Read zande Bambata Pai 6 Bible Online

Bambata Pai 6 - zande bible

Bambata Pai 6

¹Si ki ta du wa gere, ho aboro atona ka nge ni auru kpotosende, ki batika adegude,

²awiri Mbori abi agu awiri aboro nangia ade ya i angbaki angbaka bangirise; i ki rogo ade dagba yo dunduko wa i akpi nyemu he.

³Yekova ki ya, “Torore asó nga vura na aboro kindi te, bambiko kina borose nga yo a, ono garãyo nikadu nga 120.”

⁴Ti gu rago re diangbadiangba aboro adu auru kpotosende, fuo gure a, ho awiri Mbori ara ni na agu awiri aboro nga ade, i ki batika agude fu yo. I ki du ni agu airanyaka nangia abaworimo mbata.

⁵Yekova ki bi he ya ga aboro gbegberẽpai adu ni bakere he gbe auru kpotosende, na gu biapai dunduko nga ga berã du kpotoyo yo, si adu ni kina gbigbita ha kindi.

⁶Yekova ki birí tiko wa ko afu aboro ku auru kpotosende, ngbaduko ki niimi aima.

⁷Yekova ki ya, “Mi abá tungayo auru kpotosende, nga agu aboro mi afu yo, aboro na anya dunduko na agu agbiro nagbe tira sande na azire ari, bambiko mi birí tire wa mi afu yo.”

⁸Ono Noa abi undahe be Yekova.

⁹Agi yo re nangia angbatunga Noa. Noa adu ni ruru boro, ki du ziazia dagba arika ngbatungako; Noa anata na Mbori.

¹⁰Noa abatika akumbagude biata, nangia Seme, Ama, na Yepete.

¹¹Kpotosende ki gberẽ agberã bangiri Mbori, kpotosende ki hi be bakere zuu.

¹²Mbori ki bi kpotosende, mo ngere, si agberẽ agberã; bambiko aboro dunduko aima gbarasa gayo apai auru kpotosende.

¹³Mbori ki ya fu Noa, “Digida rago da bangire tipa unga ahe dunduko; bambiko kpotosende hi be zuu mbiko yo; mo ngére, mi abá tungayo na kpotosende a.

¹⁴Mo mángi kurungba rogo gu ngua nga gofera, mo ki kparaka vuru kurungba yo ni abambu, mo ki dika vuruhe yo na kpotoho ni baro.

¹⁵Mo mbákadi he wa gere; bagiza kurungba adu wa bagiza mbiribe 300, patihe ki du wa bagiza mbiribe 50, basonaha ki du wa bagiza mbiribe 30.

¹⁶Mo ki moi bangiri he, mbembedi na rihe wa bagiza mbiribe sa; mo ki moi kpuguru kurungba ku pavuruhe yo. Mo ki kparaka rogo kurungba biata, gu vuruhe ki du ku sende sa, gu ki du ku ri he ni ue he, gu ki du ku ri he berewe a ni biata ha.

¹⁷Mo ngére, mi kina re nikakeda ime akangbi ku auru kpotosende, ka ba tunga unga ahe dunduko nga gu du na onga unga rogo ho yo, tii ngbangbaturũ yo; agu ahe du auru kpotosende dunduko si akpíka akpika.

¹⁸Ono mi afú gi mozunga foro; oni ki rimi ku kurungba yo, oni na awiro, na diaro, na dere awiro fuo ro.

¹⁹Mo ki rogodi ngbatunga unga ahe dunduko fuo ro ni ba ue ngba rikaha ku kurungba yo, ya si nye ni ungaha na mo kindi. Ami ki du nga abara na anara.

²⁰Azire ngba rikara, na zogozogo anya ngba rikara, na agu agbiro dunduko nagbe tira sande ngba rikara, ami ayé ngba arikara dunduko ni ba ue koyo du mo ni, si banda ra ni ungara.

²¹Mo ki rogodi ngbatunga ariahe dunduko fuo ro nga gu i nari he, mo ki dungura ha fuo ro; si adú ni riahe fu roni, na fu ra a.”

²²Were Noa ki mangi wo; wa Mbori arugu ko na ni, kina wo ko amangi he dũ.