Read zande 2 SAMUERE 13 Bible Online

2 SAMUERE 13 - zande bible

2 SAMUERE 13

¹Abisaroma nangia wiri Dawidi adu na dawiriko ni bawene de gbe, rimori angia Tamara; fuo bete rago Amanona wiri Dawidi ki nikpi nyemu ri.

²Wa Amanona adu na bakere rungo ko ki ti na kaza nyemu dawiriko nga Tamara; bambiko ri adu ni ngasu de. Si ki kpakara be Amanona ka manga pai na ri.

³Ono badia Amanona adu ho, rimoko angia Yonadaba, nangia wiri Sima unvurua Dawidi. Yonadaba adu ni kere irabirĩ.

⁴Ko ki ya fu ko, “Ako wiri bakindo, tipagine mo auguda ti ni na uru: ka mo gumba nga pa ha fere te?” Amanona ki ya fu ko. “Mi tigimi nakpi nyemu Tamara, nga dawiri unvuruami nga Abisaroma.”

⁵Yonadaba ki ya fu ko, “Mo pi ba ro barame yo, ki sa tiro wa boro kaza; ho bamo ka ye ni ka bi ro, mo yá fu ko, ‘Mi nakpara foro, dawire ye nga nga Tamara, ka fu nga kpokuta fere mi ri he, ka mbakada riahe ku bangire, mi nibi nga ha, ka ri nga ha kina be ri.’ ”

⁶Si Amanona api ti ni, ki sa tiko ni boro kaza. Ho bako aye m nga Dawidi ka bi ko, Amanona ki ya fu bakindo, “Mi nakpara foro, dawire ye nga nga Tamara ka manga rukutu kpokuta fere ku bangire, mi ri he kina be ri.”

⁷Dawidi ki kedi sunge ku kporo yo fuo Tamara, ki ya, “Mo ndú awere ku kawiro yo nga Amanona, ka manga riahe fu ko.”

⁸Si du Tamara ki ndu ku Amanona yo nga kawiriri. Ko api api sande. Ri ki di muramura ngungo, ki fio ho, ki mangi rukutu kpokuta ku bangiriko, ki zo ho.

⁹Ri ki di ngbadi, ki uka ha koyo kina ku bangiriko, ka ko ari nga ha ya. Amanona ki ya, “Oni kúsi aboro dunduko pati re.” Aboro ki kuru ku zegi yo dũ.

¹⁰Amanona ki ya fu Tamara, “Mo yé na riahe ku dimo no, mi ri nga ha kina be ro.” Tamara ki di gu rukutu kpokuta nga gu ri amangi he, ki ye na ni ku dimoyo fu Amanona nga kawiriri.

¹¹Ono ho ri aye ni na ni mbembedi fu ko ko ri he, ko ki zi ri, ki ya fu ri, “Dawire, mo yé ka ra na mi.”

¹²Ri ki karaga ha fu ko ki ya, “Ai, kawire, ka mo sósodi nga re ya; bambiko ngbatunga pai wa gere arengba nga i mangi he dagba aYisaraere te; ka mo mángi nga gi pa mumungo pai re ya.

¹³Mi tigimi a, mi andú ku wari be gi zee? tipa ro a, mo tigamo mo adú wa kina agu airamungo du dagba aYisaraere. Si du awere, mi nakpara foro, mo gúmba ha fu bakindo; bambiko ko aká nga na mi be ro te.”

¹⁴Ono ko akpi nga nyemu ka dega tuko sa gari pai te. Ono wa ko anyaki ki susi ri, ko ki zi ri ni ome, ki ra na ri.

¹⁵Amanona ki sogo ri asoga ki susi asusa; bambiko gu ima ngbaduko ko asogo ri na ni si nasusi gu nyemuri naamanga ko. Amanona ki ya fu ri, “Mo gúari, ki ga.”

¹⁶Ono ri ki ya fu ko, “Kawire, wo te, bambiko gu gbegberẽpai nga ka kusa re, si gberẽ ki susi gu kura ha mangi mo re na ni.” Ono ko akpi nga nyemu ka dega tuko sa gari pai te.

¹⁷Ko ki yambu gu gako moyambu ninamanga sunge fu ko, ki ya, “Mo kúsi gi de re ti re ku zegi yo, ki kisi ngbadimo fuo ri.”

¹⁸Ri aukadi baukadi na dungu azehe ti ni; bambiko ngbatunga agu abaukadi re awiri bakindo anaukadi nga ngasu adegude. Gako moyambu ki kusi ri ku zegi yo, ki kisi ngbadimo fuo ri.

