Read zande Bambata Pai 47 Bible Online

Bambata Pai 47 - zande bible

Bambata Pai 47

¹Yosefa ki ndu ki gumba ha fu Faro, ki ya, “Buba ye ringara Kanana yo na a wiribuba; na gayo rimbasa akandoro, na gayo rimbasa abagara, na agu ahe dunduko naadu be yo, i ringara Gosene yo awere.”

²Ko ki rogo akumba bisue dagba awiribako, ki yugu yo fu Faro.

³Faro ki ya fu awiriba Yosefa, “Gaoni sunge nga gine?” I ki ya fu Faro “Ababanda akandoro nga gamo amoyambu, a wa abarani adu.”

⁴I ki ya fu Faro, “Ani naye ka sunga rogo gi ringara re; bambiko a nga riahe ho tipa ga gamo amoyambu rimbasa anya te, bambiko gberãngbi ni kere he ringara Kanana yo. Si du ani azungadi ro ti ni awere, mo ídi he fu gamo amoyambu ani súngu ringara Gosene yo.”

⁵Faro ki gumba pai fu Yosefa, ki ya, “Bamo yega na awiribamo kono du mo ni.

⁶Ringara Ezipeta mo abi a re; bamo súngu na awiribamo rogo kina gu ringara ngba ki susi; i súngu ringara Gosene yo; ka mo ini pa gu ngangarã aboro dagba yo, mo ki sia yo i dú ni babanda gimi zogozogo anya.”

⁷Yosefa ki ye na bako nangia Yakoba, ki moi ko bara bangiri Faro. Yakoba ki fu maku fu Faro.

⁸Faro ki ya fu Yakoba, “Agarãro waĩ nga ga arame ungaro?”

⁹Yakoba ki ya fu Faro, “Mi adu ni yarayara re tipa garã 130 nga arame ungare. Garãre adu ni umba ha na rungo, ka si ange nga wa ga abuba rago garã yarayara yo nga arame ungayo ya.”

¹⁰Yakoba ki fu maku fu Faro, ki guari bara bangiri Faro.

¹¹Yosefa ki mbakadi apai tipa bako na awiribako nifu rago fu yo ringara Ezipeta yo, nga gu nangba ki susi rogo ringara Ramesese a wa Faro arugu ko na ni.

¹²Yosefa ki nimbu ti bako na awiribako na riahe, na ga bako aborokporo, ringbisi he kuti bange awiriyo a.

¹³Ka riahe adu nga rogo ringara dunduko ya; bambiko gberãngbi adu ni kere he gbe, were ringara Ezipeta na ringara Kanana arúngbura arungbura be gberãngbi.

¹⁴Yosefa ki dungura gu marã dunduko i abi he ringara Ezipeta yo na ringara Kanana yo, tipa zende ahe i angbeke he; Yosefa ki ye na marã ku Faro yo.

¹⁵Ho marã anyasi ni rogo ringara Ezipeta na ringara Kanana dunduko, aEzipeto ki ye koyo du Yosefa ni dunduko, ki ya, “Mo fú riahe fu rani; tipagine ani aka kpika ti ni ku bara bangiro erẽ? Bambiko gaani marã nyasi.”

¹⁶Yosefa ki ya, “Oni fú gaoni zogozogo anya, mi ki fu riahe fu roni ku ba gaoni anya, ka gaoni marã nyasi.”

¹⁷I ki ye na gayo zogozogo anya koyo du Yosefa ni; Yosefa ki fu riahe fu yo ku ba afarasi, na rimbasa akandoro, na rimbasa abagara, na adongi. Ko ki nirigi yo na riahe ku ba gayo zogozogo anya dunduko ni gu garã re.

¹⁸Ho gu garã re anyasi ni, i ki ye koyo du ko ni rogo ue garã, ki ya fu ko, “Ka ani óko nga ha ti bairarani, ya gaani marã nyasi dunduko te; wa du arimbasa zogozogo anya ni ga bairarani ra; a nga he ho nye ku bangiri bairarani fuo kina bororani na gaani rago te.

¹⁹Tipagine ani aka kpika ti ni ku bangiro, ani na gaani rago? Mo ngbé rani, ani na gaani rago, na riahe. Ani na gaani rago ki du ni akanga fu Faro. Mo ki fu tunga ahe fu rani ya ani nyé ni ungarani ka ani akpika nga ya, ka ringara adú nga ni ku he a ya.”

²⁰Si du Yosefa angbe ringara Ezipeta ti ni dunduko fu Faro; bambiko aboro Ezipeta ababagi gayo aati dunduko mbiko gu gberãngbi re ati ku ri yo ni kere he. Ringara ki du ni ga Faro;

²¹aboro tigayo ko asa yo ni akanga, tona ti gu bangbanda Ezipeta ku bani ki da ti kura bangbandaha ku bani a.

²²Kina ga aboromotumo ringara ko angbe nga ha ya; bambiko Faro anaunda aboromotumo, i ki niri kina gu riahe Faro anaunda yo na ni. Si du i abaga nga gayo rago ti ni ya.

²³Yosefa ki ya fu aboro, “Oni ngére nga, mi ngbe roni ni gi uru re, oni na gaoni rago fu Faro. Oni bí nga ha, tunga du re fu roni, oni arúka ha rogo gaoni aati.

²⁴Ho regbo ke ahe ka da ni oni afú sa dagba bisue rogo ho fu Faro. Gu biama ha dagba bisue he ki du ni gaoni tipa tunga tipa aati, na tipa gaoni riahe, na tipa gaoni aborokporo, na tipa rukutu awironi a.”

²⁵I ki ya fu ko, “Mo batasi rani; ani bi nga undahe bangiri bairarani, ani adú ni ga Faro akanga.”

²⁶Yosefa ki rú ndika tipa ringara Ezipeta, si da ku areme, ya sa dagba bisue rogo ho adú ni ga Faro; kina agu aati nangia ga aboromotumo naadu nga ni ga Faro ya.

²⁷AYisaraere ki niraki ringara Ezipeta yo, rogo gu ringara nga Gosene; i ki nibi ũkumuko yo, ki nizuga azuga, ki nge ange gbe.

²⁸Yakoba araki ku ringara Ezipeta yo garã ki du 17; garã Yakoba adu dunduko 147.

²⁹Rago Yisaraere ki mbedi ko kpi, ko kí yambu wiriko nangia Yosefa, ki ya fu ko, “Ka ngia ngba mi angba bangiro awere, mi nazungadi ro, mo mói bero ku tii ndure yo, ki kido he fere ya mo amánga fere nzunzu. Ka mo akpísida nga re Ezipeta no ya,

³⁰ono ho mi ka kpi ni fuo abuba; mo ki tindi re Ezipeta no ka kpisida re kina rogo gayo bakpisida aboro.” Yosefa ki ya, “Mi amánga ha a wa gumba mo ho.”

³¹Ko ki ya “Mo zúnga he fere”; ko ki zunga he fu ko. Yisaraere ki nugadi ku ti ba ri gako barame.