Read zande Bambata Pai 28 Bible Online

Bambata Pai 28 - zande bible

Bambata Pai 28

¹Yisakakiyambu Yakoba kifumaku fuko fu ko, ki ta ruga ko niya fu ko, “Ka mo di nga de dagba wiri aboro Kanana yo ya.

²Mo gúari, ki ndu ku Padana-arama yo ku Betuere yo, nga ba namo, Mo ki di de yo dagba awiri Rabana nga kawiri namo.

³Mbori du na tandu apai dũ, ko fú maku foro, ki nizugasi ro, ki ngeesi ro, ya mo dú ni rimbasa ngbatunga aboro.

⁴Ko fú gu maku foro a nga ga Abarayama, foro na fu ngbatungaro a, ya mo di gu ringara ni gamo du mo rogo ho ni nungunungu boro nga gu Mbori afu fu Abarayama!”

⁵Yisaka ki asia Yakoba; ko ki ndu ku Padana-arama yo koyo du Rabana ni, nangia wiri Betuere boro Suria, nga kawiri Rebeka. Rebeka angia na aYakoba na Esau.

⁶Esau abi he ya Yisaka afu maku fu Yakoba, ki kedi ko ku Padana-arama yo ka dia de yo, ko ki ta fu maku fu ko, nirugu ko niya, “Ka mo dí nga de dagba awiri aKanano yo ya.”

⁷Ko ki bi he ya Yakoba agi sangba abako na nako, ki ga ku Padana-arama yo.

⁸Ho Esau abi he ni ya awiri aKanano nangia ade angba nga ti Yisaka nga bako te,

⁹Esau ki ndu koyo du Yisamaere ni, ki di Marata ni diako nangia wiri Yisamaere ku ri agu ade nadu be ko mbata. Ri angia dawiri Nebayota. Yisamaere ki ngia wiri Abarayama.

¹⁰Yakoba ki guari Bera-saba yo, ki ndu ku Arana yo.

¹¹Ko ki da rogo gu rago sa ki ra yo yuru bambiko uru aima ti. Ko ki di mbia sa dagba ambia rogo gu ba re, ki moi he tii riko, ko ki pi ho ka ra.

¹²Ko ki rari musumo, mo ngére, tanga ki du ni duadua ha ti sende, rihe ki da ku ngbangbaturũ yo. Ga Mbori amaraika ki ta dakpa ti ni ki nizorõ.

¹³Mo ngére, Yekova ki ru ti rihe, ki ya, “Mi nga Yekova, nga ga Abarayama Mbori, nga bamo, nga ga Yisaka Mbori a. Gu sende pi mo auru he, mi afú he foro na fu ngbatungaro.

¹⁴Ngbatungaro adú wa nvutu sende, mo ki gbandaka agbandaka rogo arago ku dioyo, na ku uroyo, na ku nodiyo, na ku sudiyo a. Rogo ro yo na rogo ngbatungaro yo angbatunga aboro zegino dunduko nikadia maku.

¹⁵Mo ngére, mi dú na mo, mi abánda ro ho mo ka andu ku ho ni, ki yega na mo berewe ku rogo gi ringara re; bambiko mi ahe nga ro te, daho mi ka manga gu pai ni mi agumba pa ha foro.”

¹⁶Yakoba ki zingi be gako rame, ki ya, “Yekova du rogo gi ba re ni rengo; ka mi aina nga ha ya.”

¹⁷Ko ki gunde agunde, ki ya, “Na iriwo gi ba re! A nga kura he nga ha te, ono kina ga Mbori bambu nga ha, ngbadimo ngbangbaturũ nga gere.”

¹⁸Yakoba ki guari kina ngbatutu wiso, ki di gu mbia ko amoi tii riko ki dua ha ku ari, ki uka nzeme ku auru he.

¹⁹Ko ki yambu rimo gu ba re nga Betere; ono rimo gu bakporo re nangia Ruza mbata.

²⁰Yakoba ki zunga he ki ya, “Ka Mbori du na mi, ki nibanda re ngba gu gene mi nikandu ngba ha, ki nifu riahe fere mi niri he, na roko mi nivo ho,

²¹ya mi karaga tire zezeredi ku rogo ga buba kporo berewe, Yekova nikadu ni gi Mbori kindi,

²²gi mbia dua mi he ku ari re, si nikadu ni ga Mbori bambu. Agu ahe dunduko mo ka afu he fere, mi nikafu sa dagba bawe rogo ho foro ni rengo.”