¹⁹Tamara ki nduku kuke ku riri yo, ki siri gu gari baukadi nadu ti kpotori na dungu azehe. Ri ki uka beri ku riri yo, ki niga, ki nikpari ni wawa wa ri aga.

²⁰Abisaroma nangia kawiriri ki ya fu ri, “Kawiro nga Amanona ra na mo? Ono mo óngo awere, dawire; kawiro du; ka mo ká nga na gi pai re ku kpotoro yo ya.” Si du Tamara ki nye ni rungorungo ri ku kawiriri yo nga Abisaroma.

²¹Ono ho Bakindo Dawidi agi pa agi apai ni dunduko re, gako zinga ki rungudi.

²²Ono Abisaroma agumba nga pai fu Amanona ni wene he watadu ni gbegberẽ he a te; bambiko Abisaroma asoga Amanona asoga, bambiko ko amangi dawiriko ni ome nga Tamara.

²³Si adu wa gere fuo garã ue nzunzu, Abisaroma adu na abakpemange akandoro Bara-asora yo, nga gu nadu mbembedi na Efuraima, Abisaroma ki yambu awiri bakindo dunduko.

²⁴Abisaroma ki ye koyo du bakindo ni, ki ya, “Mo ngére, awere ga moyambu du na abakpemange akandoro; mi nakpara foro, bakindo ídi ka ndu na gako amoyambu wa sa na ga moyambu.”

²⁵Bakindo ki ya fu Abisaroma, “Oó, wire, ka ani ndú nga dunduko ya, ani ka du ni umbugo foro.” Ko ki nidarĩ ko kindi, ono ko akpi nga nyemu ka ndu te, ko ki fu kina maku fu ko.

²⁶Abisaroma ki ya, “Ka si adu nga wo ya, mi nakpara foro, ani ndú na tamere nga Amanona.” Bakindo ki ya fu ko. “Tipagine ka oni ndú ti ni na ko?”

²⁷Ono Abisaroma ki nidarĩ ko kindi, ya Amanona ndu na ko na awiri bakindo dunduko.

²⁸Abisaroma arugu gako amoyambu, ki ya, “Oni bí he awere, ho rago ka ngba ni ti Amanona be imekakue; ho ka mi ya ni fu roni, ‘Oni tá Amanona,’ oni ki imi ko, ka oni agúnde nga ya. A nga mi rugu roni te? Oni dú ngangarã, ki du na erá.”

²⁹Ga Abisaroma amoyambu ki mangi Amanona wa Abisaroma arugu yo. Awiri bakindo ki guari dunduko, aboro dunduko ki biti gayo abaadongi ka ora.

³⁰Ho i adu ni kina ngba gene, pai ki da koyo du Dawidi ni ki ya, “Abisaroma imi awiri bakindo dunduko, a nga gu ni ho sa nye te.”

³¹Bakindo ki mo ku ari, ki sipi gako aremu, ki pi sande. Gako amoyambu dunduko ki ru pati ko na gayo aroko ni sipisipi he.

³²Yonadaba nangia wiri Sima, unvurua Dawidi, ki karaga ha ki ya, “Ka gi gbia bérẽ nga ha ya i imi paranga awiri bakindo dũ ya; bambiko kina Amanona sa nikpi. Ti gu rago ko asosodi dawiriko nga Tamara ri ra na ko, Abisaroma ki tona soa pai kuti ko ka imo ko.

³³Si du awere ka gi gbia nga bakindo bérẽ nga gu pai re kpotoko yo, nga awiriko kpiki dunduko ya; ono kina Amanona kpi sa.”

³⁴Ono Abisaroma aoro. Gu paranga napida rago ki tuka bangiriko, ka ngereka, oni ngére, badungu aboro ki niye ngba gu gene du pavuru bagangara gii he yo.

³⁵Yonadaba ki ya fu bakindo, “Mo ngére, awiri bakindo nayega; wa ga moyambu nigumba ha, wo du he.”

³⁶Si adu wa gere, wa ko adigisi fugo, awiri bakindo ki da, ki poi ni wawa, ki nikpari ni aume. Bakindo na gako amoyambu a dunduko ki nikpari akpara iimi.

³⁷Ono Abisaroma ki oro koyo du Tarumai ni nangia wiri Amiura, bakindo Gesura. Dawidi ki nirungo tipa wiriko na uru dedede.

³⁸Si du Abisaroma aoro ti ni, ki ndu ku Gesura yo, ki nye yo garã ki du biata.

³⁹Ono nunga Abisaroma ki nirungosi mbisimo bakindo gbe, ko ki nikpi nyemu ka ndu fuo ko; bambiko gako rungo tipa Amanona azeredi, mbiko ko aima kpi.