimbasa abagara, na feda na dahabu, na amoyambu nga akumba na amoyambu nga ade, na akameri na adongi.

³⁶Sara nga dia bairare ki batika kumbagude fu ko ho ri adu ni ni gbinza ri; ko ki mbu agu ahe du be ko fu ko dunduko.

³⁷Bairare arugu re mi zunga he, ki ya, ‘Ka mo dí nga de fu wire dagba awiri aboro Kanana du mi rogo gayo ringara wa sa ya;

³⁸ono mo ndú ku buba yo na koyo du agumere ni, ki di de yo fu wire.’

³⁹Mi ki ya fu bairare, ‘Na ka de aída nga ka pe fuo re ya.’

⁴⁰Ko ki ya fere, ‘Yekova, nga gu ko mi nara fu ko, ko akéda gako maraika na mo mamu ki du foro ti ga nunguro; mo ki di de fu wire dagba agumere na dagba ga buba aborokporo.

⁴¹Si du mo ki bati tie be ga zungahe fere ho mo ka da ni ku agumere yo; ka i ka na ri be ro, mo ki bati be ga zungahe fere.’

⁴²“Mi nida areme pati guga. Mi ki ya, ‘Ako Yekova, nga ga Abarayama Mbori nga bairare, ka mo idi he ya mamu du fere ti gi nunguro;

⁴³mo ngére, mi ru pati guga; mo ídi he ya gu degude ka ye ka tu ime, mi ka ya fu ri, “Mi nazungadi ro mo fú ime fere toni rogo ga kambu mi mbíri he,”

⁴⁴ri ki ya fere, “Mo mbíri he, mi ki tu he tipa gamo akameri a”, mo ídi he ya ri du ni gu de sia Yekova ri fu wiri bairare.’

⁴⁵“Mbata mi nikanyasa kparakpe ku kpotore yo, mo ngére, Rebeka ki kuru na gari kambu pagõri; ri ki zorõ ku pati guga, ki tu ime. Mi ki ya fu ri, ‘Mi nazungadi ro, mo idi he mi mbiri ime.’

⁴⁶Ri ki zogo gari kambu ni ipo pagõri, ki ya, ‘Mo mbíri he, mi afú ime fu gamo akameri ami mbiri he a.’ Were, mi ambiri he, ri ki fu ime fu akameri a ami mbiri he.

⁴⁷Mi ki sana ri, ki ya, ‘Wiri da nga mo?’ Ri ki ya, ‘Wiri Betuere, ko nga wiri Naora. Mireka abatika ko fu ko.’ Si du mi ki moi tongo ku õri yo na abenge ku beri yo.

⁴⁸Mi ki zogo rire ki irisi Yekova ki fu sambuahe fu Yekova nga ga Abarayama Mbori nga bairare, Yekova angbe fere ku mbata yo ngba nzunzu gene mi di kina wiri agume bairare fu wiriko.

⁴⁹Ka si du wa oni nikamanga fu bairare wenengaĩ ni rengo oni gúmba ha fere; ka si adu nga wo ya, oni gúmba ha fere; mi sá tire ku kumbabe yo watadu ku garebe yo.”

⁵⁰ARabana na Betuere ki karaga ha ki ya, “Gi pai re ye he yo du Yekova ni; ka ani rengbe nga na gumba pai foro ni gbegberẽ he watadu ni wene he a te.

⁵¹Mo ngére, Rebeka du bara bangiro re, mo dí ri ki ga, ri ki du ni dia wiri bairaro, a wa Yekova agumba ha.”

⁵²Si ki ta du wa gere, ho ga Abarayama moyambu agi gayo apai ni, ko ki tumusa ku sende fu Yekova.

⁵³Moyambu ki kusi afongo feda na afongo dahabu, na aroko, ki fu he fu Rebeka. Ko ki fu gamahe kii genoho akia gbe fu kawiriri na fu nari a.

⁵⁴I ki niri riahe ki nimbiri he, na agu aboro nadu na ko, i ki ra kina ho ni gu yuru re. Ho i azingi ni ngbatutu wiso, ko ki ya fu yo, “Oni ásia re, mi káraga tire koyo du bairare ni.”

⁵⁵Kawiriri na nari i ki ya, “Mo ídi he ya gi paranga de re sungu na ani ngbutuko, ka rame asúsa nga bawe ya; fuo gure ri ki ga.”

⁵⁶Ko ki ya fu yo, “Ka oni ímasi nga re ya, wa Yekova naima unda re ngba gi gene; oni ásia re mi ga koyo du bairare ni.”

⁵⁷I ki ya, “Ani ayámba gi paranga de re ka gia pai ngba ri.”

⁵⁸I ki yambu Rebeka ki ya fu ri, “Oni naga na gi kumba re?” Ri ki ya, “Ani naga na ko.”

⁵⁹I ki asia Rebeka nangia dawiriyo na nambutiri, na ga Abarayama moyambu na gako akumba.

⁶⁰I ki fu maku fu Rebeka, ki ya fu ri, “Dawirani, mo dú ni na fu aboro akutu na akutu bawe a; ngbatungaro nidi gu rago adia nga ga asogoyo!”

⁶¹Rebeka ki guari, na gari paranga ade, i ki ndu ri akameri, ki nipeke fuo gu kumba re. Si du moyambu ki di Rebeka ki ga na ri.

⁶²Yisaka ki ye ngba gene Bera-rai-roi yo, bambiko ko anaraka rogo gu ringara du ku Negebe yo.

⁶³Nyemu ho uru adega ni Yisaka ki ndu ku ati yo ka berã pa apai, ko ki tuka bangiriko, ki ya ngere, ki bi akameri ami niye.

⁶⁴Rebeka ki tuka bangiriri, ho ri abi Yisaka ni, ri ki gita ri kameri yo,

⁶⁵ki ya fu moyambu, “Gini kumba nga gi ko nata rogo ati re ka ngbisa rani?” Moyambu ki ya, “Bairare du.” Ri ki di gari roko dadari ki dadi tiri na ni.

⁶⁶Moyambu ki gumba agu apai dunduko fu Yisaka ko amangi he.

⁶⁷Yisaka ki ye na ri ku rogo ga nako bamburoko yo, ko ki di Rebeka, ri ki du ni diako. Ko ki nikpi nyemu ri gbe. Yisaka ki niwasa awasa fuo kpio nako nangia Sara.