Read zande Bambata Pai 50 Bible Online

Bambata Pai 50 - zande bible

Bambata Pai 50

¹Yosefa ki ti kuti kpakpu bako ni nunga ki nikpari ni aume ku ri ko, ki ninyoro pangbako.

²Yosefa ki rugu gako amoyambu nangia abafungua i mbákadi kangba bako, abafungua ki mbakadi kangba Yisaraere;

³i ki digisi sunge he arame ki du 40, bambiko kina wo i nadigisa rame mbakada kangba. AEzipeto ki kpari ko tipa rame 70.

⁴Ho rame kparakpe tipa ko anyasi ni, Yosefa ki ya fu ga Faro aborokporo, “Ka ngia ngba mi angba bangironi, oni gúmba agi apai re fu Faro, nga,

⁵Buba arugu re, mi zúnga he, Buba ki ya, ‘Mo bí, mi nakpi: mo nikakpisida re kina rogo gi murã nga gu mi age tipa re ringara Kanana yo.’ Si du mi azungadi ro ti ni mo ídi he fere mi ndú ka kpisida buba, mi ki yega berewe.”

⁶Faro ki ya, “Mo ndú ka kpisida bamo, wa ko arugu ro mo zunga he.”

⁷Yosefa ki ndu ka kpisida bako. Ga Faro amoyambu dunduko ki ndu na ko na abaakumba gako kporo, na abaakumba ringara Ezipeta dunduko,

⁸na ga Yosefa aborokporo dunduko, na awiribako na ga bako aborokporo a; kina awiriyo na gayo rimbasa akandoro na gayo rimbasa abagara, i ambu ringara Gosene yo.

⁹Angbagidavura na abasunguri afarasi nandu na ko; si adu ni gu bakere rimbasa.

¹⁰I ki da ku rogo gu batakazende ahe nga ga Atada nga gu nadu mbiti Yaradene yo, yo i akpari ni nita ngbaduyo ni bakere kpe na nunga gbe. Yosefa ki kpari bako ho tipa uru saba.

¹¹Ho aboro gu ringara re nangia aKanano abi gu kparakpe ni re rogo gu batakazende ahe nga ga Atada, i ki ya, “Kere kpe nga gere fu aEzipeto.” Si du i ayambu rimoho ti ni nangia Abere-misaraima nga gu du mbiti Yaradene yo.

¹²Awiriko amangi he a wa ko arugu yo na ni;

¹³bambiko awiriko atindi ko ku ringara Kanana yo, i ki kpisidi ko rogo gu simbia nadu rogo gu ati du Makepera yo pati Mamere ku uroyo, nga gu Abarayama angbe he na ati ni bakpisida aboro, be Efurona nangia boro Eto.

¹⁴Yosefa ki karaga tiko ku Ezipeta yo fuo kpisida ko bako, i na awiribako, gbiakuti agu yo dunduko i andu na yo ka kpisida bako.

¹⁵Ho awiriba Yosefa abi he ni ya bayo kpi, i ki ya, “Watadu Yosefa nikasoga rani, ki karaga pai fu rani gbegberẽ tipa gu gbigbitapai ani amangi ko na ni.”

¹⁶I ki kedi pai koyo du Yosefa ni, ki ya, “Mbata bamo nikakpi ko arugu rani, ki ya,

¹⁷‘Wo oni ka ya re fu Yosefa, Mi nazungadi ro awere, mo vú awiribamo ti gayo tindika na tipa gayo ingapai wa i amangi foro gbegberẽ.’ Awere tie, ani nazungadi ro, mo vú agu amoyambu ti gayo tindika nga agu yo nga ga bamo Mbori yo.” Yosefa ki nikpari ni aume ho i afura ni na ko.

¹⁸Awiribako ki ndu ki titiwi bara bangiriko, ki ya, “Mo ngére, gamo akanga nga ani.”

¹⁹Yosefa ki ya fu yo. “Ka oni gúnde nga ya. Mi du ku ba Mbori?

²⁰Ono tipa roni, oni naberẽ ka manga fere gbegberẽ; ono Mbori asa ha ni wenepai, si ki du ni bata fu badungu aboro, a wa bi oni he ni bangironi ti gi uru re.

²¹Si du ka oni agúnde nga ti ni ya; mi abánda roni na rukutu awironi.” Ko ki ngarãsi yo, ki nifura na yo besemene.

²²Yosefa ki niraki Ezipeta yo, i na ga bako aborokporo; Yosefa araki tipa agarã 110.

²³Yosefa ki bi awiri Efuraima nangia biata rika ngbatungako, awiri Makira a nangia wiri Manase, i abatika yo ku auru arukusu Yosefa.

²⁴Yosefa ki ya fu awiribako, “Mi nikakpi; ono Mbori ayé ka bi roni, ki kusi roni rogo gi ringara re, oni ki ndu ku rogo gu ringara ko azunga he tipa ha fu aAbarayama, fu Yisaka na fu Yakoba a.”

²⁵Yosefa ki rugu awiri Yisaraere i zunga he fu ko, ki ya, “Ni rengo Mbori nikaye ka bi roni oni ki tindi amemere erẽ.”

²⁶Si du Yosefa ki kpi, garãko adu 110; i ki mbakadi kangbako ni ngua, ki moi kangbako ku rogo sanduki Ezipeta yo.