Read zande Bambata Pai 25 Bible Online

Bambata Pai 25 - zande bible

Bambata Pai 25

¹Abarayama ki di kura de rimori angia Ketura.

²Ri ki batika aZimerana, Yokesana, Medana, Midiana, Yisebaka na Sua.

³Yokesana ki batika aSeba na Dedana. Awiri Dedana ki ngia aAsuro, na Retusima, na Rumima.

⁴Awiri Midiana angia Efa, Efere, Anoka, Abida, na Ereda. Agi yo re dunduko nangia atita Ketura.

⁵Abarayama ki fu agu ahe nadu be ko dunduko fu Yisaka.

⁶Ono Abarayama afu agamahe fu awiri agu adebadia nadu be ko, ki dandi yo ku uroyo pati Yisaka nangia wiriko, ku rogo gu ringara nadu ku uroyo, kina ho ko adu ni ni ungako.

⁷Garã Abarayama du were wa ko adu ni ungako, ko araki garã ki du 175.

⁸Were rame Abarayama ki rengbe, ko ki kpi wa ko aima gbe, kuru gbinza kumba nangia ko, garãko ange ange ki susi. Toroko ki ga koyo du atitako ni.

⁹AYisaka na Yisa maere nangia awiriko, i ki kpisidi ko rogo gu simbia nga Makepera, du rogo gu ati nangia ga Efurona wiri Soara boro Eto, ku uroyo pati Mamare.

¹⁰Si nangia gu ati Abarayama angbe he be aEto. Si i akpisidi Abarayama rogo ho, pati Sara nangia diako.

¹¹Fuo kpio Abarayama Mbori ki fu maku fu Yisaka, nangia wiriko. Yisaka ki niraki Bera-rai-roi yo.

¹²Were agi yo re nga angbatunga Yisamaere, nangia wiri Abarayama, Agara nabatika ko fu Abarayama. Ri angia boro Ezipeta, nangia ga Sara kanga.

¹³Gere nga rimo awiri ĩ isamaere, na arimoyo wa angbatunga yo adu: Bambata wiri Yisamaere angia Nebayota; fuo ko Kedara, Adabere, Mibesama,

¹⁴Misema, Duma, Masa,

¹⁵Adada, Tema, Yetura, Nafisa, na Kedema.

¹⁶Agi yo re nga awiri Yisamaere, na arimoyo a wa gayo akporo adu na gayo abataya. I adu wa abazogo 12 a wa angbatungayo adu.

¹⁷(Agarã Yisamaere adu nga 137; gako rame ki rengbe, ko ki kpi. Toroko ki ga koyo du atitako ni.)

¹⁸I ki niraki tona Avira yo ki da ku Sua yo, nangera ku Ezipeta gene ku Asura yo; Yisamaere anaraka mbembedi na awirinako dunduko.

¹⁹Were agi yo re nga angbatunga Yisaka, nangia wiri Abarayama: Abarayama nabatika Yisaka,

²⁰garã Yisaka adu 40 ho ko adi Rebeka ni ni diako. Rebeka nangia wiri Betuere boro Suria naadu Padana-arama yo, ri nangia dawiri Rabana nangia boro Suria.

²¹Yisaka ki zúngadi Yekova tipa diako, mbiko ri angia irazangada; Yekova ki gi gako kpe, Rebeka nangia diako ki du na mobara.

²²Agude ki nita kpata dagba yo vuri yo; ri ki ya, “Ka si du were, tipagine mi akpi nga ti ni ya?” Si du ri andu ti ni ka sana Yekova.

²³Yekova ki ya fu ri, “Rikaaboro ue du rukumburo yo, ngbatunga aboro ue adú ni kparakakparaka yo mo aka vunga yo; ngbatunga boro sa adú ni nyanyaki he ti gu kura ha, unvuru ará fu tame.”

²⁴Oni ngére, ho rago batika ri arengbe ni, abi nadu vuri yo.

²⁵Gu bambata ko nakuru ko adu ni zamba ko, kpotoko ki du dunduko wa amuamu roko. I ki yambu rimoko nga Esau.

²⁶Fuo gure, tame ki kuru, beko ki zi gida Esau; i ki yambu rimoko nga Yakoba. Garã Yisaka adu 60 ho ri abatika yo ni.

²⁷Ho agude asono ni, Esau ki du ni nyanyaki bainibirĩ pa manga anya, bata nvuo yo nangia ko. Ono Yakoba ki du ni bayee boro ki nisungu rogo abamburoko.

²⁸Si du Yisaka akpi nyemu Esau bambiko ko anari pasio be ko; ono Rebeka tigari ki nikpi nyemu Yakoba.

²⁹Yakoba ki mangi riahe, Esau ki yega nvuo yo, omeko nabati.

³⁰Esau ki ya fu Yakoba, “Mi nazungadi ro mo fu bete gu zamba riahe re fere, mi ri nga ha, bambiko omere bati be gomoro!” (Si du i ayambu rimoko ti ni nga Edome.)

³¹Yakoba ki ya, “Mo bági ga pa dukuri ukumbo fere mbata.”

³²Esau ki ya, “Mo ngére, mi nikakpi; gini pai pa dukuri ukumbo ka manga fere?”

³³Yakobakiya, “Mo zunga he mbata fere.” Ko ki zunga he fu ko, ki bagi gako dukuri ukumbo fu Yakoba.

³⁴Yakoba ki fu kpokuta na rãrã abakpa fu Esau. Ko ki ri he ki mbiri ime, ki guari ka ga. Si du Esau apayasi pa gako dukuri ukumbo ti ni.