Read zande 2 SAMUERE 15 Bible Online

2 SAMUERE 15 - zande bible

2 SAMUERE 15

¹Fuo gere, Abisaroma ki mbakadi ngbagidavura ni boro gako na afarasi, na aboro 50 i nioro ku mbata yo fu ko.

²Abisaroma ki niguari ngbatutu wiso, ki niru bangbanga yo ngbadimo bakporo. Si adu were ho boro aniye ni na gani ngbanga koyo du bakindo ni tipa sarangbanga, Abisaroma ki niyambu ni tie koyo du ko ni, ki ya, “Boro gini bakporo nga mo?” Ni ki ni ya, “Ga moyambu nga mi dagba gu ngbatunga aYisaraere.”

³Abisaroma ki niya fu ni, “Mo bí nga, gamo apai ni wene he ni ruru he; ono a nga boro ho bakindo aasia pai fu ni ka gia ga pai wa sa te.”

⁴Abisaroma ki ya berewe, “Ako, ka i asia re ni basapungbanga rogo gi ringara re! Ka pai nidu ngba gu boro watadu ngbanga, ni ki ye na ni kono du mi ni, mi ki nimangi gu pai ru aru fu ni!”

⁵Wo si adu, ho boro aniye ni ka tumusa fu ko, ko ki nitaĩ beko, ki zadi ni ki nidungo ni.

⁶Agi apai re Abisaroma amanga fu agu aYisaraere dunduko naaye koyo du bakindo ni tipa sara gayo ngbanga. Si du Abisaroma asa kpoto aboro aYisaraere yo ti ni fuo kina ko.

⁷Ti digida garã biama Abisaroma ki ya fu bakindo, “Mi nakpara foro, mo ídi he mi ndu ka tumo gi zungahe, nga gu mi azunga ha fu Yekova Eburone yo.

⁸Bambiko ga moyambu azunga he ho mi adu ni Gesura yo du Suria yo, niya, ‘Ka Yekova ye na mi berewe ku Yerusarema no, mi amánga pa Yekova ki irisi ko.’ ”

⁹Bakindo ki ya fu ko, “Mo ndú zezeredi.” Si du ko aguari ti ni, ki ndu ku Eburone yo.

¹⁰Ono Abisaroma akedi abamoirago ni gbuko ku dagba angbatunga aYisaraere dunduko, ki ya. “Ho oni ka gia woro nambongo ni, oni ki ya, ‘Abisaroma du ni bakindo ku Eburone yo!’ ”

¹¹Akumba andu na Abisaroma Yerusarema yo wa 200, nangia agu yo ko ayambu yo, i andu zanga ina pa gu biriki re; ka i aina nga gu pai nga ha ya.

¹²Ni gu rago Abisaroma afu motumo; ko ki Kedi sunge fuo Aitofere boro Girona, ko ve rogo gako bakporo nga Girona, nangia ga Dawidi bororondo. Gayo tabura andu nyanyaki; bambiko aboro ange fuo Abisaroma kindi.

¹³Sunge ki ye koyo du Dawidi ni, ki ya, “Kpoto aboro aYisaraere yo sa tihe fuo kina Abisaroma.”

¹⁴Dawidi ki ya fu gako amoyambu dunduko naadu na ko Yerusarema yo, “Oni gúari, ani oro; bambiko ka si adú nga wo ya ani abáta nga be Abisaroma wa sa te. Ani ípisi tirani ka guari, ko ka dusia rani ni ngarã, ki ye na gbigbitapai ku ri rani, ki mangi bakporo ni basape.”

¹⁵Ga bakindo amoyambu ki ya fu bakindo, “Mo ngére, gamo amoyambu idi ka manga kina gu pai gaani gbia nga bakindo ka sia ha.”

¹⁶Bakindo ki kuru, na gako aborokporo dunduko fuo ko. Bakindo ki mbu kina ade bawe gbua, nangia adebadia, i nibanda kporo.

¹⁷Bakinao ki kuru, na aboro dũ fuo ko; i ki ongodi rogo gu ba nga Bete-meraka.

¹⁸Gako amoyambu dunduko ki susi ku mbata yo; na aKereto dunduko, na aPereto dunduko, na agu aboro aGato 600 naaye fuo ko Gata yo, i ki nisusi dunduko ku mbata yo ku bara bangiri bakindo.

