Read zande Bambata Pai 32 Bible Online

Bambata Pai 32 - zande bible

Bambata Pai 32

¹Yakoba ki nindu ngba gako gene ga Mbori amaraika ki gbia ko.

²Ho Yakoba abi yo ni ko ki ya, “Agi yo re nga ga Mbori rikavura!” Ko ki yambu rimo gu ba re nga Manaima.

³Yakoba ki kedi asunge ku mbata yo koyo du Esau ni nangia unvuruako, ku ringara Seira yo ku rogo gu rago nangia ga Edome.

⁴Ko ki ta ruga yo niya, “Oni yá fu Esau nga bairare wẽ: ‘Wo poi ga moyambu nga Yakoba, mi asungu ku Rabana yo daku awere;

⁵abaabagara ki du be re, na adongi, na rimbasa akandoro, na amoyambu nga akumba na amoyambu nga ade. Mi kedi asunge ka gumba ha fu bairare ya mi bí zereda be ro.’ ”

⁶Asunge ki karaga tiyo koyo du Yakoba ni, ki ya, “Ani da bi unvuruamo nga Esau, ko naye ka gbia ro, na aboro 400 fuo ko.”

⁷Yakoba ki nigunde agunde ki du na rungo gbe; ko ki kparaka agu aboro nadu na ko ku rogo rimbasa ue, na rimbasa akandoro, na rimbasa abagara, na akameri a.

⁸Ko ki ya. “Ka Esau gbia gu rimbasa sa ki so vura na yo, gu rimbasa ka nye ki bati.”

⁹Yakoba ki ya, “Ako Mbori, nga ga buba Mbori nga Abarayama, nga ga buba Mbori a nga Yisaka, Ako Yekova, nga gu ko naaya fere, ‘Mo káraga tiro ku rogo gaoni ringara yo, fuo agumero, mi amánga pa ro wenengaĩ,’

¹⁰mi arengba nga na kina gu toni he dagba gamo ainapai dunduko na gu rengbe dunduko yugu mo ho fu ga moyambu te, bambiko mi asi gi Yaradene re na kina gi ngbondo be re; awere mi wa rimbasa aboro ue.

¹¹Mi nakpara foro mo bátasi re be Esau nga unvuruami, bambiko mi nagunde agunde be ko, ko ka ye ka so vura na mi ka imo rani na naagude na agude.

¹²Na wa mo aya, ‘Ni rengo mi amánga pa ro wenengaĩ, mi asá ngbatungaro wa kina ngume baime, nga gu ka i ageda nga ha mbiko nge he ya.’ ”

¹³Ko ki ra kina yo ni gu yuru re, ko ki rogodi bete agu ahe nadu be ko ni gamahe tipa unvuruako nangia Esau,

¹⁴nga anaameme 200, na abara 20, anaakandoro 200, na abara 20 a,

¹⁵na akameri nga agu ra nafu mamura 30 na awira a, anaabagara 40 na abara bawe, anaadongi 20 na abara bawe.

¹⁶Ko ki fuku ra ku be gako amoyambu ni arimbasara ni ba sa sa, ki ya fu gako amoyambu wẽ, “Oni súsi ku mbata yo fere, ki moi arimbasara na dagba.”

¹⁷Ko ki ta ruga barumbatayo, niya, “Ho Esau nga unvuruami ka ngbisa ro ni, ki sana ro niya, ‘Vuru da nga mo? Oni nandu ku wari? Ga da ra nga agu ra du barangba ro re?’

¹⁸Mo ki ya, ‘Ga gamo moyambu ra du nga Yakoba; kedi ko ra ni gamahe fu bairare nga Esau; mo ngére, ko du sa yo naye a.’ ”

¹⁹Were Yakoba ki ta ruga gu ue ni, na gu biata ni, na agu yo dunduko naapeka arimbasa anya, niya, “Gere nga gu pai oni ka gumba ha fu Esau ho oni ka ngbisa ko ni,

²⁰oni ki ya a, ‘Mo ngére, ga moyambu nga Yakoba ko du sa yo naye.’ ” Bambiko ko niya wẽ, “Mi azéresa ngbaduko na gu gamahe ngbe fere mbata yo. Fuo gure mi abi kpakpuko; si ngia ko adía re ku gume.”

²¹Si du gamahe asusi ti ni ku mbata yo fu ko; ko tigako ki ra ni gu yuru re kina bataya yo.

²²Yakoba ki guari ni kina gu yuru re, ki rogo adiako ue, na gako akanga ue nangia ade, na awiriko 11, ki si gu di nga Yaboka.

²³Ko ki rogo yo, ko ki kedi yo i si di na gako ahe be yo.

²⁴Yakoba ki du yo ni sa ko; kumba ki ta kpata na ko dati kina girarago.

²⁵Ho ko abi he ni ya ko adia nga be Yakoba te, ko ki zadi gbungbuko. Gbungbu Yakoba ki wo, wa ko ata kpata na ko.

²⁶Kumba ki ya, “Mo ídi he mi gá, bambiko rago nagira.” Ono Yakoba ki ya, “Mi aída nga mo gá te, kina gu ka mo fú maku fere mbata.”

²⁷Ko ki ya fu ko, “Rimoro nga da?” Ko ki ya, “Yakoba.”

²⁸Ko ki ya, “I ayámba nga rimoro nga Yakoba berewe te, ono Yisaraere, bambiko mo ata kpata na Mbori na aboro a, ki di be yo.”

²⁹Yakoba ki sana ko, ki ya, “Mi nazungadi ro, mo yámbu nga rimoro fere.” Ono ko ki ya, “Mo nasana re tipa rimore tipagine?” Ko ki fu maku fu ko kina ho.

³⁰Yakoba ki yambu rimo gu ba re nga Penuere, bambiko ko aya, “Mi bi kpakpu Mbori ni kina bangire, ki du ni ungare kindi.”

³¹Wa ko asusa Penuere uru ki nisikpa ku ari, ko ki niterenge aterenga mbiko gbungbuko.

³²Si du awiri aYisaraere naari nga gu gbaga gbungbuse du ti mboso gbungbuse yo ti ni ya, daku awere, bambiko ko azadi gbungbu Yakoba ti gbaga mboso gbungbuko.