Read zande 2 SAMUERE 11 Bible Online

2 SAMUERE 11 - zande bible

2 SAMUERE 11

¹Si ki ta du wa gere, ti digida garã, ti gu rago abakindo nakura ti ni sa vura, Dawidi ki kedi Yoaba, na avuruko, na aYisaraere dunduko, ki gbarasi aAmono, ki ru nguru pati Raba. Ono Dawidi anye kina Yerusarema yo.

²Si ki du wa gere ni gu nyemu, Dawidi ki guari auru gako barame, ki nita ri ga bakindo bambu yo. Wa ko aru ri bambu yo ko ki bi de ri nimbedi gari ime; bawene de nangia ri bangirise.

³Dawidi ki kedi sunge i sana he tipa gu de re. Boro sa ki ya, “A nga Bataseba du te? wiri Eriama, nga dia Uria boro Eto?”

⁴Dawidi ki kedi asunge, i ki di ri, ri ki ye ki rimi fuo ko, ko ki pi na ri. Bambiko ri agirisi tiri ti gari kaza ade. Ri ki karaga tiri ku kpuri yo.

⁵Gu de re ki du na mobara; ri ki kedi pai ka gumba pa ha fu Dawidi, ki ya, “Mi na gude.”

⁶Dawidi ki kedi pai fu Yoaba, ki ya, “Mo kédi Uria boro Eto kono du mi ni.” Yoaba ki kedi Uria fu Dawidi.

⁷Ho Uria aye ni koyo du ko ni, Dawidi ki sana ko tipa agu apai Yoaba amangi, na gini pai namanga aboro, na gini pai dũ tipa vura.

⁸Dawidi ki ya fu Uria, “Mo ndú ku kpuro yo, ki zundu nduro.” Uria ki kuru dimo ku bakindo yo, bakindo akedi riahe ni gamahe fu ko.

⁹Ono Uria ara kina pa ngbadimo ga bakindo bambu yo, na ga gako gbia amoyambu dunduko. Ko aga nga ku kpuko yo te.

¹⁰Ho i agumba ha ni fu Dawidi, ki ya, “Uria aga nga gba ku kpuko yo te.” Dawidi ki ya fu Uria, “Ati mo naye gene nunguro yo? Tipagine mo andu nga ti ni ku kpuro yo ya?”

¹¹Uria ki ya fu Dawidi, “Ga Mbori sanduki naraka tii abasura na aYisaraere, na aYudo a; gi gbia nga Yoaba na avuru gi gbia a, i naraka kina bavura yo; waĩ ka mi ndu tigimi ku kpure yo, ka ri riahe ki mbiri he, ka pi pati diare? wa du mo ni ungaro, wa du mbisimoro ni ungaha, mi amánga nga gu pai te re.”

¹²Dawidi ki ya fu Uria, “Mo nyé kina erẽ areme a, mi ki idi foro gba mo gúari.” Si du Uria anye ti ni kina Yerusarema yo ni gu uru re, ki da ku wiso.

¹³Ho Dawidi ayambu ko ni, ko ari riahe ki mbiri he kina bara bangiriko. Ko ki fu imekakue fu ko daho ko akpi he ni. Nyemu ko ki kuru ka ndu ka pi auru gako barame na amoyambu gako gbia, ka ko aga nga ku kpuko yo ya.

¹⁴Si ki du wa gere wiso, Dawidi ki ke waraga fu Yoaba, ki kedi he be Uria.

¹⁵Ko ake he ku waraga yo, ki ya, “Oni mói Uria ku mbata yo bara ho du vura ni nzengerenzengere, oni ki guari pati ko, i so ko, ko kpi.”

¹⁶Ho Yoaba apida bakporo ni, ko asia Uria sa kina gu ba ini ko ho ya eerẽ aboro rogo.

¹⁷Akumba bakporo ki kuru, ki so vura kuti Yoaba; agu aboro ki kpi, na avuru Dawidi a; Uria nangia boro Eto ki kpi a.

¹⁸Yoaba ki kedi sunge ka gumba pa agu apai dunduko mangi ti ngba vura.

¹⁹Ko ki ta ruga sunge, niya, “Ho mo ka digisa gumba pa agu apai ni dunduko fu bakindo mangi ti ngba vura,

²⁰si adú were, ka bakindo zingi, ki ya foro, ‘Tipagine oni andu ti ni mbembedi sa bakporo ka so vura? Oni aina nga ha ya i aru auru ngapa bakporo ka ba baso te?

²¹Da naimi Abimereke wiri Yerubesete? a nga de naba wiri mbia saahe ku ri ko, ri ngapa bakporo yo, ko ki kpi kina Tebese yo, te? Tipagine oni andu ti ni mbembedi were na ngapa bakporo?’ Mo ki ya, ‘Vururo nga Uria boro Eto, ko kpi a.’ ”

²²Si du sunge ki ndu, ki ye ki yugu agu apai dunduko fu Dawidi nga gu Yoaba akedi ko na ni.

²³Sunge ki ya fu Dawidi, “Agu akumba re nidi be rani ki ye fuo rani ku bavura yo, ani ki do yo ki da ti kina ngbadimo bakporo.

²⁴Abaasiida ki zumudi avururo ri ngapa bakporo; agu avuru bakindo ki kpiki, vururo nga Uria boro Eto, ki kpi a.”

²⁵Dawidi ki ya fu sunge, “Mo yá fu Yoaba wẽ, ‘Ka agi apai re gbérẽ nga ti ro ya, bambiko basape niimi gu ni wa kina gu ni; mo nyákasi ga vura nyanyaki kuti bakporo, ki gbarasi he.’ Mo zína he fu ko.”

²⁶Ho dia Uria agi he ni ya Uria nga kumbari kpi, ri ki ta ta ngbaduri ki nikpari kumbari.

²⁷Ho kparakpe anyasi ni, Dawidi ki kedi sunge ki di ri kporo yo ku kpuko yo, ri ki du ni diako, ki vungu kumbagude fu ko. Ono gu pai Dawidi amangi si ki gberẽ ti Yekova.