Read zande Bambata Pai 31 Bible Online

Bambata Pai 31 - zande bible

Bambata Pai 31

¹Yakoba ki gi agu apai awiri Rabana agumba ha, wa i aya, “Yakoba rogodi ga barani ahe dunduko; ko abi agi aũkumuko re kina be agu ahe nangia ga barani.”

²Yakoba ki bi he ya, ngba nga bi ko bangiri Rabana wa mbata te.

³Yekova ki ya fu Yakoba, “Mo káraga tiro ku rogo ga abamo ringara yo, koyo du angbatungaro ni, mi adú na mo.”

⁴Yakoba ki kedi sunge ki yambu Raere na Rea i yé ku bariga anya nvuo yo yo du gako rimbasa anya ni.

⁵Ko ki ya fu yo, “Mi bi he ya ngba nga bi re bangiri baroni wa mbata te. Ono ga buba Mbori nidu na mi.

⁶Oni ini he ya mi namanga sunge fu baroni na omere dunduko;

⁷ono baroni ki biriki re abirika ki sa pa gi mosoro bara bawe, ono Mbori aida nga ha ko mangi re gbegberẽ te.

⁸Ka ko agumba ha fere, ‘Mbakambaka ra ka du ni ga mosoro’, rimbasa akandoro dunduko ki nibatika kina mbakambaka ra; ono ka ko agumba ha fere, ‘Gbafiogbafio ra ka du ni ga mosoro’, rimbasara dunduko ki nibatika kina gbafiogbafio ra.

⁹Were Mbori rogodi ga baroni zogozogo anya be ko ki fu ra fere.

¹⁰Ti gu rago anya adi vuse mi atuka bangire, mi ki bi he rogo musumo yo, oni ngére, agu abaameme naguka ku auru rimbasara ami adu gbafiogbafio, agu ra ki du mbakambaka, akura ra kenekene.

¹¹Ga Mbori maraika ki ya fere rogo musumo yo, ‘Yakoba’, mi ki ya, ‘Mi du re!’

¹²Ko ki ya, ‘Mo túka nga bangiro awere ki bi he, agu abaameme dunduko naguka ku auru rimbasara, ami gbafiogbafio, agu ra mbakambaka, akura ra kenekene; bambiko mi ima bi agu apai dunduko Rabana namanga ro na ni.

¹³Mi nga Mbori nga ga Betere ko, yo mo ambedi mbia ni na nzeme, yo mo azunga he ni fere. Mo gúari awere rogo gi ringara re, ki karaga tiro ku rogo gu ringara yo i abatika ro ni.’ ”

¹⁴ARaere fia Rea ki ta karaga ha, niya fu ko, “Bete ahe watadu mosoro nye fu rani rogo ga barani kporo?

¹⁵Ati ani adu bangiriko wa kina auro? Bambiko ko abagi rani, ki riti gu marã i angbe rani na ni a.

¹⁶Bambiko agu aukumuko Mbori arogodi he be barani, gaani nga ha na ga awirani a; awere gu pai gumba Mbori foro, mo mángi kina ha.”

¹⁷Yakoba ki guari, ki moi awiriko na adiako ku ri akameri.

¹⁸Ko ki rogodi gako zogozogo anya dunduko, na gako ũkumuko dunduko nga gu ko adungura ha, na gu zogozogo anya du ni gako ra, nga agu ra ko adungura ra Padana-arama yo, ka ga koyo du Yisaka di nangia bako ku ringara Kanana yo.

¹⁹Were Rabana andu ka yepa mange gako akandoro. Raere ki dĩ ga bari ambori nadu ni kpiaahe.

²⁰Yakoba ki birikpo gii bangiri Rabana nga boro Suria, wa ko agumba nga ha fu ko ya ko naga ya.

²¹Were ko aga na agu ahe nadu be ko dunduko. Ko ki guari, ki si gu di nga Ferata, ki ndu ngba gene sa ringara bagangara nga Girada.

²²Ti biata rame i ki gumba pa gate Yakoba fu Rabana.

²³Ko ki rogodi gako aboro, ki do fuo ko tipa rame saba, ko ki gbia ko rogo gu ringara bagangara nga Girada.

²⁴Mbori ki ye yuru rogo musumo koyo du Rabana ni nga boro Suria, ki ya fu ko, “Mo bánda tiro ka mo gumba nga wenepai watadu gbegberẽpai fu Yakoba ya.”

²⁵Rabana ki gbia Yakoba. Were, Yako ba aima dua gako bamburoko ringara bagangara yo, aRabana na gako aboro ki zi bataya ringara bagangara Girada yo.

²⁶Rabana ki ya fu Yakoba, “Gini pai nga gu mangi mo ho re, wa mo abiriki re, ki rogodi awire wa zizi aboro ti ngba vura?

²⁷Tipagine mo aoro ti ni ni gbuko ki birikpo be re, ka mo agumba nga pa ha fere ya, ya mi fu gene foro ni ngbarago na abia, na agaza na asagiru a,

²⁸ka mo aida nga mi nyoro pa ngba awire nga akumba na agu awire nga ade ni asia yo ya? Mo amangi he ni mungo.

²⁹Mi rengbe ka manga ro gbegberẽ; ono ga bamo Mbori ata gumba pai fere gba yuru, niya, ‘Mo bánda tiro ka mo gúmba nga wenepai watadu gbegberẽpai fu Yakoba ya.’

