Read zande Bambata Pai 42 Bible Online

Bambata Pai 42 - zande bible

Bambata Pai 42

¹Ho Yakoba agi he ni ya zende ahe du Ezipeta yo, ko ki ya fu awiriko, “Tipagine oni angana kina akuaroni ti ni?”

²Ko ki ya, “Oni ngére, mi gi he ya zende ahe du Ezipeta yo. Oni ndú koyo ka ngbeka zende ahe fu rani yo, ani báti, ka ani akpíka nga ya.”

³Awiriba Yosefa bawe, i ki ndu ka ngbeka zende ahe Ezipeta yo.

⁴Ono Yakoba akeda nga Benyamina nangia wirina Yosefa na awiribako te, bambiko ko agunde ya gbegberẽpai ka manga ko yo.

⁵Awiri Yisaraere ki ye ka ngbeka zende ahe wa sa na agu aboro naye, bambiko gberãngbi ati ku ringara Kanana yo.

⁶Yosefa adu ni bazogo ku ri ringara Ezipeta; kina ko sa naabaga ahe fu aboro ringara dunduko. Awiriba Yosefa ki ye, ki tumusa ku sande bara bangiri ko.

⁷Yosefa ki bi awiribako, ko ki ini yo, ono ko ki sa tiko wa kungba boro fu yo, ki nigumba pai fu yo kpasiaka. Ko ki ya fu yo, “Wari oni aye ni?” I ki ya, “Ringara Kanana yo ka ngbeka zende ahe.”

⁸Yosefa ki ini awiribako, ono i aina nga ko te.

⁹Yosefa ki tingidi pa agu amusumo nga gu ko arari he tipa yo; ki ya fu yo, “Abamoirago nga oni, ye oni aye ka bi ku ringara.”

¹⁰I ki ya fu ko, “Oõ, bairarani, gamo amoyambu niye ka ngbeka kina zende ahe.

¹¹Ani nga kina awiri gu kumba sa dunduko. Aboro rengo nga ani, a nga abamoi nga gamo amoyambu te.”

¹²Ko ki ya fu yo, “Oõ, ono ye oni aye ka bi ku ringara.”

¹³I ki ya. “Ani nga gamo amoyambu, ani nga awiriba 12, nga kina awiri gu kumba sa rogo ringara Kanana. Mo ngére, kina gaani kiaro du ho areme sa na barani, gu kura ni, ni ho te.”

¹⁴Yosefa ki ya fu yo. “Kina si mi agumba ha fu roni re, ya abamoirago nga oni.

¹⁵I nikaasada roni were: Wa du Faro ni ungako oni agúari nga no mbata fu da gaoni kiaro no te.

¹⁶Oni kédi boro sa dagba roni yo ni ye na tameroni, oni ki sungu bambukisa yo, i bi go gaoni apai, si ngia aboro rengo nga oni; ka si adú nga wo ya, wa du Faro ni ungako, oni du ni abamoirago ni rengo.”

¹⁷Ko ki moi yo dunduko ku bambukisa yo tipa rame biata.

¹⁸Ti gu biata rame re, Yosefa ki ya fu yo, “Oni mángi gere ka bata, bambiko mi nagunde ti Mbori:

¹⁹si ngia aboro rengo nga oni, oni ídi he i dika gu ni sa dagba roni ku bambukisa yo; ono agu roni ki ndu tigaoni ka tinda zende ahe tipa gu gberãngbi namanga gaoni aborokporo.

²⁰Oni ki ye na gaoni kiaro kono du mi ni; si du mi ka ina ti ni ya gaoni pai nga rengo ka oni akpíka nga ya.” I ki mangi wo.

²¹I ki ya dagba yo, “Ngbanga ima gberã fu rani ni rengo mbiko pa tamerani, wa ani abi gako rungosiro, ho ko azungadi rani ni, ka ani agia nga ha ya; si du ye gi rungosiro ti ni re ku ri rani.”

²²Rubena ki karaga ha fu yo ki ya, “Ati mi agumba ha fu roni ya, ka oni íngi nga pai kuti gude ya? Ka oni agia nga ha ya. Oni ngére, si i nikaira bape kureko ti ni.”

²³I aina nga ya Yosefa rugu tiko na payo te, bambiko basafugo adu dagba yo na ko.

²⁴Ko ki aria tiko pati yo, ki nikpari ni aume; ko ki karaga tiko berewe fuo yo ki gumba pai fu yo. Ko ki di Simona dagba yo, ki vo ko ku bangiriyo.

²⁵Yosefa ki rugu aboro i hihisi gayo agbaguda ni zende ahe, ki karaga gayo amarã ni ba sa sa ku rogo gayo agbaguda, ki fu riahe fu yo tipa gene a. I ki mangi he fu yo kina wo.

²⁶I ki tapa gayo zende ahe ku auru gayo adongi, ki guari yo.

²⁷Wa gu ko aza gako gbaguda ka fu riahe fu gako dongi baongoda yo, ko ki bi gako marã ti kina ngba gbaguda.

²⁸Ko ki ya fu awiribako, “I karaga gi marã; oni bí he, si kina ti ngba gi gbaguda!” Ngbaduyo ki nikua akua, i ki sa tiyo ki ningereke dagba yo, ki nikio akio, ki ya, “Gini pai nga gi mangi Mbori fu rani re?”

²⁹I ki ye koyo du Yakoba ni nangia bayo ringara Kanana yo, ki gumba gu pai fu ko dunduko namangi yo, ki ya,

³⁰“Bazogo gu ringara re afura fu rani kpasiaka, ki ya ye ani wa abamoirago.

³¹Ani ki ya fu ko, ‘Ani tigaani nga aboro rengo, abamoi nga ani te;

³²ani nga awiriba 12, ani nga kina awiri gu kumba sa; gu ni sa ni ho te, kina gaani kiaro du ho areme na barani kporo yo rogo gu ringara nga Kanana.’

³³Bazogo gu ringara re ki ya fu rani, ‘Mbiko gi pai re mi ka ina ha ti ni ya aboro rengo nga oni: nga oni mbú gu wiribaroni sa no, ki rogodi zende ahe tipa gu gberãngbi namanga gaoni aborokporo, ki ga.

³⁴Oni ki ye na tameroni kono du mi ni; si du mi ka ina ti ni ya, abamoi nga oni te, aboro rengo nga oni. Si du mi ka gasa wiribaroni ti ni fu roni, oni ki ningbeke gaoni ahe rogo gi ringara re tie.’ ”

³⁵Si ki ta du wa gere, wa i auka ahe rogo gayo agbaguda; oni ngére, ga aboro vodivodi marã ni ba sa sa adu rogo gayo agbaguda yo. Ho i na bayo abi gu vodivodi marã ni re i ki gunde.

³⁶Yakoba nangia bayo ki ya fu yo, “Oni nazangasi re ni rogoda awire be re: Yosefa ho te, Simona ho a te, oni nikadia Benyamina be re berewe; agi apai re dunduko kina kuti re.”

³⁷Rubena ki ta gumba pai fu bako, niya, “Ka mi ayéga nga na ko foro ya, mo ki imi agu awire du ue. Mo fú ko ku be re, mi ki yega na ko berewe.”

³⁸Yakoba ki ya, “Wire andu nga na oni koyo te, bambiko wirinako aima kpi, ko ki nye ni sa ko. Ka gbigbitapai mangi ko ngba gu gene oni andú ngba ha re, si wa oni nakeda re ku murã yo na pusi mangerire na kina rungo.”