Read zande Bambata Pai 33 Bible Online

Bambata Pai 33 - zande bible

Bambata Pai 33

¹Yakoba ki tuka bangiriko, ki ya ngere, ki bi Esau ko niye, na aboro 400 fuo ko. Ko ki kparaka agude fu aRea na Raere, na fu gu gako ade ue nangia akanga.

²Ko ki moi akanga na awiriyo ku mbata yo, aRea na awiriri ki du fuo yo, aRaere na Yosefa ki du ku sa yo.

³Ko tigako ki ngbe ku mbata yo fu yo, ko ki tumusa ku sande bara saba daho ko ambedi ni na unvuruako.

⁴Esau ki oro ka ngbisa ko, ki dungo ko, ki ti ku goko yo ki nyoro pa ngbako, i ki nikpari ni aume.

⁵Esau ki tuka bangiriko ki bi ade na agude, ki ya, “Ada nga agi yo du na mo re?” Yakoba ki ya, “I nga agu agude Mbori afu yo fu ga moyambu ni gako inapai.”

⁶Akanga ki ye ki mbedi, i na awiriyo, i ki tumusa ku sande.

⁷ARea ki ye a na awiriri ki mbedi, ki tumusa ku sande. Fuo ho aYosefa ki ye na Raere ki mbedi, ki tumusa ku sande.

⁸Esau ki ya, “Gine nga rimbasa agu ra mi nigbia ra gene re?” Yakoba ki ya, “Mi nifu ra wa ka mi ngba bangiri bairare.”

⁹Esau ki ya, “Tamere, gimi ra rengbe; mo ká kuti agu ra du be ro ni gamo ra.”

¹⁰Yakoba ki ya, “Oõ, mi nazungadi ro, watadu mi bi zereda be ro, mo dí gi gamahe be re re; bambiko mi bi kpakpuro wa ka boro bi kpakpu Mbori, mo ki ngba na mi.

¹¹Mi nazungadi ro, mo dí gi gamahe ye yo na ni foro re, bambiko Mbori naamanga pa re ni inapai, na bambiko gimi ra rengbe.” Wa ko azadi pa ra kuti ko kindi, ko ki rogo ra.

¹²Esau ki ya, “Ani gúari, ka ndu gaani nduge, mi ki ngbe ku mbata yo foro.”

¹³Yakoba ki ya fu ko, “Bairare, mo ini he ya agude ata ngangarã nga te, agu arimbasa akandoro na rimbasa abagara du be re ami naága awira; ka aboro adanda ra ni ome, uru du sa arimbasara ki kpiki akpika dunduko.

¹⁴Mi zúngadi ro, ya bairare súsi fu gako moyambu ku mbata yo, mi ki nindu yee tigimi ringbisi he na pa nduge anya naadu ku mbata yo fere, ringbisi he a na pa nduge agude, daho mi ka da ni koyo du bairare ni, ku Seira yo.”

¹⁵Esau ki ya, “Mi mbú bete agu aboro foro du mi na yo.” Ko ki ya, “Gini u du ti ni? Mi ngbá bangiri bairare.”

¹⁶Si du Esau akaraga tiko ti ni ni kina gu uru re ngba gako gene ku Seira yo.

¹⁷Ono Yakoba ki ndu ku Sukota yo, ki dua gako bambu yo ki mangi abasura tipa gako zogozogo anya; si du i ayambu rimo gu rago re ti ni nga Sukota.

¹⁸Yakoba ki ye Padana-arama yo zezeredi ku rogo gu bakporo nga ga Sekeme du rogo gu ringara nga Kanana; ko ki zi bataya barangba bakporo.

¹⁹Ko ki ngbe bete rago be awiri Amora nangia ba Sekeme na marã 100 ho ko adua gako bamburoko ni.

²⁰Ko ki dua bamotumo yo ki yambu rimoho nga Ere-Ero-Yisaraere.