³⁰Awere, mo naga bambiko nyemu ga bamo kporo namanga ro gbe, ono tipagine dĩ mo gimi ambori ti ni?”

³¹Yakoba ki karaga ha ki ya fu Rabana, “Bambiko mi agunde agunde, mbiko mi aya, ‘Mo ka rogoda awire be re ni zuu.’

³²Ono gu boro mo ka bi gamo ambori be ni, ni akpí akpi. Mo gbáta agu ahe nga gamo ka du be re ku bangiri awirinarani, mo ki rogo ho.” Bambiko Yakoba aina nga ha ya Raere du naadĩ he te.

³³Rabana ki rimi ku tii ga Yakoba bamburoko yo, na ku tii ga Rea, na ku tii ga akanga ue nga ade, ka ko abi nga ha yo ya. Ko ki kuru rogo ga Rea bamburoko yo, ki rimi ku tii ga Raere.

³⁴Were Raere narogo akpia ambori, ki moi he ku rogo basunga ri kameri yo ki sungu auru he. Rabana ki ta ata bamburoko yo dunduko ka ko abi nga ha ya.

³⁵Ri ki ya fu bari, “Ako bairare, ka mo zíngi nga wa mi aguari nga bara bangiro ya te, si bambiko kaza ade na mi.” Ko ki ta ata vurũ, ka ko abi nga agu akpia ambori re ya.

³⁶Yakoba ki zingi, ki poi apaa na Rabana. Yakoba ki karaga ha ki ya fu Rabana, “Gi tindika nga gine? Gi ingapai nga gine, wa mo ado fuo re ni zinga?

³⁷Wa mo nata ata dagba gimi aũkporo dunduko, gini he bi mo ho nga ga gamo aũkporo? Mo moi he ku bara bangire na ku bara bangiri gimi aboro na ku bara bangiri gamo aboro, i sápu ngbanga dagba rani na mo.

³⁸Ani aima na mo tipa agarã 20. Wa gamo anaakandoro na anaameme anabatika, awira anati nga te. Mi anari nga abara dagba arimbasara a te.

³⁹Agu ra anya naimo ra mi anaye nga na kangbara foro te; kina mi nanatumo tipa ra; watadu aboro anadĩ ra uru watadu yuru, mo anizi re mi tumo;

⁴⁰wo si adu tipa re; faarago anamanga re uru, zere ki nimangi re yuru, rame ki nisonzora bangire.

⁴¹Agi agarã du 20 re mi adu kina ku kpuro yo; mi amangi sunge foro tipa agarã 14 tipa awiro ue, na agarã sita tipa gamo rimbasa akandoro, mo ki sa pa gi mosoro bara bawe.

⁴²Ka ga buba Mbori, nga ga Abarayama Mbori nga gu ko Yisaka anagunde ti ko adu nga na mi ya, ka mo akaraga re ni kina ku bere. Mbori abi gi rungo, na sunge ni bere, ki za ro areme yuru.”

⁴³Rabana ki karaga ha ki ya fu Yakoba, “Agi ade re kina awire nga yo, na agu agude re kina awire du a, na rimbasa akandoro kina gimi ra nga ami, na agu ahe mo abi he re dunduko kina ku gimi nga ha. Gini he mi ka manga ha areme ti gi uru re fu agi awire re, watadu fu agu awiriyo i abatika yo?

⁴⁴Mo ye, ani zunga he dagba rani na mo; ya si dú ni dezirepai dagba rani.”

⁴⁵Yakoba ki di mbia, ki dua ha ku ari.

⁴⁶Yakoba ki ya fu gako aboro, “Oni dungura ambia,” i ki dungura ha, ki ba gugudaha; i ki ri riahe yo pati gu guguda mbia re.

⁴⁷Rabana ki yambu rimoho nga Yegara-saduta: ono Yakoba ki yambu he tigako nga Garede.

⁴⁸Rabana ki ya, “Gi guguda mbia re nga dezirepai areme dagba rani na mo.” Si du ko ayambu rimoho ti ni nga Garede,

⁴⁹na Misipa, mbiko ko aya, “Yekova nikpária pai dagba rani na mo, ho ani Ka kparaka ni

⁵⁰Ka mo amánga awire gbegberẽ, ki rogo kura ade ku pati yo, ka boro adú nga ho na ani ya, mo ki tingidi he ya, Mbori du ni dezire dagba rani na mo.”

⁵¹Rabana ki ya fu Yakoba, “Mo bí gi guguda mbia re, ki bi duadua mbia moi mi ne dagba rani na mo

⁵²Gi guguda mbia re du ni dezirepai, duadua mbia du ni dezire a, ya mi agú nga ri he sa ro te, na mo agú nga ri gi guguda mbia re na ri gi duadua mbia re sa re ni vura a te.

⁵³Ga Abarayama Mbori, nga ga Naora Mbori, nga ga abayo Mbori, ko sári ngbanga dagba rani.” Yakoba ki zunga he ti rimo gu Ko bako nga Yisaka agunde ti ko.

⁵⁴Yakoba ki fu motumo ri bagangara yo, ki yambu gako aboro tipa ri riahe; i ki ri riahe; ki ima ku ri bagangara yo rogo gu yuru re sasasa.

⁵⁵Rabana ki zingi ngbatutu wiso, ki nyoro pa ngba atitako na agu awiriko nga ade, ki fu maku fu yo. Rabana ki guari ki karaga tiko ku kpuko yo.