Read zande Bambata Pai 8 Bible Online

Bambata Pai 8 - zande bible

Bambata Pai 8

¹Mbori ki tingidi pa Noa na pa unga ahe dunduko na gu zogozogo anya dunduko nga agu ra nadu na ko kurungba yo. Mbori ki kedi yuge si ya auru kpotosende, ime ki ugudi;

²agu agugaabi nga ga dudungura ime Mbori ki kisi he, na angbadimo ngbangbaturũ a; gu mai naaye ngbangbaturũ yo si ki kati.

³Ime ki niga kindi ku sa yo auru kpotosende. Fuo diga agu arame nga 150 ime ki ugudi;

⁴rogo bawe diwi, ti rameru 17, kurungba ki sungu ri agu abaagangara nga Ararata.

⁵Ime ki niugudi kindi dati kina bawe diwi, rogo bawe diwi, ti bambata rameru, i ki bi ri abaagangara.

⁶Fuo diga rame 40, Noa ki za bangiri kurungba nga gu ko amangi he,

⁷ko ki kusi zire wa bakiki; u ki niyanga ayanga ri arago kirikiri, daho ime augudi ni auru kpotosende.

⁸Ko ki kusi mbipo yo du ko ni, u bi ka ngia ime ugudi auru sende;

⁹ono mbipo abi nga basunga te, u ki karaga tiru koyo du ko ni ku kurungba yo, bambiko ime adu adu auru kpotosende zegino dunduko. Ko ki taí beko ki zi ru ki di ru koyo du ko ni ku kurungba yo.

¹⁰Ko ki sungu berewe kura rame ki du saba, ko ki kusi mbipo kurungba yo berewe;

¹¹mbipo ki rimi koyo du ko ni nyemu. Were, fogo kpe kpakari ki du ngbaru yo; Noa ki ini he ya ime nauguda auru kpotosende.

¹²Ko ki sungu berewe kura rame ki du saba, ki kusi mbipo; ka u akaraga nga tiru koyo du ko ni berewe ya.

¹³Ti gu garã nga 601, rogo bambata diwi, ti bambata rameru, ime ki ugudi auru kpotosende dunduko; Noa ki zaki ri kurungba, ki ngere, ki bi he ya sende du ni kina ugu he.

¹⁴Ni ue diwi, ti 27 rame nga ga gu diwi re, kpotosende ki ugu.

¹⁵Mbori ki gumba pai fu Noa ki ya,

¹⁶“Mo kúru kurungba yo, oni na diaro, na awiro na dere awiro fuo ro.

¹⁷Oni kúru na unga ahe dunduko nga agu ahe du ni ungaha na mo―nga azire, na zogozogo anya na agu agbiro nagbe tira sande dunduko, ya ami batika kpaiman ku auru kpotosende ― ki nizuga azuga, ki ninge ange ku auru kpotosende.”

¹⁸ANoa ki kuru, na awiriko na diako, na dere awiriko fuo ko.

¹⁹Anya, na agu ra nagbe tira sande, na azire dunduko, na agu ahe nawo awo auru kpotosende ngba rikaha, si ki kuru kurungba yo dunduko.

²⁰Noa ki dua bamotumo fu Yekova, ko ki rogo agu ra dagba gigiri anya na dagba gigiri azire dunduko, ki tumo na ami ni zozo amotumo auru bamotumo.

²¹Yekova ki gi guzuguzu fuo ho, Yekova ki ya ku kpotoko yo, “Mi ambúsa hga son He berewe mbiko aboro te, bambiko gu ga aboro berá du kpotoyo yo, si ni gbigbita ha tona ti parangayo; ka mi aímo nun unga ahe berewe dunduko wa mangi mi he ya.

²²Wa nye zegino kindi, rago mi mnga na rago dúngura aũati, rago zere na faa rago, kita na garã, uru na yuru, si adíga nga wa sa te.”