Read zande Bambata Pai 9 Bible Online

Bambata Pai 9 - zande bible

Bambata Pai 9

¹Mbori ki fu maku fu Noa na awiriko, ki ya fu yo, “Oni zuga ki ninge ange, ki hisi kpotosende.

²Gunde roni ati ati na iriwo roni ti anya sende no, na ti azire ari dunduko, na ti agu agbiro nagbe tira sande, na ti atio baime yo dunduko; mi fu ra ku be roni dunduko.

³Agu ahe dunduko du ni unga ha nawo awo si adu ni riahe fu roni; mi fu he fu roni a wa mi afu iwo akpepasio dunduko a.

⁴Ono oni ari nga gu pasio du kure rogo ho nga unga ha te.

⁵Mi ki iri bape kureroni ni rengo; nga ga ungaroni; mi aíra bape he ti anya dunduko, na ti aboro a; mi aíra bape ga gu boro unga ti kina wirinani.

⁶Gu ni ka imi boro, kina boro nikaimo ni; bambiko Mbori amangi boro ni kpiako.

⁷Awere oni tigaoni oni zuga ki kpatari, oni bátika agude ku auru kpotosende ki ninge ange yo gbe.”

⁸Mbori ki ta gumba pai fu Noa gbiakuti awiriko, niya,

⁹“Oni ngére, mi kina re nafu gi mozunga fu roni na fu atitaroni fuo roni,

¹⁰na fu gu unga ahe dunduko du na oni, nga azire, na zogozogo anya, na anya kpotosende dunduko du na oni, nga agu ra dunduko naakuru kurungba yo, nga agu anya du auru kpotosende dunduko.

¹¹Mi afu gi mozunga fu roni, ka unga ahe akpíka nga dunduko be ime akangbi berewe ya, ka ime akangbi adu nga ho ka gbarasakpotosendebereweaya.”

¹²Mbori ki ya, “Gere nga ngbaanga gu mozunga mi amáa dagba rani na oni, na gu unga ahe dunduko du na oni, na agu arika ngbatunga aboro nikadu adu kindi ku mbata yo.

¹³Mi moi gi wangu ku rogo rungbutarungbuta mai yo, u du ni ngbaanga mozunga dagba rani na kpotosende.

¹⁴Si anidu wa gere ho mi ka nikédi rungbutarungbuta mai ni ku auru kpotosende, i anibi wangu rogo ho.

¹⁵Mi ki nitingidi pa gu gi mozunga du dagba rani na oni na unga ahe dunduko; ka ime adu nga ni ime akangbi ka gbarasa unga ahe dunduko berewe ya.

¹⁶Ka wangu adu rogo rungbutarungbuta mai yo, mi ki bi ru mi ki tingidi pa gu nyenye mozunga du dagba Mbori na gu unga ahe dunduko du auru kpotosende.”

¹⁷Mbori ki ya fu Noa, “Gere nga ngbaanga gu mozunga moi mi dagba rani na gu unga ahe dunduko du auru kpotosende.”

¹⁸Agu awiri Noa naakuru kurungba yo nangia Seme, Ama, na Yepete. Ama ki ngia ba Kanana.

¹⁹Agi yo biata re nangia awiri Noa; kpotosende ki hi ahi tokpotokpo be aboro mbiko yo.

²⁰Noa ki tona ka du ni basopobino. Ko ki rũ bakakue ati yo.

²¹Ko ki mbiri imekakue, ki kpi he, ki du ni kundiri ko rogo gako bamburoko.

²²Were Ama, nangia ba Kanana, ki bi bako ni kundiri ko, ki taki pandehe fu atameko ue nadu zegi yo.

²³ASeme na Yepete ki di gbanga roko, ki moi he ku pagorõyo, ki nindu ni giiyo ki dadi kundiri bayo; kpakpuyo ki du ku sa yo, ka i abi nga kundiri bayo ya.

²⁴Noa ki zingi rame yo be gako imekakue, ki bi gu pai kiaro wiriko amangi he.

²⁵Ko ki ya, “Mi tiwa Kanana; ko adu ni ga kanga kanga fu awirinako.”

²⁶Ko ki ya berewe, “Sambuahe du fu Yekova nga ga Seme Mbori; Kanana dú ni gako kanga.

²⁷Mbori sá Yepete ni bakere boro, gako banye du rogo agu abamburoko yo nga ga Seme; Kanana ki du ni gako kanga.”

²⁸Noa ki raki fuo ime akangbi garã ki du 350.

²⁹Garã Noa adu dunduko 950; ko ki kpi.