Read zande Bambata Pai 40 Bible Online

Bambata Pai 40 - zande bible

Bambata Pai 40

¹Fuo agi apai re, ga bakindo Ezipeta bafuriahe na gako bagbindiriahe azingi kuti bairayo nangia bakindo Ezipeta.

²Faro ki zingi kuti gako abarumbatayo ue, kuti baira abafuriahe na kuti baira abagbindiriahe.

³Ko ki ba yo ku rogo gu vuru bambu yo nangia ga barutiri ababandarago, ku rogo gu bambukisa yo Yosefa adu ni ni kisikisi ko.

⁴Gu barutiri ababandarago re ki fu yo ku be Yosefa, ko ki nimangi pa yo; i ki ima ngbutuko ku bambukisa yo.

⁵Ga bakindo Ezipeta bafuriahe na gako bagbindiriahe nadu ni kisikisi yo ku bambukisa yo, i ki mongo rari musumo wa du yo ue ― ni kina gu yuru sa ― sangba gayo musumo ki du ni ba sa sa a.

⁶Ho Yosefa aye ni fuo yo wiso ko ki bi yo, i nirungo arungo.

⁷Ko ki sana ga Faro abarumbatayo nadu na ko bambukisa yo, rogo ga bairako bambu, ki ya, “Tipagine oni arungo arungo ti ni areme?”

⁸I ki ya fu ko. “Ani nirari musumo, a nga boro ho sa ka yugu sangbaha fu rani te.” Yosefa ki ya fu yo, “A nga kina ga Mbori pai nga yugo sangba musumo te? Mi nazungadi roni oni gúmba nga pa ha fere.”

⁹Baira abafuriahe ki gumba gako musumo fu Yosefa, ki ya fu ko, “Mo ngére, rogo gi musumo, bakakue nidu bara bangire.

¹⁰Ti bakakue behe nidu ti ni biata; si ki wiri wa si funa, mbumbudaha ki zara, kpuraha ki kusi zamba zuzu bakakue.

¹¹Ga Faro inga ki du be re; mi ki di gu zuzu bakakue re ki piri he ku rogo ga Faro inga, mi ki fu he ku be Faro.”

¹²Yosefa ki ya fu ko, “Gere nga sangbaha: gu behe nidu biata si nga rame biata;

¹³rame koyo biata Faro ki kusi ro, ki karaga ro ku pati ga sunge; mo ki nifu ga Faro inga ku be ko, wa si nidu mbata ho mo adu ni ni gako bafuriahe.

¹⁴Ono mo tíngidi pa re, ho pai ka ngba ni foro, mi nazungadi ro, mo yúgu inapai fere, ki tingidi pa re fu Faro, ki kusi re rogo gi bambu re.

¹⁵Bambiko i atuka re atuka ni rengo rogo gu ringara nga ga aEbere. Mi amanga nga pai no i aba re ti ni ku bambukisa no a te.”

¹⁶Ho baira abagbindiriahe abi he ni ya ngba sangbaha angba, ko ki ya fu Yosefa, “Mi nirari musumo a wo: Mo ngére, abaga nidu rire biata na ngbatunga kpokuta rogo ho,

¹⁷rogo gu baga nidu ku ari dungu ngbatunga zozo riahe nidu yo tipa Faro. Azire ki niri he rogo baga ku rire.”

¹⁸Yosefa ki karaga ha ki ya, “Gere nga sangbaha: agu abaga nidu biata si nga rame biata;

¹⁹rame koyo biata Faro ki kusi ro ― ka asi ro ti ngua; azire ki riti pasioro ti ro.”

²⁰Fuo gere ti biata rame nga gu nangia rago tingida pa rago batika Faro, ko ki mangi pumbo fu avuruko dunduko. Ko ki kusi baira abafuriahe na baira abagbindiriahe ku dagba gako amoyambu yo.

²¹Ko ki karaga baira abafuriahe sa gako sunge berewe, ko ki nifu inga ku be Faro.

²²Ono ko aasi baira abagbindiriahe a wa Yosefa ayugu pa ha fu yo.

²³Ono baira abafuriahe atingida nga pa Yosefa te, bangiriko ago ti ko.