Read zande Bambata Pai 4 Bible Online

Bambata Pai 4 - zande bible

Bambata Pai 4

¹Adama ki ini Awa ni de nga diako, ri ki du na mobara ki batika Kaina, ki ya “Mi bi kumba mbiko gu undahe nga ga Yekova.”

²Fuo ho ri ki batika taipeko nga Ebere. Ebere ki ngia babanda akandoro, ono Kaina tigako adu ni basopobino

³Si ki ta du wa gere ni gu rago re, Kaina ki ye na bete ũati ni motumo fu Yekova,

⁴Ebere ki ye a na bete bambata awiri rimbasa gako anya na nzemera. Bi Ebere na gako motumo angba angba bangiri Yekova,

⁵ono bi Kaina na gako motumo angba nga bangiriko te. Kaina ki zingi azinga gbe, kpakpuko ki du na ngbandua.

⁶Yekova ki ya fu Kaina, “Tipagine zingi mo ti ni? Tipagine du kpakpuro ti ni na ngbandua?

⁷ka mo amanga wenengaĩ, kpakpuro adú nga na ngbarago te? Ono ka mo amanga nga wenengaĩ ya, ingapai nagbura ngbadimo; gaha nyemuhe ki du koyo du mo ni, ono mo ka zoga ha.”

⁸Kaina ki ya fu Ebere nga wirinako, “Ani ndú ku ati yo.” Fuo gure, ho i adu ni ati yo, Kaina ki nimo kuti Ebere nangia wirinako, ki imi ko.

⁹Yekova ki ya fu Kaina, “Wari du Ebere ni nga wirinamo?” Ko ki ya, “Mi aina nga ho te; babanda wirinami nga mi?”

¹⁰Yekova ki ya, “Gini pai mangi mo? Kure wirinamo nakpara fere sande.

¹¹Were mo ni tiwatiwa ro mbiko kpotosende, nga gu za ngbaha ka mbira kure wirinamo be ro.

¹²Ho mo ka asópa bino ni, si aida nga foro gbe te; mo adu ni miakpamiakpa boro ni yarayara ro auru kpotosende.”

¹³Kaina ki ya fu Yekova, “Gi mbusa si kii ki susi omere.

¹⁴Mo ngére, mo do re areme ku sa yo rogo gi sende; mi adú ni okooko re ti bangiro; mi ki du ni miakpamiakpa boro ni yarayara re auru kpotosende gu boro ka bi re ni aimo re aimo.”

¹⁵Yekova ki ya fu ko, “Wo te! gu ni ka imi Kaina, i aíra bape kuti ni bara saba.” Yekova ki moi yuguyuguhe ti Kaina, boro ka ndu ka bi ko ki zuba ko.

¹⁶Kaina ki guari bara bangiri Yekova, ki niraki rogo ringara Nodo, pati Edene ku uroyo.

¹⁷Kaina ki ini diako ni de, ri ki du na mobara, ki batika Enoka; ko ki dua bakporo, ki yambu rimoho nga Enoka ti rimo wiriko.

¹⁸I ki batika gude fu Enoka nga Irada; Irada ki batika Meuyaere, Meuyaere ki batika Metusaere, Metusaere ki batika Remeke.

¹⁹Remeke ki rogo ade ue tipa ko; rimo gu ri sa nangia Ada, rimo gu kura ri ki ngia Sira.

²⁰Ada ki batika Yabara; ko adu ni ba fu agu yo naraka tii bamburoko yo ki du na zogozogo anya be yo.

²¹Rimo wirinako nangia Yubara; ko adu ni ba fu agu yo nataka sagiru ki nivudi akpangi.

²²Sira ki batika gude a nga Tubara-kaina; ko nangia pangu taka angbatunga aũsunge rogo sirigi na marã a. Dawiri Tubara-kaina nangia Nama.

²³Remeke ki ya fu adiako wẽ: “Ada na Sira, oni gí fugore; adia Remeke, oni gí sangbare; mi aimi kumba wa ko ahogi re, na paranga a, wa ko amburu re.

²⁴Ka i iri bape Kaina bara saba, i aíra bape Remeke bara 77 ni rengo.”

²⁵Adama ki ini diako ni de berewe, ri ki batik i gude, ki yambu rimoko nga Sete, ri ki ya, “Mbori fu kura vungu fere ku ba Ebere, bambiko wa Kaina aimi ko.”

²⁶I ki batika kumbagude fu Sete a, ko ki yambu rimoko nga Enosa. Ni gu rago re aboro ki tona ka kpara ti rimo Yekova.