Read zande 2 SAMUERE 12 Bible Online

2 SAMUERE 12 - zande bible

2 SAMUERE 12

¹Yekova ki kedi Natana koyo du Dawidi ni. Ko ki ye koyo du ko ni, ki ya fu ko, “Akumba adu ue rogo bakporo sa; gu ko ni irakumuko, gu ko ki du ni rungorungo ko.

²Dungu zogozogo anya adu be irakumuko nga rika akandoro na rika abagara;

³ono he adu nga be rungorungo kumba te, kina wiri kandoro sa ni nara, nga gu ru ko angbe ru, ki sonosi ru. U ki sono kina ku pati ko, na pati awiriko. U ki niri bete gako riahe, ki nimbiri he ti ngba gako inga, u ki nipiki ti ngbaduko, u ki du wa kina gu wiriko nga de.

⁴Boro nunguro aye koyo du irakumuko ni, ko ki ta he dia gu ru dagba gako rika akandoro na gako rika abagara, ka mbakada ru tipa gu nungunungu boro re naye koyo du ko ni. Ono ko ki di kina ga rungorungo boro bangisa wiri kandoro, ki mbakadi ru fu gu boro naye koyo du ko ni.”

⁵Ga Dawidi erá ki rungudi kuti gu boro re; ko ki ya fu Natana, “Wa du Yekova ni ungako, gu boro namangi gi pai re kina kpi ni ngba.

⁶Ko atúmo ni wiri akandoro biama tipa gu wiri kandoro re, wa ko amangi gi pai re, wa inapai adu nga ti ko ya.”

⁷Natana ki ya fu Dawidi, “Kina boro mo nga gu boro re. Ya Yekova nga ga aYisaraere Mbori wẽ, ‘Mi ambedi ro ni bakindo ku ri aYisaraere, ki nibatasi ro a be Saura.

⁸Mi ki fu ga bairaro bambu foro, na adia bairaro kuti ngbaduro, ki fu angbatunga aYisaraere foro na aYudo. Ka si ngia agi ahe re arengba nga bangiro te, ka mi afú kura ahe ku ri he foro a.

⁹Tipagine mo apayasi sangba Yekova ti ni, ki mangi gu pai nadu ni gbigbita ha bangiriko? Mo imi Uria boro Eto ngba basape ki di diako ni diaro. Mo imi ko ni gu basape nga ga aAmono.

¹⁰Si du awere, basape agúari nga ti ngbatungaro berewe te, bambiko mo apayasi re, ki di dia Uria nga boro Eto ni diaro.’

¹¹Ya Yekova wẽ, ‘Mo ngére, mi azíngisa gbigbitapai kuti ro be kina ngbatungaro. Mi aróga adiaro kina ku bangiro, ki fu yo fu kuaro, ko ki nira na adiaro kina uru.

¹²Wa mo amangi ga pai ni gbuko; mi amánga gi pai re kina uru, ku bangiri aYisaraere dunduko.’ ”

¹³Dawidi ki ya fu Natana. “Mi ingi pai kuti Yekova.” Natana ki ya fu Dawidi, “Yekova di ga ingapai ti ro ku sa yo a; mo akpí nga te.

¹⁴Ono ka si vura du wo vurũ, mbiko ga pai, gberẽ avura Yekova ngbayo yo ti ni, gu gude diaro avungu ko, ko akpí akpi ni rengo.”

¹⁵Natana ki karaga tiko ku kpuko vo. Yekova ki fu mbusa fu gu gude dia Uria avungu ko fu Dawidi, ko ki woko awoka gbe.

¹⁶Si du Dawidi azungadi Mbori ti ni tipa gu gude re; Dawidi ki gina riahe, ki rimi ku dimo yo, ki pi kina sande, ki da ku wiso.

¹⁷Abaakumba kpuko ki guari, ki ru pati ko, ka tumba ko sande; ono ka ko aida nga ha ya, ko ari nga riahe na yo a te.

¹⁸Si ki du wa gere ti saba rame, gu gude re ki kpi. Ga Dawidi amoyambu ki gunde ti gumba ha fu ko ya gude kpi; bambiko i aya, “Oni ngere, ho gude adu ni ni ungako, ani agumba pai fu ko, ka ko agia nga sangbarani ya; a ngbatika ka ani gumba ha fu ko ya gude kpi, ko arungosi tiko ki susi, te?”

¹⁹Ho Dawidi abi he ni ya gako amovambu nagumba patapata dagba yo, Dawidi ki ini he ya gude kpi. Dawidi ki ya fu gako amoyambu, “Gude kpi?” I ki ya fu ko, “Ko kpi.”

²⁰Dawidi ki guari sande, ki zundu tiko, ki mbedi nzeme, ki uru gako roko ki ukadi gu kura ha. Ko ki rimi ku tii ga Yekova bambu yo, ki irisi ko. Ko ki karaga tiko ku kpuko yo. Ho ko asana he ni tipa riahe, i ki moi he barangba ko, ko ki ri he.

²¹Gako amoyambu ki ya fu ko, “Gini pai nga gi mangi mo re? wa gude adu ni ungako, mo agina riahe, nikpari ni aume tipa ko; ono fuo kpi gude, mo ki guari ki niri riane.”

²²Ko ki ya, “Ho gude adu ni ni ungako, mi agina riahe ki nikpari ni aume; mi ki ya tigimi, ‘Da ini he si ngia Yekova aina pai fere, gude ki bati.’

²³Ono awere wa ko nakpi, tipagine mi ka gina riahe ti ni berewe? mi rengbe ka karaga ko berewe? Mi andú kina koyo du ko ni, ono ko tigako akáraga nga tiko kono du mi ni te.”

²⁴Dawidi ki ngárãsi Bataseba nangia diako, ko ki rimi fuo ri, ki ra na ri; ri ki batika kura kumbagude fu ko, ko ki yambu rimoko nga Soromo. Yekova ki nikpi nyemu Soromo gbe,

²⁵ki kedi pai ngba Natana nga nebi; ko ki yambu rimoko nga Yedidiya, kuti sangba Yekova.

²⁶Were Yoaba ki so vura kuti Raba nga ga aAmono bakporo, ki di gu bakporo nga ga bakindo.

²⁷Yoaba ki kedi asunge koyo du Dawidi ni, ki ya, “Mi so vura kuti Raba; ii, mi di bakporo Aime.

²⁸Si du awere mo dúngura yangara aboro, ki ru nguru kuti bakporo, ka dia ha; mi ka dia gu bakporo re tigimi, i ki yambu rimore kuti ni.”

²⁹Dawidi ki dungura aboro dunduko, ki ndu ku Raba yo, ki so vura kuti ni, ki di he.

³⁰Ko ki di kpakpari bakindo ri gayo bakindo yo. Barõaha adu wa taranda dahabu sa du mbembedi na akiro 50, kikiipa ambia adu ti ni a, i ki dua ha ku ri Dawidi yo. Ko ki kusi gu gbugbu ahe nga ga gu bakporo re, ni bakere he gbe.

³¹Ko ki kusi agu aboro naadu yo, ki moi yo ti sunge gbaka angua, na sunge abaagita du rindihe gbazagara, na sunge amangua, ki ya fu yo i mángi sunge rogo gbigiwi biriki yo. Were ko amangi fu agu abaakporo dunduko nga ga aAmono. Dawidi ki ga na aboro dunduko ku Yerusarema yo.