Read zande Bambata Pai 49 Bible Online

Bambata Pai 49 - zande bible

Bambata Pai 49

¹Yakoba ki yambu awiriko, ki ya, “Oni dúngura tironi, mi gúmba gu pai fu roni nikamanga roni ti kura arago ku mbata yo.

²Ako, oni awiri Yakoba; oni gbísi kono ka gia pai, ki dege turoni fu Yisaraere nga baroni.

³“Rubena, mo nga bambata wire, nga gi tandu na makawa gi ome, nga barumbatayo ni bahe, na barumbatayo ni ome a.

⁴Mo wa kina kungba ime, mo adú nga ni barumbatayo te, bambiko mo andu ku auru ga bamo ba; ki wasi he ― mo andu ku auru gi ba!

⁵ASimona na Revi nga awirina; gu ũvura nga ga zuu, si nga gayo abasape.

⁶Ako mbisimore, ka mo yé nga sa gayo rondo ya; Ako kpotore yo, ka mo kpámia nga tiro kuti gayo dunguratise a ya; bambiko rogo gayo zinga i naimo aboro, ki nikafu gbaga ndu abagara gbua.

⁷I tíwa gayo zinga, bambiko si du ni kere he; na gayo dingidingi ngbaduse a, bambiko si du sakparakpa! Mi akpáraka yo rogo Yakoba yo, ki gbandaka yo ku dagba aYisaraere yo.

⁸“Yuda, awiribamo atámbua ro; bero adú auru gorõ avuraro; awiribamo atúmusa ku bara bangiro ku sende.

⁹Yuda nga paranga bahu; wire, mo amoi pai, mbiko ũzia. Ko agbura, ki gbukia ku sande wa bahu, na wa kina nabahu a; da rengbe ka zingisa ko?

¹⁰Ngau bakindo agúari nga be Yuda te, ka ko azánga nga bafurugute dagba ngbatungako a ya, daho gu ko ka ye ni ku Siro yo; angbatunga aboro agía sangbako.

¹¹Ko navo gako wiri dongi kuti bakakue, na gako paranga nadongi kuti bawene bakakue ki susi, ko nazunda gako remu rogo imekakue yo, na gako gbanga roko rogo kure zuzu bakakue yo;

¹²bangiriko adú ni zamba ha be imekakue, rindiko ki du ni pusi he be mamuanya.

¹³“Zeburuna aráka ti ngba gango baime; ko ki du wa gbuduru fu abaakurungba, gako bangbanda rago ki da ti Sidona.

¹⁴“Yisasakara nga nyanyaki dongi, napi dagba andugu akandoro;

¹⁵ko ki bi he ya baongoda ho ngba, ringara ki du ni wene he; si du ko anugadi ti ni ka aka tindiro, ki du ni kanga ki nimangi sunge kanga.

¹⁶“Dana asápa ngbanga gako aboro wa du ko ni gu rika angbatunga Yisaraere sa.

¹⁷Dana adú wa basuru ngba gene, wa wo bangiri gene, nga gu ru narunda gida farasi, ya baoro ri ru ti ni giini.

¹⁸Ako Yekova, mi sungudi ga bata.

¹⁹“Gada, rikavura nikamanga ko, ono ko amánga yo amanga.

²⁰“Ga Asera riahe adú ni bawenehe, ko akúsa wene riahe wa ga abakindo.

²¹Nafatari nga nanzungba, zaki yo ru, ko nakusa wene apai.

²²“Yosefa nga bengua nazuka, nga gu bengua nazuka pati gugaabi; abehe nandu ku ri ndugu he.

²³Ko adu ni fudifudi ko be abaaguanza, i ki zumudi ko, nirungosi ko gbe;

²⁴ono gako mboto ki du na ome kindi, gu ome nga ga abeko ki du ni nyakasinyakasi he bambiko be gu Nyanyaki Ko nga ga Yakoba ko, mbiko rimo Babanda akandoro nga gu Mbia nga ga Yisaraere,

²⁵zavura be gu Mbori nga ga abamo ko, nga gu ko nikaunda ro, be Mbori du na Tandu apai dunduko nikafu maku foro, nga agu amaku nga ga ngbangbaturũ du ari yo, na agu amaku nga ga baime tii sende yo, na agu amaku nga ga amamuse na gu nga ga rukumbu a.

²⁶Agu amaku nga ga bamo si susi gu nga ga atitare, gu wene ahe nga ga nyenye abaagangara; si du ku ri Yosefa, ku ri gu ko nadu ni kparakpara ko ti awiribako.

²⁷“Benyamina nga waru nasipa pasio, wiso ko narita umozi, nyemu ko ki nikparaka gbugbuahe.”

²⁸Agi yo re nga angbatunga Yisaraere wa 12; gere ki ngia agu apai bayo agumba tipa yo, ki fu maku fu yo. Ko afu maku fu yo a wa si arengbe tipa yo ni ba sa sa.

²⁹Ko ki rugu yo ki ya fu yo, “I nikaga na mi koyo du atitare ni; oni kpísidi re fuo abuba rogo gu simbia du rogo gu ati nga ga Efurona nga boro Eto,

³⁰si nga gu simbia du rogo gu ati du Makepera yo, pati Mamare ku uroyo rogo ringara Kanana, nga gu Abarayama angbe be Efurona boro Eto, ni gako bakpisida aboro.

³¹Yo i akpisidi Abarayama ni na diako nangia Sara; yo i akpisidi Yisaka ni a na diako nangia Rebeka; yo mi akpisidi Rea ni a―

³²si nga ati na gu simbia rogo ho i angbe he be awiri Ete.”

³³Ho Yakoba adigisi pa ruga awiriko ni, ko ki rogo anduko ku auru ba, gako rame ki rengbe ko ki kpi, toroko ki ga koyo du atitako ni.