Read zande Bambata Pai 43 Bible Online

Bambata Pai 43 - zande bible

Bambata Pai 43

¹Gberãngbi ki du ni kere he rogo ringara.

²Si ki ta du wa gere, ho i ariti gu zende ahe ni nga gu i ayega na ni Ezipeta yo, bayo ki ya fu yo, “Oni ndú berewe ka ngbeka bete zende ahe fu rani.”

³Yuda ki ta gumba pai fu bako niya, “Gu kumba re agumba pai fu rani nyanyaki, niya, ‘Ka oni ayé nga na tameroni ya oni abí nga kpakpure te.’

⁴Ka mo kédi rani na tamerani, ani ki ndu ka ngbeka riahe foro, ono ka mo akéda nga ko ya,

⁵ani andú nga koyo te, bambiko gu kumba aya fu rani re, ‘Ka oni ayé nga na tameroni ya, oni abí nga kpakpure wa sa te.’ ”

⁶Yisaraere ki ya, “Tipagine oni amangi fere ti ni gbegberẽ wa oni aya fu gu kumba re kura tameroni kina ho?”

⁷I ki karaga ha ki ya, “Gu kumba re asasana rani sirisiri, tipa gaani apai dũ, na tipa ngbatungarani a, ki ya, ‘Baroni kina ho ni ungako? Kura tameroni kina ho?’ Ani ki gumba pai rengbe kuti gako asasanahe. Ka ani awiri pa ina ha waĩ ya ko aya. ‘Oni yé na tameroni kono’?”

⁸Yuda ki ya fu Yisaraere nangia bako, “Mo kédi gu paranga re wa sa na mi, ani ki guari ki ndu, ani ki bati, ka ani akpíka nga ya, ani na mo na gaani rukutu agude a.

⁹Mi adú tipa gako pai foro; mo aida gako pai kina be re. Ka mi ayéga nga na ko foro ki moi ko bara bangiro ya, pako ki nye ku ri re kindi.

¹⁰Ka ani aima nga ya, ka ani aima yega wa du rago re bara ue.”

¹¹Bayo ki ya fu yo, nangia Yisaraere, “Ka si du wo awere, oni mángi gere tie; oni rógodi kangburukangburu zuzuhe nga ga gi ringara re ku rogo gaoni agbaguda, oni ki tindi gamahe fu gu kumba re, nga bete tome ngua nga ngua kaza na bete anyege, na wene fuõ tomengua, na mure, na kpakari, na zuzu ngua wiri anzari.

¹²Oni ki rogodi marã ku be roni wa bara ue; gu marã i akaraga ha kuti ngba gaoni agbaguda; oni gási he berewe, si ngia si abirikpo abirikpo be yo.

¹³Oni gúari ki di tameroni a, ki ndu koyo du gu kumba ni re berewe;

¹⁴Mbori du na tandu apai dũ, ko íni pai fu roni ku be gu kumba re, ko gási kura wiribaroni fu roni nga Benyamina a. Ka i vura zangasi re na awire vurũ, i zángasi re azángasi.”

¹⁵Akumba ki rogodi gu gamahe re, i ki rogodi marã ku be yo wa bara ue, na Benyamina a. I ki guari, ki ndu ku Ezipeta yo, ki ru bara bangiri Yosefa.

¹⁶Ho Yosefa abi Benyamina ni na yo ko ki ya fu buruku gako kporo, “Mo yé na agi akumba re ku dimo no, oni ími nya ki mbakadi riahe, bambiko ani arí riahe na agi akumba re bebere uru.”

¹⁷Buruku ki mangi kina sangba Yosefa, ko ki rimisi akumba ku dimo ku Yosefa yo.

¹⁸Akumba ki nigunde agunde bambiko i arimisi yo ku dimo ku Yosefa yo. I ki ya, “Rimisi yo rani ku dimo no tipa pa gu marã i akaraga ha ku rogo gaani agbaguda ti mbata ye ani, ka maa ngbanga ri rani ya ko zí rani, na gaani adongi, ki sa rani ni akanga.”

¹⁹I ki mbedi koyo du buruku ga Yosefa kporo ni, ki gumba pai fu ko pa ngbadimo bambu,

²⁰ki ya, “Ako bairarani, ani aye kono ti mbata ye ani ka ngbeka riahe ni rengo.

²¹Si ki ta du wa gere, ho ani ada ni ku baongoda yo ani ki za gaani agbaguda, mo ngére, ga aboro marã ni ba sa sa adu ti ngba kina gayo agbaguda, gayo marã ki du na ba ha; ani ye na kina ha be rani berewe.

²²Ani ye na kura marã be rani ka ngbeka riahe. Ani aina nga gu boro namoi marã ku rogo gaani gbaguda berewe te.”

²³Ko ki ya fu yo, “Zereda dú fu roni, ka oni gúnde nga ya; gaoni Mbori nga ga baroni Mbori, nafu gi kumuko re ku rogo gaoni agbaguda; mi abi gaoni marã.” Ko ki kusi Simona fu yo.

²⁴Buruku ki ye na agu akumba re ku dimo ku Yosefa yo, ko ki fu ime fu yo, i zundu nduyo na ni. Ko ki fu riahe fu gayo adongi.

²⁵I ki mbakadi gamahe mbata fu yega Yosefa bebere uru, bambiko i agi he ya i nikari riahe yo.

²⁶Ho Yosefa ayega ni, i ki ye na gu gamahe nadu be yo ku dimo yo, i ki tumusa ku sande bara bangiriko.

²⁷Ko ki sana yo ku kpuyo yo, ki ya, “Baroni kina ho wenengaĩ, nga gu gbinza kumba oni agumba pa ko fere re? Ko ni kina ungako?”

²⁸I ki ya, “Ga moyambu nga barani, ko kina ho wenengaĩ, ko ni kina ungako.” I ki dua riyo ni irisa fu ko.

²⁹Ko ki tuka bangiriko ki bi Benyamina nangia tameko nangia wirinako, ko ki ya, “Gaoni kiaro nga gi ko re, nga gu ko oni agumba pako fere re?” Ko ki ya fu Benyamina, “Mbori íni pai foro, wire!”

³⁰Were, ngbadu Yosefa ki du fuo kina wirinako, ko ki gbata gu ba ka ko ndu ka kpara rogo. Ko ki rimi ni ipo ku vuru gako bambu yo, ki nikpari ni aume.

³¹Ko ki zundu kpakpuko, ki kuru; ki mbakadi tiko, ki ya, “Oni yé na riahe.”

³²I ki moi riahe tipa ko ni sa ko, ki moi he tipa yo ni sa yo, na tipa agu aEzipeto nanari riahe na ko ni sa yo a, bambiko aEzipeto anari nga riahe na aEbere te, bambiko si adu ni gbegberẽ sino bangiri aEzipeto.

³³I ki sungusi yo ku bara bangiriko, wa du pa gayo unvuru ki da ti kiaro; gu ni ki ningere koyo du gu kurani ni na kina baka bangirise.

³⁴I ki kparaka kina gu riahe fu yo nadu ri ga Yosefa mbisa, ono ga Benyamina riahe ki susi gayo bara bisue. I ki mbiri he, ki ningi dagba yo na ko.