Read zande Bambata Pai 46 Bible Online

Bambata Pai 46 - zande bible

Bambata Pai 46

¹Yisaraere ki guari na gako ahe dunduko, ki da ku Bera-saba yo, ko ki tumo yo ni amotumo fu Mbori nga ga Yisaka Mbori nangia bako.

²Mbori ki gumba pai fu Yisaraere rogo yuguyugu pai yuru, ki ya, “Yakoba, Yakoba.” Ko ki ya, “Mi du re.”

³Ko ki ya, “Mi nga Mbori, gu Mbori nga ga bamo ko; ka mo gúnde nga tipa ndu ku Ezipeta yo ya; bambiko mi asá ro yo ni bakere rikaaboro.

⁴Ani andú na mo ku Ezipeta yo. Ani ki yega na mo berewe a; Yosefa ki kisi bangiro ni beko.”

⁵Yakoba ki guari Bera-saba yo; awiri Yisaraere ki tindi Yakoba nangia bayo, na rukutu awiriyo, na adiayo, rogo agu angbagida Faro akedi he tipa tinda ko rogo.

⁶I ki rogo gayo zogozogo anya, na gayo ahe dũ nga gu i abi he ringara Kanana yo, i ki da ku Ezipeta yo, aYakoba na ngbatungako dunduko,

⁷awiriko, na awiri awiriko nangia akumba, awiriko nangia ade na awiri awiriko nangia ade; na ngbatungako dunduko, ko ayega na yo ku Ezipeta yo.

⁸Gere nga rimo awiri Yisaraere nga agu yo nayega ku Ezipeta yo, Yakoba na awiriko. Rubena nangia bambata wiri Yakoba,

⁹na awiri Rubena: Anoka, Paru, Eserone na Karumi.

¹⁰Awiri Simona: Yemuere, Yamina, Oada, Yakina, Soara, na Saura nangia wiri dere aboro Kanana.

¹¹Awiri Revi: Gerusona, Koata, na Merari.

¹²Awiri Yuda: Ere, Onana, Sera, Perese, na Zera, ono Ere na Onana akpiki kina ringara a Kanana yo; awiri Perese nangia Eserone na Amura.

¹³Awiri Yisasakara: Tora, Puva, Yobo, na Simerona.

¹⁴Awiri Zeburuna: Serede, Erone, na Yarere,

¹⁵agi yo re ki ngia awiri Rea, nga agu yo ri abatika yo fu Yakoba Padana-arama yo, na wiriko nangia Dina ni de; awiriko adu dunduko nga akumba na ade wa 33.

¹⁶Awiri Gada: Sifeyona, Agi, Suni, Esebone, Eri, Arodi, na Areri.

¹⁷Awiri Asera: Yimena, Yiseva, Yisevi, Beria, na Sera nangia dawiriyo. Awiri Beria ki ngia Ebere, na Marekiere,

¹⁸agi yo re nangia awiri Zirepa, nga gu ri Rabana afu ri fu wiriko nangia Rea; ri ki batika agi yo 16 re fu Yakoba.

¹⁹Awiri Raere, dia Yakoba: Yosefa na Benyamina.

²⁰Yosefa ki batika aManase na Efuraima ringara Ezipeta yo, nga agu yo Asenata abatika yo fu ko nangia wiri Potifera, nangia boromotumo Ono yo.

²¹Awiri Benyamina: Bera, Bekere, Asebere. Gera, Namana, Ei. Roso. Mupima, Upima, na Arada,

²²agi yo re nangia awiri Raere, nga agu yo Yakoba abatika yo wa aboro 14.

²³Wiri Dana: Usima.

²⁴Awiri Nafatari: Yasere, Guni, Yesere, na Sirema,

²⁵agi yo re nangia awiri Bira, gu ri Rabana afu ri fu wiriko nangia Raere. Agi yo re ri abatika yo fu Yakoba wa aboro saba.

²⁶Agi yo re dunduko nayega na Yakoba ku Ezipeta yo, nangia agu yo naenge ti kina ko, kpara kina dere awiriko, i adu dunduko 66;

²⁷awiri Yosefa adu ue nangia agu yo i abatika yo fu ko Ezipeta yo. Ngbatunga Yakoba ki du dunduko 70, nga agu yo nayega ku Ezipeta yo.

²⁸Ko ki kedi Yuda ku mbata yo fu ko koyo du Yosefa ni, ka yugo gene fu ko ku mbata yo ku Gosene yo; i ki da ku ringara Gosene yo.

²⁹Yosefa ki mbakadi gako ngbagida, ki ndu ka gbia bako nangia Yisaraere Gosene yo; ko ki yugu tiko fu ko, ki ti ku gorõko yo, ki nikpari ni gbanga ha ni aume ku ri gorõko.

³⁰Yisaraere ki ya fu Yosefa, “Awere mi rengbe ka kpi, wa bi mi kpakpuro, ki ini he nga mo ni ungaro kindi.”

³¹Yosefa ki ya fu awiribako na fu ga bako aborokporo, “Mi nikandu ka yugo ho fu Faro, ki ya fu ko, ‘Awiribuba na ga buba aborokporo ima da kono du mi ni, nga agu yo naadu ringara Kanana yo;

³²agi akumba re nga ababanda akandoro, bambiko i nangia abazogo anya. I ye na gayo rimbasa akandoro, na gayo rimbasa abagara, na gayo ahe dunduko.’

³³Si adú wa gere, ho Faro ka yamba roni ni, ki ya, ‘Gaoni sunge nga gine?’

³⁴Oni ayá. ‘Gamo amoyambu ningia abazogo anya, tona ti parangarani ki da ku awere, ani na abarani a.’ Si du oni ka araka ti ni kina ringara Gosene yo; bambiko ababanda akandoro dunduko gberẽ bangiri aEzipeto ki susi.”