Read zande Bambata Pai 38 Bible Online

Bambata Pai 38 - zande bible

Bambata Pai 38

¹Si ki ta du wa gere ni gu rago re, Y uda ki merẽ pati awiribako, ki ndu fuo gu boro Adurama sa rimoko angia Ira.

²Yuda ki bi de yo nangia wiri Sua boro Kanana. Ko ki di ri ki ndu fuo ri,

³ri ki du na mobara ki batika kumbagude, ko ki yambu rimoko nga Ere.

⁴Ri ki du na mobara berewe ki batika kumbagude, ri ki yambu rimoko nga Onana.

⁵Ri ki batika kumbagude berewe, ki yambu rimoko nga Sera. Ri adu Kesiba yo ho ri abatika ko ni.

⁶Yuda ki di de fu bambata wiriko nangia Ere, rimori ki ngia Tamara.

⁷Ono Ere bambata wiri Yuda, anamanga gu pai naira aira bangiri Yekova; Yekova ki imi ko.

⁸Yuda ki ya fu Onana, “Mo ndú ki ini dia wirinamo ni de, ki mangi gu pai ru aru awirina kumbakude nimangi fu ri, ki bi gude fu wirinamo.”

⁹Onana ki ini he ya ngbatungako nikangia gu gude re te, si ki ta du wa gere, ho ko aina dia wirinako ni ni de, ko ki niuka ha kina ku sande, ko ka batika agude fu wirinako.

¹⁰Were gu pai ko amangi re si agberẽ agberã bangiri Yekova, ko ki imi ko a.

¹¹Si du Yuda aya ti ni fu Tamara nangia dia wiriko, “Mo gá ku bamo yo ki du ni dekurugbo kindi da kina ho gu wire nga Sera ka sona ni” ― bambiko ko agunde ya ko ka kpi wa kina awirinako. Tamara ki ga ki niraki kina ku bari yo.

¹²Fuo bete rago dia Yuda, wiri Sua, ki kpi. Fuo ngarãsa Yuda tiko, ko ki ndu ku Timena yo, koyo du gako abayere mange akandoro ni, i na badiako nangia Ira, boro Adurama.

¹³I ki gumba ha fu Tamara, ki ya, “Mo ngere, bakumbamo ndu ku Timena yo ka yera mange gako akandoro.”

¹⁴Ri ki uru gari aroko dekurugbo ki vodi tiri na gari roko wadatise, ki sungu barima ku Enaima yo, ngba gene ku Timena yo; bambiko ri aima ina ya Sera ima sona ka i ata fu nga ri fu ko ni diako ya.

¹⁵Ho Yuda abi ri ni, ko aberẽ pa ri tigako ya debari ningia ri, bambiko wa ri adadi kpakpuri.

¹⁶Ko ki kpara ku pangba gene yo fuo ri, ki ya fu ri, “Mi nazungadi ro, mo ídi he mi ye fuo ro”, bambiko ko aina nga ya dia wiriko nangia ri te. Ri ki ya, “Gini he mo ka fu fere ka ra na mi?”

¹⁷Ko ki ya, “Mi akéda paranga meme sa dagba rimbasa anya yo foro.” Ri ki ya, “Mo nikafu ngbaanga fere daho mo ka keda ru ni?”

¹⁸Ko ki ya, “Gini ngbaanga mi ka fu he foro?” Ri ki ya, “Ga tongo na ga gire na ga ngbondo nga gu du bero re.” Ko ki fuku he fu ri, ki ndu fuo ri, ri ki di mobara be ko.

¹⁹Ri ki guari, ki merẽ, ki uru roko wadatise ti ri ku sa yo, ki vodi tiri na aroko dekurugbo.

²⁰Yuda ki kedi badiako nangia boro Adurama na paranga meme, ka dia ngbaanga be gu de re. Ono ko abi nga ri yo te.

²¹Ko ki sana aboro gu rago re ki ya, “Wari du gu debari ni re nadu Enaima yo pangba gene?” I ki ya, “Debari naadu nga erẽ te.”

²²Ko ki karaga tiko koyo du Yuda ni, ki ya, “Mi abi nga ri yo te; aboro gu rago re niya a, ‘Debari naadu nga erẽ te.’ ”

²³Yuda ki ya, “Ri ká aka kuti agu ahe re, si ka ba zee ti rani; mo ngére, mi nikedi gi paranga meme re, ka mo abi nga ri yo ya.”

²⁴Si ki ta du wa gere fuo diwi biata, Yuda ki gi he ya, “Tamara nga dia wiro mangi bari; ku ri gure ri du na mobara.” Yuda ki ya, “Oni yé na ri, i zo ri.”

²⁵Ho i aye ni na ri, ri ki kedi sunge koyo du bakumbari ni, ki ya, “Mi na mobara be gu kumba du agi ahe re ni gako.” Ri ki ya, “Mi nazungadi ro, mo wísigi gi tongo re na gi gire re, na gi ngbondo du re, ki ini iraha.”

²⁶Yuda ki idi pa ahe, ki ya, “Gari pai ru ki susi gimi, bambiko wa mi afu nga ri fu wire nga Sera ya.” Ka ko andu nga fuo ri berewe ya.

²⁷Si ki ta du wa gere, ni gu rago gude azuba ri, agude adu vuri yo ue.

²⁸Ho ima vungu amanga ri ni, gu ru ki kusi beru sa ku zegi; nasambari ki di beru ki vo zamba gire ti ni, ki ya, “Gi ru re nikuru mbata.”

²⁹Ho u agbe beru ni ku sa yo, mo ngére, wirinai ki kuru; ri ki ya, “Mo za gene tipa ro!” Si du i ayambu rimoko ti ni nga Perese.

³⁰Fuo ho wirinako ki kuru, nangia gu ko nadu na zamba gire ti beko, i ki yambu rimoko nga Zera.