¹⁹Bakindo ki ya fu Itai boro Gata, “Tipagine mo andu na ani ti ni tigamo? Mo káraga tiro, ki nye na bakindo; bambiko kungba boro nga mo, ni bagibagi boro a, mo káraga tiro ku rogo ga ba.

²⁰Ono wa mo aye kina gba, tipagine ka mi andú na mo ti ni ku bani na ku bani, wa mi andú tigimi kina ku ho ka rengbe? mo káraga tiro, ki ndu na awirinamo ku sa yo. Inapai dú na rengoforo.”

²¹Itai ki karaga ha fubakindo, ki ya, “A wa du Yekova ni ungako, a wa du bakindo ni ungako nga gi gbia, ni rengo kina rogo gu ba gi gbia nga bakindo ka du ni, watadu kpio na unga, ga moyambu adú kina ho a.”

²²Dawidi ki ya fu Itai, “Mo ndú ki si ku mbiti yo.” Itai nangia boro Gata ki si ku mbiti yo, na gako aboro dunduko, na awiriyo fuo ko.

²³Aboro ringara ki nikpari dunduko ni bakere wawa, ho aboro asi ni dũ ku mbiti yo, bakindo ki si tigako ku mbiti gu wiridi yo nga Kidirona, aboro ki susi dunduko ugayo ngba gene ku ngbakungba yo.

²⁴Abiatara ki ye na Sadoka a, na aboro aRevi dunduko fuo ko, nga agu yo natindi ga Mbori sanduki mokido. I ki moi ga Mbori sanduki sande, da kina ho aboro akuru ni bakporo yo dunduko.

²⁵Bakindo ki ya fu Sadoka, “Oni tíndi ga Mbori sanduki ku bakporo yo berewe. Ka si ngia mi angbá bangiri Yekova, ko ayé na mi berewe, ki yugu he fere, na gako bakporo a.

²⁶Ono ka ko ya wẽ, ‘Ngba nga mo ti re te,’ mo ngére, mi du re, ko mángi kina gu pai fere ka ngba ti ko.”

²⁷Bakindo ki ya berewe fu Sadoka boromotumo, “A nga mo tigamo nga babiapai te? mo gá ku oakporo yo zezeredi na awiro ue du fuo ro, Aimasa nga wiro, na Yonatana wiri Abiatara.

²⁸Mo bí nga, mi asúnga tigimi ti kina agu abasigo ime nga ga ngbakungba, daho pai ka ye ni fere yo du mo ni ka ringbisa pai fere.”

²⁹Si du aSadoka na Abiatara atindi ga Mbori sanduki ti ni berewe ku Yerusarema yo; i ki sungu yo.

³⁰Ono Dawidi ki ndu ki biti ku ri Bagangara Aeraya, ki ndu ni ku nduko, ki nikpari ni aume. Riko ki du ni dadidadi he; agu aboro dunduko naadu na ko i ki dadi riyo adada, ki ta ndu nikpari ni aume a wo.

³¹Gu boro ki gumba ha fu Dawidi, ki ya, “Aitofere du dagba agu atarimbari du na Abisaroma.” Dawidi ki ya, “Ako Yekova, mi nakpara foro, mo sá gu rugapai nga ga Aitofere ni pa mungo.”

³²Ho Dawidi aye ni ku ri bagangara yo ho i anairisa Mbori ni, oni ngére, Usai ki ye nangia boro Aruko ka gbia ko na gako abaukadi ni sipisipi he, na sende ti riko.

³³Dawidi ki ya fu ko, “Ka ani ndu na mo ku mbata yo, mo adú ni dingisaro fere.

³⁴Ono ka mo karaga tiro ku bakporo yo, ki ya fu Abisaroma, ‘Ako bakindo; mi tigimi adú ni ga moyambu. Mi adu ni ga bamo moyambu mbata, mi du awere a wo ni ga moyambu,’ si du mo ka dia ti ni fere be gu rugapai nga ga Aitofere.

³⁵A nga mo adú yo na aSadoka na Abiatara nga aboromotumo, te? Si du, gu pai mo ka nigi ku bakindo yo, mo ki nigumba ha tie fu aSadoka na Abiatara nga aboromotumo.

³⁶Mo ngére, i yo na awiriyo ue, Aimasa nga wiri Sadoka, na Yonatana nga wiri Abiatara. Oni ka nikedi yo na gu pai fere nga gu oni ka nigi.”

³⁷Si du Usai aye ti ni nangia badia Dawidi ku bakporo yo kina ho Abisaroma arima ni ku Yerusarema yo.