Read zande Bambata Pai 3 Bible Online

Bambata Pai 3 - zande bible

Bambata Pai 3

¹Were ga wo birĩ nasusi gu nga ga anya nvuo dunduko nga agu ra Yekova Mbori amangi ra. U ki ya fu de, “Ati Mbori ay a, ‘Ka oni ri nga agu angua du ati yo dunduko ya’?”

²De ki ya fu wo, “Gu zuzu angua du ati yo ka ani ri he ari;

³ono zuzu gu ngua du bebere ati yo, Mbori aya, ‘Ka oni rí nga zuzuhe ya, ka oni zádi nga ha wa sa ya, oni ka kpi.’ ”

⁴Wo ki ya fu de, “Oni akpi nga wa sa te.

⁵Bambiko Mbori ini ya ni gu rago ka oni ri zuzuhe bangironi azá aza, oni ki du wa kina Mbori, niini wenepai na gbegberẽpai.”

⁶Ho de abi he ni ya gu ngua re wene riahe du, si wenengaĩ bangirise, nyemuhe ti boro si rengbe ka sa ni ni iratatamana, ri ki kati zuzuhe ki ri he; ri ki fu he fu kumbari nadu na ri, ko ki ri he a.

⁷Bangiriyo ki za a wa i adu ue, i ki ini he ya i ni kundiri yo; i ki rũ kpe vurumo ni agbaya tipa yo.

⁸I ki gi fugo Yekova Mbori ko nita ati yo ho rago nizere ni, kumba na diako i ki gbu ati yo dagba angua be bangiri Yekova Mbori.

⁹Yekova Mbori ki yambu kumba, ki ya fu ko, “Wari du mo ni?”

¹⁰Ko ki ya, “Mi nigi fugoro agia ati yo, mi ki gunde agunde, bambiko mi nidu kundiri; mi ki oko tire.”

¹¹Mbori ki ya, “Da niya foro mo ni kundiri ro? Mo niri gu ngua ari mi aya foro ka mo ri nga ha ya?”

¹²Kumba ki ya, “Gu de mo afu ri fere ani du na ri, kina ri nifu zuzuhe fere, mi ki ri he.”

¹³Yekova Mbori ki ya fu de, “Gini pai nga gi mangi mo ho re?” De ki ya, “Wo ninangi re, mi ki ri he.”

¹⁴Yekova Mbori ki ya fu wo, “Wa mangi mo gere, mo ni tiwatiwa ro susi ngbatunga zogozogo anya dunduko, susi anya nvuo dunduko a; mo ki nigbe tiro ni kpoto vuro, ki niri nvutu ho du mo ni ni ungaro.

¹⁵Mi amáa sogote dagba roni na de, dagba atitaro na atitari a; ko ki mburu riro, mo ki mburu gidako.”

¹⁶Ko ki ya fu de. “Mi angéesa ga rungo na ga du na mobara a; mo abátika agude ni kina rungo, ga nyemuhe adu tipa kumbamo, ono ko nikadu ni bairaro.”

¹⁷Ko ki ya fu Adama, “Wa mo nigi sangba diaro, ki ri gu ngua nga gu mi arugu ro ya, ‘Ka mo rí nga ha ya,’ i tiwa kpotosende mbiko ga pai; mo ari riahe rogo ho ni kina mbugo ho du mo ni ni ungaro;

¹⁸si avúnga akiwe foro na asakokoso; mo ki niri gu kurukuru ahe du ati yo.

¹⁹Mo arí riahe mbiko kina gu randimo nikakura kpakpuro yo daho mo ka karaga tiro ni ku sende yo, bambiko mi adi ro kina rogo ho; mbiko mo nga kina nvutu, kina ku nvutu yo mo ka karága tiro ku ho ni.”

²⁰Kumba ki yambu rimo diako nga Awa, bambiko ri nangia na agu aboro dunduko du ni ungayo.

²¹Yekova Mbori ki mangi abaukadi fu Adama na diako rogo kpoto anya, ki ukadi yo na ni.

²²Yekova Mbori ki ya, “Oni ngére, kumba ye ka du wa gu ni sa dagba rani ki ini wenepai na gbegberẽpai; awere, ko ka ndu ka taa beko ki di he rogo ngua Unga a ki ri he, ki nye ni ungako kindi”.

²³Si du Yekova Mbori akusi ko ti ni ku zegi yo ati Edene yo, ko nisopo gu sende nga gu i adi ko rogo.

²⁴Si du ko ado kumba ti ni ku zegi yo; ko ki moi akeruba ati Edene yo ku uroyo, na basape wa mirã we si nisaki tihe asaka rogo arago dunduko kirikiri ka banda gene ngua unga.