Read zande 2 SAMUERE 16 Bible Online

2 SAMUERE 16 - zande bible

2 SAMUERE 16

¹Ho Dawidi asusi ri babita ni ku ari toni, Ziba nangia ga Mefibosete moyambu ki gbia ko, na adongi ue ni vodivodi ra na tindiro, udiudi kpokuta ki du ri ra wa 200, na ugu kpura rindi bakakue 100, na zuzu angua nga ga garã 100, na kambu imekakue sa.

²Bakindo ki ya fu Ziba, “Tipagine ye mo ti ni na agi ahe re?” Ziba ki karaga ha ki ya, “Adongi du tipa ga bakindo aborokporo i nioro ri ra; kpokuta na zuzu angua nga ga garã tipa aparanga i ri he, na imekakue fu agu yo he ka maka yo ngbakungba no, i ki mbiri he.”

³Bakindo ki ya, “Wari du wiri bairaro ni?” Ziba ki ya fu bakindo, “Mo ngére, ko nye kina Yerusarema yo; bambiko ya ko, ‘Areme angbatunga aYisaraere ka karaga ga buba ngbi fere.’ ”

⁴Bakindo ki ya fu Ziba, “Mo ngére, agu ahe dunduko nga ga Mefibosete, gamo du.” Ziba ki ya, “Mi natumusa foro. Ako gbia nga bakindo, mi ngbá bangiro nye anye kindi.”

⁵Ho Bakindo Dawidi aye ni ku Baurima yo, kumba ki kuru yo dagba rika ngbatunga Saura, rimoko angia Simi, ni wiri Gera; ko akuru, ki nisenge he kindi wa ko aye.

⁶Ko ki nizumudi Dawidi ni ambia, na agu amoyambu dunduko nga ga Bakindo Dawidi yo. Avuruko dunduko na airanyaka dunduko ki du ku kumbabeko na ku garebeko yo.

⁷Ho Simi asenge he ni ko aya wẽ, “Mo ndú, Mo ndú, mo, baukakure, nga gbegberẽ sino boro!

⁸Yekova iri bape kure angbatunga Saura dunduko ku ri ro, nga gu ko mo azoga rago ku ba ko; Yekova ki fu ngbi ku be Abisaroma nga wiro. Mo bi, kina ga gbegberẽ pai zi ro; bambiko mo nga baukakure.”

⁹Abisai wiri Seruya ki ya fu bakindo. “Tipagine ka gi kangba ango atiwa gi gbia ti ni nga bakindo? Mi nakpara foro, mo idi he fere mi ndu sa ko, ka kata riko ti ko.”

¹⁰Ono bakindo ki ya, “Sa gimi na oni, oni awiri Seruya? Bambiko ka ngia ko natiwa re, bambiko Yekova agumba ha fu ko, ‘Mo tíwa Dawidi,’ da nikaya tie, ‘Tipagine mangi mo ho ti ni wo?’ ”

¹¹Dawidi ki ya fu Abisai, na fu gako amoyambu dunduko, “Oni ngére, wire nakuru rogo re yo, ko nagbata ungare; waĩ susi ga gi boro Benyamina, ko amanga ha awere re! Oni mbú ko, ko tíwa re; bambiko Yekova nirugu ko.

¹²Si ngia Yekova abí gu gbegberẽpai i amangi fere, Yekova afú wenepai fere tipa ga gi ko re motiwa areme.”

¹³Si du Dawidi na gako aboro ki ndu ngba gayo gene, Simi ki nindu pavuru gangara ti ko tuturũ, ki nitiwa ko wa ko andu, ki nibafu ambia koyo du ko ni, ki nimi nvutu.

¹⁴Bakindo na agu aboro dunduko naadu na ko, ki da na mbugo; ko ki nyakasi tiko ho.

¹⁵Abisaroma na aboro dunduko nangia akumba aYisaraere, ki ye ku Yerusarema yo, na Aitofere a.

¹⁶Ho Usai aye ni nangia boro Aruko, nangia badia Dawiai, koyo du Abisaroma ni, Usai ki ya fu Abisaroma, “Mbori fú gbanga rame fu bakindo! Mbori fú gbanga rame fu bakindo!”

¹⁷Abisaroma ki ya fu Usai, “Gere nga ga weneringise fu badiaro? Tipagine mo andu nga ti ni na badiaro ya?”

¹⁸Usai ki ya fu Abisaroma, “Ai; kina gu ni Yekova asia ni, na agi aboro re a, na akumba aYisaraere dunduko, mi ará fu kina ni, ki nye fuo ni.

¹⁹Da mi ka manga pa ni tigimi berewe? Ka mi mángi nga pai ku bangiri wiriko, te? a wa mi anamanga pai ku bangiri bamo, kina wo mi ka manga ha ku bangiro.”

²⁰Abisaroma ki ya fu Aitorere, “Mo gúmba sangbaro; gini pai ka ani mangi?”

²¹Aitofere ki ya fu Abisaroma, “Mo rími fuo ga bamo adebadia, nga agu yo ko ambu yo i nibanda kporo. AYisaraere agia ha dunduko ya mo ima gberã bangiri bamo, be agu yo dunduko dú na mo ki du nyanyaki.”

²²I ki dua bamburoko fu Abisaroma ri bambu yo; Abisaroma ki rimi fuo ga bako adebadia ku bangiri aYisaraere dunduko.

²³Ono gu rugapai nangia ga Aitofere nga gu ko arugu ni agu auru re si adu wa ka boro asana he tipa kina ga Mbori yuguyuguhe; wo ga Aitofere rugapai adu dunduko fu Dawidi na fu Abisaroma a wo.