Read zande Bambata Pai 30 Bible Online

Bambata Pai 30 - zande bible

Bambata Pai 30

¹Ho Raere abi he ni, ya ri abatika nga agude fu Yakoba te, Raere ki nikpi unvuruari. Ri ki ya fu Yakoba, “Mo fú agude fere, mi ka kpi!”

²Ga Yakoba zinga ki rungudi arunguda kuti Raere, ko ki ya, “Mi nga Mbori, nga gu ko naka na mobara ku rukumbu yo be ro?”

³Ri ki ya, “Mo ngére, gi kanga nga Bira; mo ndú fuo ri, ri batika ku auru arukusure, mi ki bi agude mbiko ri.”

⁴Ri ki fu Bira fu ko nangia gari kanga ni diako; Yakoba ki ndu fuo ri.

⁵Bira ki du na mobara ki batika kumbagude fu Yakoba.

⁶Raere ki ya, “Mbori sapu gi ngbanga, ki gi fugore a, ki fu kumbagude fere.” Si du ri ayambu rimoko ti ni nga Dana.

⁷Bira nga ga Raere kanga ki du na mobara berewe, ki batika ue kumbagude fu Yakoba.

⁸Raere ki ya, “Mi so vura ni bakere he na unvuruami, mi ki di be ri”; ri ki yambu rimoko nga Nafatari.

⁹Ho Rea aini he ni ya ri mbu batika, ri ki fu Zirepa, gari kanga, fu Yakoba ni diako.

¹⁰Zirepa nga ga Rea kanga, ki batika kumbagude fu Yakoba.

¹¹Rea ki ya, “Mamu du!” Ri ki yambu rimoko nga Gada.

¹²Zirepa ga Rea kanga ki batika ue kumbagude fu Yakoba.

¹³Rea ki ya, “Mi na ngbarago! bambiko ade nikaya ti re boro ngbarago nga mi”; ri ki yambu rimoko nga Asera.

¹⁴Ti regbo ke zende ahe, Rubena ki ndu ku nvuo yo ki bi zuzu ngua yo du wa rindiseke, ki ndu na ni koyo du nako ni nangia Rea. Raere ki ya fu Rea, “Mi nakpara akpara foro, mo fú nga bete ga wiro rindiseke fere.”

¹⁵Rea ki ya fu ri, “Toni pai nga ha ya mo adi kumbami be re, mo ki nikpi nyemu ka dia ga wire rindiseke a?” Raere ki ya, “Ko ará yo du mo ni ni gi yuru re tipa ga wiro rindiseke.”

¹⁶Ho Yakoba ayega ni ati yo nyemu, Rea ki kuru ka gbia ko, ki ya, “Mo ka ra yo du mi ni areme; bambiko mi ngbe ro na ga wire rindiseke.” Ko ki ndu fuo ri ni gu yuru re.

¹⁷Mbori ki dege tuko ki gi pa Rea, ri ki du na mobara, ki batika bisue kumbagude fu Yakoba.

¹⁸Rea ki ya, “Mbori fu gi mosoro fere wa mi afu gi kanga fu kumbami”; ri ki yambu rimoko nga Yisasakara.

¹⁹Rea ki du na mobara berewe, ki batika sita kumbagude fu Yakoba;

²⁰Rea ki ya, “Mbori fu wene aũgasade fere; awere kumbami nikanye na mi, wa batika mi akumbagude sita fu ko”; ri ki yambu rimoko nga Zeburuna.

²¹Fuo gure ri ki batika degude, ki yambu rimori nga Dina.

²²Mbori ki tingidi pa Raere, Mbori ki gi pa ri ki za ngba rukumburi.

²³Ri ki du na mobara ki batika kumbagude, ri ki ya, “Mbori di gi zee ku sa yo”;

²⁴ri ki yambu rimoko nga Yosefa, ki ya, “Yekova fu kura kumbagude fere!”

²⁵Ho Raere abatika Yosefa ni, Yakoba ki ya fu Rabana, “Mo ásia re, mi gá ku kpurani yo ku rogo gi ringara.

²⁶Mo fú adiare fere na awire nga agu yo mi amangi sunge foro tipa yo, mi ki ga; bambiko mo ima ina pa gu gi sunge mi amangi he foro.”

