Read zande 2 SAMUERE 10 Bible Online

2 SAMUERE 10 - zande bible

2 SAMUERE 10

¹Fuo gure, bakindo aAmono ki kpi. Anuna nangia wiriko ki zogo rago ku ba ko.

²Dawidi ki ya, “Mi ayúgo weneringise fu Anuna wiri Nasa, wa bako ayugu weneringise fere.” Si du Dawidi akedi avuruko ti ni, i ngárãsi Anuna tipa kpio bako. Avuru Dawidi ki da ku rogo gu ringara nga ga aAmono.

³Ono agu abazogo nangia ga aAmono yo i ki ya fu Anuna gayo gbia wẽ, “Mo berẽ he ya Dawidi nairisa bamo, kedi ko abangarãsiro ti ni kono du mo ni? Dawidi kedi avuruko i ye ka wisiga bakporo, te? na ka maa ha, ka gbarasa ha a, te?”

⁴Si du Anuna ki rogo avuru Dawidi, ki kpe maingbayo ku bani sa, ki yepe gayo baukadi bebere he, kuti basungayo, ki karaga yo ku sa yo.

⁵Ho i agumba ha ni fu Dawidi, ko ki kedi aboro i ndu ka ngbisa yo; bambiko agu akumba re adu na bakere zee. Bakindo ki ya, “Oni nyé kina Yereo yo daho maingbaroni ka funa ni, fuo gure oni ki yega.”

⁶Ho aAmono abi he ni ya payo gberẽ ti Dawidi, aAmono ki kedi pai ka ngbe agu aSurio nga ga Bete-roba yo, na agu aSurio naadu Soba yo, nga aborovura ni nduyo wa 20,000, na bakindo Maka na aboro 1,000, aboro Tobo wa 12,000 a.

⁷Ho Dawidi agi he ni, ko ki kedi Yoaba, na rimbasa airanyaka dũ.

⁸AAmono ki kuru ki tangara tiyo sa vura ti barima ku ngbadimo bakporo; agu aSurio naadu Soba yo, na agu yo naadu Robo yo, na agu akumba naadu Tobo yo na Maka yo, i adu kina haurago yo ni sa yo.

⁹Were ho Yoaba abi he ni ya vura oro pati ko ku barangba ko na ku gii ko yo a, ko ki sia aboro dagba gu siasia aboro nga ga aYisaraere yo, ki tangara yo sa vura kuti aSurio.

¹⁰Ko ki fu gu yangara aboro ku be Abisai nangia unvuruako, ko ki tangara yo sa vura kuti aAmono.

¹¹Ko ki ya, “Ka aSurio du nyanyaki ki susi re, oni ki ye ka unda re; ono ka aAmono du nyanyaki ki susi ro, mi ayé ka unda ro.

¹²Mo dú ngangarã, ani mángi pai wa akumba tipa gaani aboro na tipa agu abaakporo nga ga gaani Mbori. Yekova mángi gu pai ngba bangiriko.”

¹³Si du Yoaba na agu aboro naadu na ko ki mbedi na vura sa aSurio; i ki oro be ko.

¹⁴Ho aAmono abi he ni ya aSurio oro, i ki oro a tigayo be Abisai, ki rimi ku bakporo yo. Yoaba ki karaga tiko ngba fuo aAmono yo, ki yega ku Yerusarema yo.

¹⁵Ho aSurio abi he ni ya aYisaraere di be yo, i ki dungura tiyo wa sa.

¹⁶Adadezere ki kedi pai ki ye na agu aSurio naadu mbiti Di Ferata yo. I ki ye ku Erama yo, na Sobaka nangia barutiri rimbasa aborosovura nga ga Adadezere ku ri yo.

¹⁷I ki gumba ha fu Dawidi, ko ki dungura aYisaraere dunduko, ki si Yaradene, ki da ku Erama yo. ASurio ki tangara tiyo kuti Dawidi, ki so vura na ko.

¹⁸ASurio ki oro be aYisaraere; Dawidi ki imi aboro nga ga ngbagidavura wa 700, na abanduri afarasi 40,000; ki hogi Sobaka a nangia barutiri gayo rimbasa aborovura, ko ki kpi kina yo.

¹⁹Ho agu abakindo dunduko nga agu yo nangia avuru Adadezere abi he ni ya aYisaraere di be yo, i ki mangi pa zereda na aYisaraere ki ra fu yo. Si du aSurio ki gunde ti unda aAmono berewe.