Read zande Bambata Pai 41 Bible Online

Bambata Pai 41 - zande bible

Bambata Pai 41

¹Si ki ta du wa gere, ti digida agarã ue dunduko. Faro arari musumo, ko naru pangba di nga Nire.

²Mo ngére, anaabagara saba ki kuru Nire yo, ni mbuyumbuyu ra ni kikindigi ra. Ami ki niri nvuondiwiri.

³Mo ngére, kura anaabagara saba ki kuru Nire yo ni ngorokonya ra ni saarasaara ra, ki rundu pati akura rapavuru Nire.

⁴Gu ngorokonya saarasaara anaabagara ki riti agu abagara saba nadu mbuyumbuyu ni kikindigi ra. Faro ki zingi rame yo.

⁵Ko ki ti ni rame berewe, ki rari musumo ni ue he; mo ngére, nganu ki zara saba ti kina gu katakpaha sa, ni wene kikindigi he.

⁶Mo ngére, fuo ho kura nganu ki zara saba ti kina gu katakpaha sa ni warawara ha ni uguhe be gu yuge naye uroyo.

⁷Gu warawara nganu nazara si ki riti gu nganu nazara saba nadu ni wene kikindigi he. Faro ki zingi rame yo. Mo ngére, musumo nadu.

⁸Si ki ta du wa gere wiso, ko ki du ni fudifudi ko toroko yo a; ko ki kedi sunge ki yambu abinza Ezipeta yo na airatatamana dunduko a. Faro ki gumba gako musumo fu yo, ono a nga boro sa narengbe na yugo sangbaha fu Faro te.

⁹Baira abafuriahe ki gumba pai fu Faro ki ya, “Mi tingidi pa gi ingaapai areme.

¹⁰Faro azingi kuti gako amoyambu, ki ba re ku rogo gu vuru bambu nga ga gu barutiri ababandarago, ani na baira abagbindiriahe.

¹¹Ani amongo rari musumo ni kina gu yuru sa, ani na ko. Ani arari musumo dunduko, na sangbaha ni ba sa sa.

¹²Ani adu yo na paranga nangia Ebere, ko nangia moyambu fu barutiri ababandarago. Ani ki gumba ha fu ko, ko ki yugu sangbaha fu rani ni ba sa sa kuti gaani musumo.

¹³Si ki ta du wa gere; wa ko ayugu sangbaha fu rani, kina wo si adu, Faro akaraga re tigimi sa gimi sunge. Baira abagbindiriahe ko aasi ko.”

¹⁴Faro ki kedi sunge ki yambu Yosefa, i ki kusi ko zaza bambukisa yo. Ko ki kpe maingbako, ki ukadi kura gako roko, ki ye koyo du Faro ni.

¹⁵Faro ki ya fu Yosefa, “Mi nirari musumo, a nga boro ho sa rengbe na yugo sangbaha fere te. Mi gi gu pai i nigumba ha tipa ro ya ho mo nigi pa musumo ni, mo nirengbe na yugo sangbaha.”

¹⁶Yosefa ki karaga ha fu Faro ki ya, “A nga si mbiko gi pai te; Mbori nikakaraga bawene pai fu Faro.”

¹⁷Faro ki ya fu Yosefa, “Mo ngére, rogo gi musumo, mi niru pangba Nire;

¹⁸anaabagara saba nikuru Nire yo ni kikindigi ra mbuyumbuyu. Ami ki riti nvuo ndiwiri.

¹⁹Kura anaabagara ki kuru ngba fuo ra saba, ni ngorokonya ra ni saarasaara ra, ki du ni gongbogongbo ra. Mi abi nga nya ringara Ezipeta no wa ami mbata wa sa te.

²⁰Gu ngorokonya saarasaara ra ki riti gu bambata kikindigi anaabagara nidu saba.

²¹Ho ami niriti ra ni, ka i aina nga ya ami riti ra ya, ono ami nidu ni ngorokonya ra kindi, a wa ami nidu mbata. Fuo gure mi ki zingi rame yo.

²²Mi nibi nganu rogo gi musumo yo nizara saba ti katakpaha sa, ni wene kikindigi he,

²³zarazara nganu ki kuru fuo ho saba ni warawara ha rukutu ni uguhe be gu yuge naye uroyo.

²⁴Gu warawara nganu ki riti gu wene kikindigi nganu nidu saba re. Mi ki gumba ha fu abinza, ono a nga gu ni sa nirengbe na yugo sangbaha fere te.”

²⁵Yosefa ki ya fu Faro, “Ga Faro musumo si kina sa; gu pai Mbori nikamanga ha si ko niyugu pa ha fu Faro.

²⁶Gu wene kikindigi anaabagara nidu saba si nga garã saba; na gu wene kikindigi nganu nazara nidu saba si nga garã saba; sangba musumo kina sa.

²⁷Gu ngorokonya saarasaara anaabagara nidu saba nga agu ra nikuru ngba fuo ra si nga garã saba, na gu warawara nganu nizara nidu saba, nga gu nidu ni uguhe be gu yuge naye uroyo, si a nga garã gberãngbi saba.

²⁸Si nga kina gu pai mi nigumba ha fu Faro, gu pai Mbori nikamanga si yugu ko pa ha fu Faro.

²⁹Garã bakere idiidi riahe nikadu saba rogo ringara Ezipeta dunduko,

³⁰fuo ho garã gberãngbi ki du saba, pa gu bakere idiidi riahe re agó ago bangiri aboro rogo ringara Ezipeta dũ; gberãngbi agbárasa ringara dunduko.