²⁷Rabana ki ya fu ko, “Si ngia ngba mi angba bangiro, mo súngu mbata, bambiko mi bi he rogo soroka ya Yekova nafu maku fere mbiko ro.

²⁸Mo ríngbisi mosoro ga sunge fere, mi ki fu he foro.”

²⁹Yakoba ki ya fu ko, “Mo ini he waĩ mi namanga foro, na waĩ du pa gamo abagara mbiko re.

³⁰Mbata fu ye mi, ahe adu be ro kina toni. Si ki moi pai ki du ni badungu he; Yekova ki nifu maku foro ho mi anindu ku ho ni. Awere mi adúngura ahe tipa gimi aborokporo ni gini rago?”

³¹Rabana ki ya, “Gini he mi ka afu foro?” Yakoba ki ya, “Ka mo fú nga ahe fere ya; ono ka mo mángi gi pai fere re, mi aríga ga rimbasa anya ariga berewe ki nibanda ra;

³²Mi andú dagba rimbasa gamo anya dunduko areme, ki rogodi agu ra du ni mbakambaka ra, na agu ra du ni kenekene ra, na agu ra du ni bibiri ra dagba akandoro, na agu ra du ni kenekene ra na agu ra du ni mbakambaka ra dagba ameme; ami ki du ni mosoro gi sunge.

³³Si du gi rurupai ka yugo pai ti ni ku mbata yo tipa re, ho mo ka ye ni ka wisiga pa mosoro gi sunge. Agu ra adu nga ni mbakambaka ra ya na agu ra adu nga ni kenekene ra dagba ameme ya, na agu ra adu nga ni bibiri ra dagba akandoro ya, ka i bí ngbatunga ra be re i sá pa ra fere ni ũdĩ.”

³⁴Rabana ki ya, “Ngba ha angba, mi idi kina sangbaro.”

³⁵Ni kina gu uru re Rabana ki rogodi abaameme nga agu ra nadu ni gbafiogbafio ra na kenekene ra, na anaameme dunduko nga agu ra nadu ni mbakambaka ra, na kenekene ra, na agu ra dunduko nadu na pusi he ti kpotora, na agu ra dunduko nadu ni bibiri ra dagba akandoro, ki fu ra ku be awiriko i nibanda ra.

³⁶Ko ki moi dagba rago dagba yo na Yakoba wa ka boro nungu tipa rame biata: Yakoba ki nirigi yangara ga Rabana rimbasa anya.

³⁷Yakoba ki dewe vovo abe gu ngua nga ribine, na gu wiri bawirisangu na gu wiri bagbodi ki sesege he na mbarõ ti ni, ki da ti pusi pasioho.

³⁸Agu abengua ko asesege he ko ki moi he ku rogo akurungbu baranbga akandoro, nga agu akurungbu nangia ga ime, ho akandoro naye ka mbira ime ni. Na wa ami anadia vuse ho ami ambira ime ni,

³⁹akandoro ki di vuse ho ami aye ni ka mbira ime, ki batika agu ra du ni gbafiogbafio ra, agu ra du ni mbakambaka ra na agu ra du ni kenekene ra a.

⁴⁰Yakoba ki kparaka awiri akandoro akia, ki kpamia rimbasa akandoro kuti agu ra nadu gbafiogbafio, na agu ra nadu ni bibiri ra dagba ga Rabana rimbasa akandoro. Ko ki kparaka gako rimbasa akandoro akia, ka ko akpamia nga ra kuti ga Rabana rimbasa akandoro ya.

⁴¹Ho agu anya nadu ni nyanyaki ra anidi vuse ni, Yakoba animoi angua barangba ra ku rogo akurungbu yo, ya ami nidí vuse dagba angua.

⁴²Ono ho rimbasa akandoro anidu ni ni onyaonya ra ko anamaa nga ha ku rogo akurungbu yo te; were onyaonya ra ki nidu ni ga Rabana ra, nyanyaki ra ki nidu ni ga Yakoba ra.

⁴³Gi kumba re ki kumuko akumuko ni bakere he, ki du na kikindigi rimbasa akandoro be ko, na agu amoyambu nga ade nga agu amoyambu nga akumba, na akameri na adongi a.