Read zande Bambata Pai 45 Bible Online

Bambata Pai 45 - zande bible

Bambata Pai 45

¹Ka Yosefa arengba nga na zeresa ngbaduko ku bara bangiri agu yo dunduko naru pati ko ya; ko ki poi ku ari ki ya, “Aboro kúru pati re dunduko.” A nga boro sa naru pati ko ho Yosefa ayugu tiko ni fu awiribako te.

²Ko ki nikpari ku ari ni aume, aEzipeto ki nigi he, ga Faro aborokporo ki gi he a.

³Yosefa ki ya fu awiribako, “Mi nga Yosefa; buba kina ho ni ungako kindi?” Ngba awiribako ki zere azera gbodo, bambiko i azigba azigba wa ko aru bara bangiriyo.

⁴Yosefa ki ya fu awiribako, “Mi nazungadi roni, oni yé kono du mi ni.” I ki ye koyo du ko ni. Ko ki ya fu yo, “Mi nga Yosefa nga wiribaroni, nga gu ko oni abagi ko ku Ezipeta no.

⁵Awere ka oni rúngo nga kpotoroni yo ya; ka oni zíngi nga fu tironi ya oni abagi re kono ya; bambiko Mbori nakedi re ku mbata no fu roni mi bátasi aboro.

⁶Bambiko gberãngbi du rogo ringara tipa agi agarã du ue re; agarã koyo bisue i asópa nga bino rogo ho te ki ke ahe a te.

⁷Mbori akedi re ku mbata no fu roni mi banda ngbatungaroni zegino, ka batasa roni ni ungaroni ni dungu roni.

⁸A nga oni nakedi re kono te, ono kina Mbori. Ko asa re wa ba fu Faro, ni gbia gako kporo dunduko, ni bazogo ringara Ezipeta no dũ.

⁹Oni ndú ni ngarã fuo buba, ki ya fu ko, ‘Ya Yosefa nga wiro wẽ, Mbori asa re ni gbia Ezipeta dunduko; mo yé kono du mi ni, ka mo íma nga ya.

¹⁰Mo asúnga rogo ringara Gosene, mo adú mbembedi na mi, oni na awiro, na atitaro, na gamo rimbasa akandoro, gamo rimbasa abagara, na agu ahe dunduko du be ro.

¹¹Mi nikabanda ro yo, bambiko garã gberãngbi koyo kindi bisue; mo ka ndú ka sa tiro ni rungorungo boro, oni na gamo aborokporo, na agu ahe dunduko du be ro.’

¹²Oni ngére, bangironi ima bi he, na bangiri wirinina nga Benyamina ya kina boro ngbare nigumba pai fu roni.

¹³Oni ki gumba pa gu gi taarimo dunduko du Ezipeta no fu buba, na pa agu apai dunduko bi oni he. Oni ki ipisi pa ye na buba kono.”

¹⁴Ko ki ti ku ri gorõ Benyamina yo nangia wirinako, ki nikpari ni aume; Benyamina ki nikpari ni aume ku ri gorõkoa.

¹⁵Ko ki nyoro pangba awiribako dunduko, ki nikpari ni aume ku ri yo. Fuo gure awiribako ki tona fura na ko.

¹⁶Ho i agi pande he ni ku Faro yo, ya, “Awiriba Yosefa ye,” si ki ngba ti Faro gbe na gako amoyambu a.

¹⁷Faro ki ya fu Yosefa, “Mo yá fu awiribamo. ‘Oni mángi gere: oni tápa ahe ku ri gaoni adongi, ki ga, oni ki ndu ku ringara Kanana yo;

¹⁸ki di baroni na gaoni aborokporo, ki yega kono du mi ni. Mi afú gu ringara fu roni Ezipeta no du ni wene he ki susi, oni arí fee ringara a.’

¹⁹Awere, mo rúgu yo ki ya, ‘Oni mángi gere: oni rógodi angbagida ringara Ezipeta no tipa rukutu awironi, na tipa adiaroni, oni ki di baroni, oni ki yega kono.

²⁰Ka oni bérẽ nga pa gaoni ũkumuko a ya, bambiko gu wene ahe dunduko du ringara Ezipeta no gaoni nga ha.’ ”

²¹Awiri Yisaraere ki mangi he wo; Yosefa ki fu angbagida fu yo, a wa Faro arugu ko na ni, ko ki fu riahe fu yo tipa gene.

²²Ko ki fu kura aroko fu yo ni ba sa sa, ono ko ki fu sekere feda 300 na roko bisue fu Benyamina.

²³Ko ki kedi agi ahe re fu bako: adongi bawe na gu wene ahe nangia ga Ezipeta ni tapatapa ha ku ri ra, na anadongi bawe, na zende ahe na kpokuta na riahe, ni tapatapa ha ku ri ra tipa bako ku gene.

²⁴Si du ko ki asia awiribako, ko ki ya fu yo, wa i aga, “Ka oni pói nga dagba roni gene ya.”

²⁵I ki guari Ezipeta yo, ki ye ku ringara Kanana yo koyo du Yakoba ni nangia bayo.

²⁶I ki gumba ha fu ko ki ya, “Yosefa kina ho ni ungako kindi, ko nga bazogo ku ri ringara Ezipeta dunduko a.” Kpotoko yo ki yungura ayungura, bambiko ko aida nga sangbayo ya rengo nga ha te.

²⁷I ki gumba ga Yosefa apai fu ko dunduko, nga gu ko agumba ha fu yo. Ho ko abi agu angbagida ni nga gu Yosefa akedi he ka tinda ko rogo, toro Yakoba ki wasa awasa, nangia bayo;

²⁸Yisaraere ki ya, “Si rengbe. Yosefa nga wire kina ho ni ungako kindi; mi andú ka bi ko mbata mi nikakpi.”