³¹I atíngida nga pa gu bakere idiidi riahe re rogo ringara mbiko gu gberãngbi nikaye fuo ho te, bambiko si adú ni kere he gbe.

³²Gi musumo re ki mangi fu Faro bara ue, bambiko si ni ringbisiringbisi he be Mbori nzunzu, Mbori nikamanga ha mbembedi awere.

³³Ono Faro sía boro rugatise sa ni iratatamana, ki moi ni ni zogo ringara Ezipeta dunduko.

³⁴Faro mángi gere, ki moi ababiapai ku ri ringara, i kpáraka sa dagba bisue ti aũati rogo ringara Ezipeta rogo agarã bakere idiidi riahe saba.

³⁵I dúdungura riahe dunduko rogo gu wene agarã nikaye re, i iigi zende ahe ku be Faro ni riahe ku rogo abaakporo, ki nibanda ha.

³⁶Gu riahe re, si adú ni igiigi he tipa ringara kuti agu agarã gberãngbi nikadu saba nga gu nikati ku rogo ringara Ezipeta, ka ringara agbérã nga be gberãngbi ya.”

³⁷Gi pai re si ki ngba bangiri Faro, na bangiri avuruko dunduko.

³⁸Faro ki ya fu avuruko, “Ani rengbe na bi kura boro ho wa gi kumba re, nga gu ni du na ga Mbori Toro ti ni?”

³⁹Si du Faro ki ya fu Yosefa, “Wa kina Mbori nayugu gere dunduko foro, a nga boro rugatise ho ni iratatamana wa mo te;

⁴⁰mo nikadu ku ri gi kporo, kina gu pai mo ka agumba ha kina ha i ka aruga avurure dunduko kuti ni; kina sunga auru mbatabakindo si mi ka kia ti ni ki susi ro.”

⁴¹Faro ki ya fu Yosefa, “Mo ngére, mi moi ro ku ri ringara Ezipeta dunduko.”

⁴²Faro ki di tongo ti wirinzagako, ki moi ru ti wirinzaga Yosefa, ki ukadi ko ni wene tutu roko giri nzibi, ki moi azogbo dahabu kugorõko.

⁴³Ko ki fu gu gako ue ngbagida fu ko ko nindú rogo ho; i ki ningbiko barangba ko, niya, “Aboro kuku!” Were ko amoi ko ni bazogo ku ri ringara Ezipeta dunduko.

⁴⁴Ku ri gere Faro ki ya fu Yosefa, “Mi nga Faro, a nga boro sa nikamanga pai rogo ringara Ezipeta zanga fugoro wa sa te.”

⁴⁵Faro ki yambu rimo Yosefa nga Safenata-panea, ki fu Asenata fu ko ni diako nangia wiri Potifera nadu ni boromotumo Ono yo. Yosefa ki nita ata rogo ringara Ezipeta dunduko.

⁴⁶Garã Yosefa adu 30 ho ko atona sunge ni fu Faro nangia bakindo Ezipeta. Yosefa ki guari bara bangiri Faro, ki nita rogo ringara Ezipeta dunduko.

⁴⁷Ti garã bakere idiidi riahe saba, sende ki kusi riahe kpaima.

⁴⁸Ko ki nidungura gu riahe dunduko nangia ga agarã saba re, nga gu nadu ringara Ezipeta yo, ki niigi gu riahe re ku rogo abaakporo yo; gu riahe nakura aati yo, pati abaakporo kirikiri dunduko, ko ki niigi kina ha rogo gu bakporo re.

⁴⁹Yosefa ki niigi zende ahe ni bakere he gbe, wa kina ngume pangba baime, daho ko ambu pa geda ha ni, bambiko si asusi bageda ha.

⁵⁰I abatika akumbagude ue fu Yosefa mbata fu da garã gberãngbi, nga agu yo Asenata wiri Potifera, nangia boromotumo Ono yo, abatika yo fu ko.

⁵¹Yosefa ki yambu rimo bambata wiriko nga Manase, ko aya, “Bambiko Mbori gbandaka pa mbugo gimi asunge dunduko bangire, na pa ga buba aborokporo a dunduko.”

⁵²Ko ki yambu rimo gu ue wiriko nga Efuraima, “Bambiko Mbori zugasi re rogo ringara gi rungo.”

⁵³Gu garã bakere idiidi riahe re saba nadu ringara Ezipeta yo, si ki digi.

⁵⁴Agarã gberãngbi saba ki tona ka ye, a wa Yosefa agumba ha. Gberãngbi ki ti ku rogo ringara dunduko; ono riahe ki du kina ringara Ezipeta yo sa.

⁵⁵Ho gomoro amoi pai ni rogo ringara Ezipeta dunduko, aboro ki nikpari fu Faro tipa riahe; Faro ki ya fu aEzipeto dunduko, “Oni ndú koyo du Yosefa ni; gu pai ko ka gumba ha fu roni, oni ki mangi kina ha.”

⁵⁶Gberãngbi ki ti ku auru kpotosende zegino dunduko. Yosefa ki za angbadimo asoro dunduko, ki nibagi riahe fu aEzipeto, bambiko gberãngbi adu ni kere he rogo ringara Ezipeta.

⁵⁷Aboro ki ye rogo aringara dunduko ku Ezipeta yo koyo du Yosefa ni, ka ngbeka zende ahe bambiko gberãngbi adu ni kere he rogo kpotosende zegino dunduko.