Read zande Bambata Pai 35 Bible Online

Bambata Pai 35 - zande bible

Bambata Pai 35

¹Mbori ki ya fu Yakoba, “Mo gúari, ki ndu ku Betere yo, ki sungu yo; ki dua bamotumo yo fu Mbori, nga gu ko nayugu tiko foro ho mo aora ni be bangiri Esau nga unvuruamo.”

²Si du Yakoba ki ya fu gako aborokporo na agu yo nadu na ko dunduko, “Oni báfu gu kungba ambori du dagba roni ku sa yo, oni ki kpara tironi ziazia ki unda gaoni aroko;

³ani gúari ka ndu nga ku Betere yo, yo mi ka dua bamotumo ni fu Mbori, nga gu ko nakaraga pai fere, ni gu rago mi adu ngba pai, ki nidu na mi ho mi anindu ku ho ni.”

⁴I ki fuku gu kungba ambori nadu be yo dunduko fu Yakoba, na agu atongo naadu ti atuyo; Yakoba ki kpisidi ra ku tii gu gero yo naadu Sekeme yo.

⁵I ki ndu gayo nduge, bakere gunde ti Mbori ki du adu rogo agu abaakporo nadu pati yo kirikiri, ka i ado nga fuo awiri Yakoba ni zuu ya.

⁶Si du Yakoba aye ti ni ku Ruza yo, du ringara Kanana yo, si nga Betere, ko na agu aboro dunduko nadu na ko

⁷Ko ki dua bamotumo yo, ki yambu rimo gu ba re nga Ere-betere, bambiko yo Mbori ayugu tiko ni fu ko, ho ko aora ni be bangiri unvuruako.

⁸Debora nangia gu de nambuti Rebeka ki kpi, i ki kpisidi ri tii gu gero nadu mbembedi na Betere; i ki yambu rimoho nga Aronabakuta.

⁹Mbori ki yugu tiko berewe fu Yakoba ho ko ayega ni Padana-arama yo, ki fu maku fu ko.

¹⁰Mbori ki ya fu ko, “Rimoro ningia Yakoba; i ayámba nga rimoro berewe nga Yakoba te, ono Yisaraere nikangia rimoro.” Ko ki yambu rimoko nga Yisaraere.

¹¹Mbori ki ya fu ko, “Mi nga Mbori du na tandu apai dũ: Mo zúga ki nge ange; rikaaboro aénga ti ro, na rimbasa arikaaboro a, abakindo ki kuru rogo ro yo.

¹²Gu ringara mi afu he fu Abarayama na fu Yisaka mi afú he foro; mi afú gu ringara re fu ngbatungaro fuo ro a.”

¹³Mbori ki guari pati ko rogo gu ba re ho ko afura ni na ko ki ga.

¹⁴Yakoba ki dua mbia ku ari rogo gu ba ho i afura ni na ko, ni duadua mbia ki uka motumo mbirimbiri he ku ri he, ki uka nzeme ku auru he a.

¹⁵Yakoba ki yambu rimo gu ba Mbori afura rogo ho na ko nga Betere.

¹⁶I ki guari Betere yo na gayo nunguro. I ki turũ ti Efurata ngbutuko, Raere ki niimi aima be vungu, gude ki nimangi ri amanga gbe.

¹⁷Ho gude amanga ri ni gbe, nasamba ki ya fu ri, “Ka mo gúnde nga ya; mbiko awere mo nikabatika kura kumbagude.”

¹⁸Fuo gure, ho mbisimori aguari ni ti ri bambiko ri akpi, ri ki yambu rimoko Beneoni; ono bako aya ti ko Benyamina.

¹⁹Raere ki kpi, i ki kpisidi ri ngba gene Efurata yo, si nga Betereme.

²⁰Yakoba ki dua mbia ri murãri; si nga kina gu mbia du ri murã Raere daku awere.

²¹Yisaraere ki ndu gako nduge ku mbata yo, ki dua gako bamburoko ku gii gbanga basona bambu Edere yo.

²²Si ki ta du wa gere wa Yisaraere araka rogo gu ringara re, Rubena ki ndu ki ra na Bira nangia ga bako debadia; Yisaraere ki gi he. Awiri Yakobaadu 12 niakumba.

²³Awiri Rea du re: Rubena, nga bambata wiri Yakoba, Simona, Revi, Yuda, Yisasakara, na Zeburuna.

²⁴Awiri Raere: Yosefa na Benyamina.

²⁵Awiri Bira ga Raere kanga: Dana na Nafatari.

²⁶Awiri Zirepa ga Rea kanga: Gada na Asera. Agi yo re nangia awiri Yakoba nga agu yo i abatika yo fu ko Padana ― arama yo.

²⁷Yakoba ki da koyo du Yisaka ni nangia bako ku Mamare yo, ku Kiriyata-aruba yo, si nga Eburone, yo Abarayama na Yisaka anaraka ni.

²⁸Garã Yisaka adu 180.

²⁹Rame Yisaka ki rengbe ko ki kpi; toroko ki ga koyo du atitako ni, kuru gbinza kumba nangia ko garãko ange ange ki susi. AEsau na Yakoba ki kpisidi ko nangia awiriko.